Fota z telehram-kanała Śviatłany Cichanoŭskaj
Sa žniŭnia 2020 hodu «biełarusy vyraśli i pastaleli», ličyć Cichanoŭskaja. «My navučylisia vykazvać svaje dumki. My lepš vykazvajem svaje dumki i havorym pra našy patreby, mary i tryvohi, rasčaravańni i strachi. Adnačasova ŭ žyćci biełarusaŭ šmat što — i indyvidualnaje, i kalektyŭnaje — pahoršyłasia».
Cichanoŭskaja padkreśliła, što z 9 žniŭnia 2020 hodu ŭ Biełarusi było aryštavana bolš za 32 tysiačy čałaviek.
«U dačynieńni da žurnalistaŭ, pravaabaroncaŭ, aktyvistaŭ i mirnych demanstrantaŭ zaviedziena zvyš 2500 kryminalnych spraŭ, — skazała jana. — Pravaabarončyja arhanizacyi zadakumentavali bolš za tysiaču vypadkaŭ katavańniaŭ. U Biełarusi naličvajecca 290 palitviaźniaŭ. Jak minimum vosiem mirnych demanstrantaŭ byli zabityja. Miž tym nivodzin uradavy čynoŭnik nia byŭ pryciahnuty da adkaznaści za žorstkaść, represii, katavańni i zabojstvy».
Cichanoŭskaja nahadała viadomuju cytatu Kastusia Kalinoŭskaha pra toje, što «nie narod dla ŭradu, a ŭrad dla narodu».
«Ciapier my stvarajem urad dla narodu. I nam patrebna vaša dapamoha. Stanovišča čałavieka, jaki prosić dapamohi, vielmi ŭraźlivaje. Vietlivaja admova — heta toje, da čaho biełarusy pryvykli. (…) Na hety momant naša samaja vialikaja słabaść — heta čas. My sami možam ažyćciavić hetuju mirnuju revalucyju, ale čas idzie, a losy ludziej rujnujucca. Ludzi stračvajuć žyćci, svaich blizkich, pracu, vieru. Tak bolš praciahvacca nia moža», — zajaviła Cichanoŭskaja.
«My ŭdziačnyja za dapamohu, jakuju ŭžo atrymali, — padkreśliła Cichanoŭskaja. — Kožny žest salidarnaści, kožnaja sankcyja ŭ dačynieńni da dyktatury, kožny vyratavany biełaruski ŭciakač, kožnaje dziejańnie, jakoje dapamahaje vykonvać pravy biełarusaŭ, na krok nabližaje nas da demakratyi. Biełaruś znachodzicca ŭ pracesie mirnaj baraćby za čałaviečuju hodnaść, svabodu, demakratyju, roŭnaść, viaršenstva zakona i pravy čałavieka. Heta ŭsie tyja kaštoŭnaści, jakija vy adstojvajecie tut, u Eŭraźviazie. Biełaruś znachodzicca na miažy z EZ. Hetym kaštoŭnaściam nielha zdradžvać».
