pixabay.com
Supracoŭniki milicyi vyjechali na miesca paśla paviedamleńnia na liniju 102 ad «nieabyjakavaha hramadzianina» ab tym, što «try čałavieki śpiavajuć palityčnyja pieśni». Toj hramadzianin udakładniŭ, što muzyka «śpiavaŭ pieśni na «movie», u jakich uznosiŭ stahodździe BNR, vykarystoŭvaŭ vyraz «my pieramožam». Tady jon padyšoŭ da Ivana i spytaŭ: «Jakoj pieramohi vy čakajecie?» Milicyi mužčyna skazaŭ, što «svaimi pieśniami muzyka zaklikaje da buntarstva».
Na sudzie Ivan Pirejka ŭsio admaŭlaŭ i vinu nie pryznavaŭ. Jak jon skazaŭ, što navat nie viedaje, što za stahodździe BNR. U kamiery na Akreścina jamu siońnia padkazali, što stahodździe BNR było kala troch hadoŭ tamu.
Pa słovach Ivana, jon adzin vykonvaŭ pieśni na anhlijskaj, ruskaj i biełaruskaj movach. U sudzie praz skajp ź izalatara jon navat naśpiavaŭ adnu ź piesień sa svajho repiertuaru.
Jak raspavioŭ Ivan, jaho zatrymlivali supracoŭniki AMAPa: jany nazvalisia i byli biez masak.
Śviedka-milicyjanier skazaŭ,što muzykanta zatrymali paśla pieśni pra BNR i słovaŭ «My pieramožam». Ale pa słovach Ivana, jon tady śpiavaŭ pieśniu Maksa Karža.
U Frunzienskim RUUS na jaho skłali pratakoł za «pikietavańnie z dapamohaj» piesień pa č.1 art. 24.23 KaAP i adpravili na vychodnyja čakać suda na Akreścina.
U paniadziełak Ivan vielmi prasiŭ sudździu Frunzienskaha rajona Maryju Jarochinu nie aryštoŭvać jaho, bo ŭ jaho chvaroby i jamu treba praciahvać lačeńnie, adnak usie roŭna atrymaŭ 15 sutak. Taksama nakładzieny aryšt na jaho hitaru, mikrafon i stojku dla jaho.
