Fota Depositphotos.com
Dyjetołah Bruk Šeler rekamienduje vydatkoŭvać na abied ad 30 chvilin da hadziny, bo hetyja prymusovyja paŭzy dapamahajuć nam praduchilić vyharańnie. Doktarka tłumačyć heta tym, što my pracujem z 9 hadzin ranicy da 5 viečara piać dzion na tydzień, i nam časta zdajecca, što tolki na vychodnych ci padčas adpačynku my možam vyłučyć čas dla siabie. Tamu cudoŭna, kali padčas pracoŭnaha tydnia my možam znajści mahčymaść adyści ad kampjutaraŭ i zrabić sabie maleńkaje pasłableńnie, piša Huffington Post.
Šmat u čym stres zaležyć ad kartyzołu, uzrovień jakoha i tak moža być pavyšany padčas pandemii. Kali my doŭhi čas znachodzimsia pad upłyvam błakitnaha śviatła z ekranaŭ luboha typu, heta jašče bolš pavyšaje kolkaść kartyzołu ŭ arhaniźmie. Tamu adychod ad ekrana moža źnizić uzrovień stresu. Da taho ž, nie varta hrebavać mahčymaściu pahutaryć z kalehami padčas abiedu.
Kali vy pracujecie doma, vas čakaje jašče adna niebiaśpieka. Praź lohkuju dasiahalnaść ježy možna pierastać kantralavać toje, što i ŭ jakoj kolkaści vy jaście, vyłučać na ježu mienš času i nie źviartać uvahi na pačućcie sytaści. Čaściej za ŭsio lohki dostup da bolš raznastajnaj ježy, čym jość u ofisie, taksama pryvodzić da spažyvańnia bolšaj kolkaści kałoryj.
Što rabić, kab źmianić dla siabie situacyju? Pa-pieršaje, varta zapłanavać dla siabie pierapynak na abied. Pa-druhoje, na čas pierapynku źmianicie pracoŭnaje asiarodździe na niešta inšaje. Kali niama mahčymaści vyjści ŭ inšaje pamiaškańnie, prosta pierasiadźcie z pracoŭnaha miesca. I prybiarycie dalej usie škodnyja pradukty.