U sumiesnym liście jany zaklikajuć kiraŭnikoŭ uradaŭ svaich krain zapatrabavać ad Biełarusi nieadkładnaha vyzvaleńnia 12 źniavolenych žurnalistaŭ i spynieńnia administracyjnaha i kryminalnaha pieraśledu biełaruskich kaleh.
Pa inicyjatyvie Jeŭrapiejskaj fiederacyi žurnalistaŭ, siabram jakoj źjaŭlajecca Biełaruskaja asacyjacyja žurnalistaŭ, kiraŭniki 50 žurnalisckich arhanizacyj u 33 krainach Jeŭropy siońnia, 25 sakavika, nakiravali sumiesny list kiraŭnikam i ŭradam jeŭrapiejskich dziaržaŭ pra situacyju ŭ Biełarusi.
Padpisanty lista 50 žurnalisckich sajuzaŭ vykazvajuć hłybokuju zakłapočanaść u suviazi z uzmacnieńniem represij u Biełarusi. Na siońniašni dzień u krainie bolš za 250 palitviaźniaŭ, u tym liku 12 žurnalistaŭ. I heta tolki viaršynia ajśbierha. Z 9 žniŭnia 2020 hoda było zatrymana bolš za 30 000 čałaviek (u tym liku bolš za 480 žurnalistaŭ), pryčym mnohija ź ich stali achviarami hvałtu i katavańniaŭ.
Na dadzieny momant ŭ niavoli zastajucca žurnalisty:
— Kaciaryna Andrejeva
— Darja Čulcova
— Kaciaryna Barysievič
— Julija Słuckaja
— Ała Šarko
— Siarhiej Alšeŭski
— Piotr Słucki
— Ksienija Łuckina
— Andrej Alaksandraŭ
— Dzianis Ivašyn
— Jazep Pałubiatka
— Siarhiej Hardzijevič
U sumiesnym liście kiraŭniki žurnalisckich sajuzaŭ zaklikajuć:
— Patrabavać ad uładaŭ Biełarusi nieadkładnaha vyzvaleńnia 12 źniavolenych žurnalistaŭ, admieny administracyjnych i kryminalnych spraŭ suprać biełaruskich žurnalistaŭ i adnaŭleńnia pracy Pres-kłuba;
— Źviarnucca da Arhanizacyi Abjadnanych Nacyj, ABSIE, Savieta Jeŭropy i Jeŭrapiejskaha Sajuza, kab mižnarodnaja supolnaść uzmacniła cisk i pryniała miery z nahody pastajannych parušeńniaŭ pravoŭ čałavieka i svabody presy ŭ Biełarusi.
— My vitajem učorašniaje rašeńnie Savieta pa pravach čałavieka AAN stvaryć hrupu śledčych dla zboru dokazaŭ pra praźmiernaje ŭžyvańnie siły i katavańniaŭ z boku ŭładaŭ Biełarusi», — zajaviŭ prezident Jeŭrapiejskaj fiederacyi žurnalistaŭ Mohiens Blichier Bjerrehard. — Ale hetaha niedastatkova. Represii praciahvajucca i ŭzmacniajucca. Režym Łukašenki pavinien nieadkładna vyzvalić usich palitviaźniaŭ, u tym liku 12 žurnalistaŭ, jakija tolki rabili svaju pracu. Nadyšoŭ čas jeŭrapiejskim uradam i mižnarodnaj supolnaści pryniać miery, — havoryć prezident Jeŭrapiejskaj fiederacyi žurnalistaŭ.
