instagram.com/serjtankian
Na pytańnie padpisčyka ab tym, što Sierž dumaje ab mirnych pratestach u Biełarusi, jakija pačalisia paśla prezidenckich vybaraŭ u žniŭni 2020 hoda, artyst vykazaŭsia tak:
— Pratesty ŭ Biełarusi praciahvajucca ŭžo niekatory čas, i Łukašenka žorstka dušyć ich. Na žal, Rasija, h.zn. Pucin, pryniała jaho bok. I heta sapraŭdy sumna. Čamu mianie navučyła «aksamitnaja revalucyja» ŭ Armienii ŭ 2018 hodzie, dyk heta tamu, što niehvałtoŭny pratest pracuje, źmieny mahčymyja. Ja chaču, kab ludzi pahladzieli film I'm Not Alone («Ja nie samotny») ab armianskaj revalucyi. U im jość padkazka, jak pracuje tak zvanaje decentralizavanaje hramadzianskaje niepadparadkavańnie.
Tankian dadaŭ, što jamu sumna sačyć za tym, što adbyvajecca ŭ Biełarusi, u Mjanmie i ŭ mnohich inšych miescach u śviecie, dzie ŭspychnuli pratesty. Jon ličyć, što ludzi nie prosta tak vyjšli na vulicy — jany bolš nie mohuć prymać sistemu, jakaja nie źmianiałasia hadami, i ciapier zmahajucca za źmieny, kab ich dzieci mahli žyć u lepšaj krainie i im nie pryjšłosia emihravać.
— U mianie takoje pačućcio, što ŭ bližejšyja try-piać hadoŭ hety śviet kardynalna źmienicca, bo maładoje pakaleńnie, chutčej za ŭsio, usie vy, jakija pišuć mnie, nie zmoža bolš vytrymlivać ani mažlivaha ekałahičnaha vymirańnia, ani baraćby z aŭtakratami adnačasova. Jany [aŭtakraty] pavinny syści.
19 sakavika Sierž Tankian vypuściŭ klip Electric Yerevan, pryśviečany pratestam u Armienii. U roliku zaŭvažyli kadry i ź biełaruskich pratestaŭ. A ŭ pačatku lutaha ŭ frantmena System of a Down vyjšaŭ klip Elasticity, u jakim źniałasia aktrysa rodam ź Biełarusi Saša Borcič.
