Fota Dźmitryja Bruško, Tut.by
Pra heta jon zajaviŭ u intervju haziecie «SB. Biełaruś siehodnia», paviedamlaje BiełTA.
«U mianie ŭźnik aściarožny aptymizm i źjaviłasia adčuvańnie śviatła ŭ kancy tunela, kali ja pačuŭ ab rehistracyi vakcyny. Dumaju, što nam treba pryščapić kala 60 pracentaŭ nasielnictva, i tady prablema karanavirusa budzie stajać nie tak vostra, z časam zastanucca sparadyčnyja vypadki (jak kokluš, adzior). Virus budzie cyrkulavać, ale stracić ahresiŭnaść: u pryščeplenych zachvorvańnie budzie prachodzić lahčej», — ličyć Ihar Karpaŭ.
Jon taksama paviedamiŭ, što karanavirus amal vycieśniŭ hryp: apošni rehistrujecca, ale ŭ nievialikaj kolkaści.
Što datyčycca pratakołaŭ dyjahnostyki i lačeńnia, u suviazi sa źjaŭleńniem brytanskaha štamu ich źmianiać nie treba, ličyć hałoŭny pazaštatny infiekcyjanist. «U hetym pakul niama nieabchodnaści: nakolki nam viadoma, novy štam lečycca hetak ža», — skazaŭ jon.
Arsienał lekaŭ pašyrajecca z asablivaj aściarožnaściu, «tamu što namacali tyja samyja preparaty, jakija realna pracujuć», adznačyŭ Ihar Karpaŭ. Dobra dapamahajuć imunahłabuliny, antykavidnaja płazma, rečyvy, jakija zdymajuć cytakinavy štorm, a taksama leki, jakija pry pravilnym vykarystańni ŭździejničajuć na sam virus.
«Naohuł, treba skazać, što z pratakołami my nie padviali: za hety hod jany mianialisia, ale niekrytyčna. Naprykład, my skaracili spažyvańnie antybijotykaŭ, tamu što ich naznačać varta pry bakteryjalnaj pnieŭmanii, a nie virusnaj. Taksama vypracavalisia novyja padychody da naznačeńnia harmonaŭ», — dadaŭ jon.
