Ale ciapier u Bierazoŭskaha spravy iduć nie vielmi.
Asnoŭnyja kampanii: «Premjer markiet», «Hama rytejł» i «NP-servis», — majuć čysty minus za dzieviać miesiacaŭ 2020-ha i ad realizacyi pradukcyi, i na čystaj asnovie.
Pastaŭščyki masava skardziacca ŭ dziaržaŭnyja orhany i ŭ presu na toje, što sietka nie raźličvajecca za tavary.
Kampanii-partniory ŭžo adkryta kažuć pra toje, što «Damašni» nie płacić pa daŭhach. U adnoj tolki «Koka-koły» prablemy nie tolki ŭ niavypłatach, ale i ŭ tym, što sietka nie viartaje abstalavańnie — chaładzilniki.
Razam z hetym Bierazoŭski pačaŭ drabić kampanii, mahčyma, kab uskładnić spahnańnie daŭhoŭ.
Sam pradprymalnik zalez «u domik» i ŭžo paru tydniaŭ ihnaruje ŭsie pytańni. Imavierna, heta źviazana z tym, što sarvałasia sproba pradać stratnuju sietku.
Ab płanach na prodaž ci pryciahnieńnie stratehičnaha inviestara sam Bierazoŭski kazaŭ žurnalistu «Našaj Nivy» try tydni tamu, kali my cikavilisia losam sietki ŭ suviazi sa skarhami pastaŭščykoŭ.
«U nas viaducca ciapier pieramovy, ad ich vyniku zaležać adkazy na vašyja pytańni. Siońnia ja nie mahu ŭpeŭniena adkazać, nie pravioŭšy pieramovy. A kali vy siońnia napišacie, što nam hamon, to vy vielmi naškodzicie i, imavierna, tady tak i budzie. Davajcie u nastupny aŭtorak pahavorym?» — prapanavaŭ Bierazoŭski.
U dzień razmovy na inšym partale jakraz vyjšła publikacyja sa skarhami na «Damašni» z boku «Bryciš Amierykan Tabaka», i Bierazoŭski skardziŭsia na jaje žurnalistu «Našaj Nivy».
«Ja siadzieŭ u banku, sprabavaŭ damovicca, ale chtości ŭbačyŭ artykuł, i mianie paprasili zajści zaŭtra», — skazaŭ jon. Bolš Bierazoŭski na suviaź nie vychodziŭ.
Dva hady tamu «Damašni» zrabiŭ dva vypuski ablihacyj na $1,2 miljona i 300 tysiač jeŭra ŭ ekvivalencie pad 7,5% hadavych. Usie jany raspradadzienyja. Imavierna, pakupnik ablihacyj nikoli nie viernie ŭkładzienyja hrošy.
Prodaž ablihacyj byŭ zakryty. Mahčyma, heta było pryciahnieńnie kankretnaha inviestara. My nie viedajem, što heta była za kampanija, ale vidavočna, što jaje dośvied nie natchniaje inšych patencyjnych inviestaraŭ.
«Mnohija nie razumiejuć usiaho abjomu ryzyk pa ablihacyjach rytejłu. Handlovyja sietki vielmi časta abrynajucca, tamu što ŭ ich ničoha niama, niama aktyvaŭ, — tłumačyć «Našaj Nivie» daśviedčany inviestar.
— Kramy čaściej za ŭsio arandujuć nieruchomaść abo majuć pabudavanuju ŭ kredyt. Uvieś prybytak utvarajecca nie ŭ jurasobie-«kramie», a ŭ kampanijach-pastaŭščykach, jakija taksama naležać tamu ž ŭłaśniku, ale nie źjaŭlajucca častkaj rytejłu. I nichto ź sietak nie płacić napierad, usie płaciać z adterminoŭkaj da 90 sutak. Kali biznes nie ŭźlacieŭ, to nie atrymaješ nijakich vypłat pa ablihacyjach. I navat kali «zachopiš» daŭžnika, to ŭsio, što ty znojdzieš — damovu arendy, daŭhi inšym pastaŭščykam i niejkija zapasy na realizacyi, usio».
Ilustracyjnaje fota Nadziei Bužan
Ale što ŭ vyniku pryviało da padzieńnia Bierazoŭskaha?
Va ŭmovach, kali sam jon havaryć admaŭlajecca, my apišam historyju ŭzdymu i pravału sa słoŭ byłych biznes-partnioraŭ Bierazoŭskaha.
Jak vynikaje ź ich słoŭ, niekali Bierazoŭski mieŭ svaju dolu ŭ «Rubloŭskim», ale pradaŭ jaje, ab čym paškadavaŭ u dalejšyja hady, kali rytejł raskvitnieŭ. I vyrašyŭ zajmieć ułasnuju sietku.
«U Bierazoŭskaha svaich hrošaj asabliva nie było. Biznes trymaŭsia na pierakredytavańni, toje, što zarablałasia, układvałasia ŭ nieruchomaść.
Jon naniaŭ kamandu mieniedžaraŭ, jakija padkazali jamu pamyłkovuju stratehiju: adkryvać maksimalnuju kolkaść kram, brać kolkaściu. Ale miescy pad kramy jany padbirali aby-jakija. Na čym nie atrymlivałasia zarablać — addavali tyja pamiaškańni ŭ arendu inšym sietkam ci biznesam.
Ale pryjšoŭ kavid, naviedvańni kramaŭ skacilisia, sens isnavańnia arendnaha biznesu ŭ kredyt uvohule staŭ dyskusijnym, u «Damašnim» azirnulisia — kredytnaje plačo takoje, što mama darahaja. Biznes nie asabliva prybytkovy, uvieś zakredytavany, banki takuju schiemu praciahvać nie zachacieli, i pierakredytoŭvać Bierazoŭskaha nie stali. Tamu pryjšłosia zakryvać kramy.
Partnioraŭ, jakija b u hetyja składanyja časy ŭvajšli svaimi abo bankaŭskimi hrošami, Bierazoŭski nie znajšoŭ.
Što datyčyć vypłat pastaŭščykam, to heta vyhladała amal piramidalna: z abarotki płacicca tamu, chto raniej pastaviŭ, potym nastupnamu i tak biaskonca, pakul schiema nie laśnie praź finansavyja prablemy, tamu «apošnija» pastaŭščyki mohuć čakać vypłat viečna», — patłumačyli abaznanyja.
Imavierna, nieŭzabavie sietka spynić svajo isnavańnie.
Ci budzie mieć heta adčuvalny efiekt u masštabie krainy? Imavierna, što nie. Mahčymyja niekalki miljonaŭ doŭhu «Damašniaha» — heta drobiaź u maštabie krainy. U vypadku zaciahnutaha bankructva finansava pacierpiać firmy-pastaŭščyki i zaniatyja ŭ «Damašnim» ludzi — im daviadziecca šukać novuju pracu.
