U sudzie Kastryčnickaha rajona Mahilova dziaržabvinavaŭca zaprasiŭ 3 hady pazbaŭleńnia voli ŭ kałonii ahulnaha režymu dla błohieraŭ z Bresta Siarhieja Piatruchina i Alaksandra Kabanava. Pra heta «Miediazonie» paviedamiła advakat Piatruchina Iryna Točkar.
Pavodle viersii śledstva, Alaksandr Kabanaŭ i Siarhiej Piatruchin atrymlivali hrošy ad Siarhieja Cichanoŭskaha i znachodzilisia ŭ zmovie ź im. U abvinavačvańni ŭkazana, što abvinavačanyja «stvaryli i administravali sistemu raspaŭsiudžvańnia infarmacyi, jakaja ŭtrymoŭvała łžyvuju acenku nielehitymnaści pradstaŭnikoŭ ułady».
Pa viersii abvinavačvańnia, bieraściejcy stvaryli jutub- i telehram-kanały, u tym liku kanały «Kraina dla žyćcia» i «Narodny reparcior». U ich błohiery publikavali materyjały, jakija źmiaščajuć zakliki hruba parušać hramadski paradak.
Akramia hetaha, błohieram inkryminujuć abrazu supracoŭnika mahiloŭskaha AMAPa Vitala Aŭtušenki.
Treci epizod, pa jakim abvinavačvajuć tolki Siarhieja Piatruchina, źviazany z padziejami 2018 hoda. Jak śćviardžaje abvinavačvańnie, u adzin ź dzion z 13 pa 19 červienia taho hoda błohier apublikavaŭ na staroncy «UKantakcie» videa «Sudny dzień, abo «bieniefis» Leščanki». U kamientary da zapisu ŭtrymlivałasia abraza sudździ.
Sud nad błohierami pačaŭsia ŭ Mahilovie 11 lutaha. Tady ich vydalili z pracesu, sprava razhladajecca bieź ich prysutnaści. 11 sakavika stała viadoma, što Siarhieja Piatruchina źmiaścili ŭ karcar paśla taho, jak jon parezaŭ sabie vieny.