Padkreślenaja Małočnaja vajna moža być častkaj hulni Łukašenki pa šturchańni Miadźviedzieva da kanfliktu z Pucinym.
Niezadoŭha da padziejaŭ vakoł maskoŭskaha samita ADKB niekatoryja rasijskija palitołahi vykazvali dumku, što Alaksandr Łukašenka hulaje ŭ razrez pamiž Pucinym i Miadźviedzievym – sprabuje, tak by mović, razburyć «tandemakratyju». Što ž, kali pierad tym rasijski premjer Pucin i ministr finansaŭ Kudryn sapraŭdy hulali ŭ Minsku ŭ dobraha i złoha śledčych, jak pra toje mnohija pisali, čamu b Łukašenku było nie zhulać u tuju ž samuju hulniu? Tolki pavodle svaich praviłaŭ i z bolš vysokimi staŭkami.
Prezidentu Miadźviedzievu ŭ hetaj hulni advodzicca rola «dobraha chłopca», a Pucinu – «kiepskaha». Niezdarma ž Łukašenka zaprašaŭ Miadźviedzieva na 65‑hodździe vyzvaleńnia Biełarusi ad niamiecka‑fašysckich zachopnikaŭ.
Praŭda,
jak ličać niekatoryja palitołahi, hulnia ŭ kiraŭnika RB nie ŭdałasia, bo prezident RF adnaznačna vystupiŭ u abaronu Kudryna, a paśla demaršu biełaruskich uładaŭ u adnosinach da ADKB vykazaŭ asabistuju kryŭdu na Łukašenku. Ale heta hledziačy pra jakuju hulniu vieści razmovu. Jak daŭ zrazumieć jon sam, hulnia pajšła pa‑bujnomu. I nie ŭ dobraha i złoha śledčych, ale, chutčej, u «treci lišni».
Kali zadumacca, ciapierašni rasijski‑kanflikt destabilizuje situacyju nie stolki ŭ Biełarusi, kolki ŭ Rasii. U Biełarusi ŭłada kansalidavanaja. A ŭ Rasii apošnim časam my nazirajem na fonie ekanamičnaha kryzisu ŭsio bolš zaciatuju baraćbu «tandemakrataŭ» pamiž saboj za ŭładu. Naprykład, vyjaznoje pasiadžeńnie Rady biaśpieki pad staršynstvam Miadźviedzieva ŭ Dahiestanie stała biesprecedentnaj padziejaj. Prezident, faktyčna, upieršyniu zajšoŭ na «kaŭkazskuju terytoryju» jakaja zaŭsiody ličyłasia «terytoryjaj» Pucina i jaho siłavikoŭ. Pucin ža ŭ svaich intervju usio bolš jaŭna krytykuje palityku svajho byłoha staŭleńnika.
Kryzis u adnosinach z hałoŭnym i, badaj, apošnim chaŭruśnikam na postsavieckaj prastory faktyčna aznačaje ŭnutrypalityčny kryzis Rasii. Niechta za jaho pavinien adkazać.(Jak kazaŭ niekali Bierazoŭski – «za kazła adkažaš»). Na rolu «achviarnaha kazła» całkam padyšoŭ by hałoŭny sanlekar RF Aniščanka, na jakoha lohka možna zvalić vydatki «małočnaj vajny». Ale havorka ciapier užo nie tolki pra ekanamičny kryzis. Staŭki, nakolki možna zrazumieć z apošnich padziejaŭ, sapraŭdy ŭźlacieli vielmi vysokija. I
trecim lišnim u ryzykoŭnaj hulni moža być pryznačany adzin z kiraŭnikoŭ Rasii, a moža – kiraŭnik sajuznaj dziaržavy. Kali tandemakraty choć by z pačućcia samazachavańnia damoviacca pamiž saboj dziejničać suprać upartaha susieda sumiesna, nie vybirajučy srodkaŭ i mietadaŭ psichałahičnaj dyj nie tolki psichałahičnaj vajny.
Ciažka prahnazavać vyniki hulni, jakaja viadziecca pad koŭdraj, dy jašče biez praviłaŭ. Jasna adno – partyja ŭvachodzić u stadyju endšpila, i chutka my pabačym raźviazku. Škada tolki, što biełarusy, jak zaŭsiody, zastajucca ŭ roli maŭklivych hledačoŭ.
