Pavodle jaje słoŭ, praca pa dyskredytacyi vakcyn viadziecca adrazu na niekalkich internet-płatformach i za imi stajać rasijskija śpiecsłužby.
Ab rasijskaj dezinfarmacyi zajaviŭ u paniadziełak i pradstaŭnik Dziarždepartamienta ZŠA Ned Prajs.
«Vyznačany čatyry rasijskija anłajn-płatformy, jakija pracavali pad kiravańniem raźviedsłužbaŭ i raspaŭsiudžvali dezinfarmacyju ab vakcynach, uchvalenych Upraŭleńniem pa sanitarnym nahladzie za jakaściu charčovych praduktaŭ i miedykamientaŭ ZŠA», — skazaŭ jon.
Centr hłabalnaha ŭzajemadziejańnia (GEC) pry Dziarždepartamiencie ZŠA vyjaviŭ try takija płatformy, jakija, jak śćviardžajuć u GEC, raspaŭsiudžvajuć dezinfarmacyju nie tolki ab virusie, ale i ab mižnarodnych arhanizacyjach, vajennych kanfliktach, pratestach i ab usim, što moža patencyjna spryjać raskołu ŭ zachodnim hramadstvie.
«U hetych ahienctvaŭ rozny achop, ton i metavaja aŭdytoryja, ale ŭsie jany raspaŭsiudžvajuć rasijskuju prapahandu i dezinfarmacyju», — zajaviŭ pradstaŭnik GEC.
Arhanizacyja jašče ŭ žniŭni 2020 hoda vypuściła admysłovuju spravazdaču na hetuju temu, u tym liku i na rasijskaj movie, pad nazvaj «asnoŭnyja elemienty ekasistemy rasijskaj dezinfarmacyi i prapahandy».
Pra heta taksama paviedamiła niadaŭna hazieta Wall Street Journal. Vydańnie pryjšło da vysnovy, što heta metaskiravanaja kampanija dezinfarmacyi, skaardynavanaja rasijskim śpiecsłužbami, jakaja stała narastać pa miery taho, jak u ZŠA i inšych zachodnich krainach pačałasia aktyŭnaja vakcynacyja nasielnictva preparatami ad Pfizer/BioNTech, Moderna i Johnson and Johnson.
U jakaści prykładu takoj dezinfarmacyi hazieta pryvodzić publikacyju adnoj z troch zhadanych miedyjnych płatformaŭ — tak zvanaha narodnaha infarmacyjnaha ahienctva Navinavy front (u anhielskaj viersii — News Front).
Heta ahienctva syhrała na mižnarodnych paviedamleńniach i pierabolšyła ryzyku raźvićcia paraliču Beła, jaki paražaje muskuły tvaru ŭ ludziej, jakim zrabili pryščepki Pfizer abo Moderna. Choć śpiecyjalisty pryznajuć, što ŭ redkich vypadkach takoje ŭskładnieńnie na samaj spravie byvaje, heta praktyčna nie adbivajecca na biaśpiecy i efiektyŭnaści vakcyny.
Analityčnuju spravazdaču ab tym, jak Rasija, Kitaj i Iran manipulujuć infarmacyjaj ab vakcynach, apublikavała na dniach i niaŭradavaja arhanizacyja «Aljans za biaśpieku demakratyi» (ASD). Hetaja blizkaja da amierykanskich uładaŭ analityčnaja arhanizacyja była stvoranaja ŭ 2017 hodzie dla supraćstajańnia rasijskim dezinfarmacyjnym kampanijam, nakiravanym na padryŭ demakratyčnych instytutaŭ u ZŠA.
«Z tych časoŭ, jak u sakaviku minułaha hoda z-za ŭspyški virusa vialikaja častka śvietu apynułasia ŭ łokdaŭnie, Rasija, Kitaj i Iran vykarystoŭvali kambinacyju publičnaj dypłamatyi, prapahandy, a taksama adkrytych i schavanych kampanij dezinfarmacyi, kab pradstavić miery ŭ adkaz na pandemiju ŭ hetych krainach jak bolš efiektyŭnyja, čym na Zachadzie», — paviedamlajecca ŭ spravazdačy.
Arhanizacyja vyvučyła ŭ «Tvitary» amal paŭmiljona paviedamleńniaŭ z hetych troch krain. Najbolšyja napadki, pa padlikach aŭtaraŭ daśledavańnia, pa nie zusim zrazumiełaj pryčynie źviedała vakcyna firmy Pfizer. Pry hetym z troch krain mienavita rasijskija krynicy čaściej ŭviazvali hetuju vakcynu sa śmierciu pacyjentaŭ.
Pres-sakratar Kramla Dźmitryj Piaskoŭ admioŭ abvinavačvańni na adras śpiecsłužbaŭ Rasii, nazvaŭšy heta poŭnaj łuchtoj i zajaviŭšy, što jany nie majuć nijakaha dačynieńnia da nahniatańnia chvali krytyki ŭ adras vakcyn.
Na heta Džen Psaki adkazała, što sproby dezinfarmacyi z boku Rasii dla amierykancaŭ — nie navina, što padychody i taktyka Kramla viadomyja, što ZŠA buduć im usimi siłami supraćstajać i što adpaviednyja kroki ŭ hetym kirunku ŭžo robiacca.
