Pra heta Reform.by paviedamiŭ kiraŭnik BelarusDocs, režysior Aleś Łapo.
— Rašeńnie ab pieranosie fiestyvalu pryniataje na 100%, — pryznajecca zasnavalnik i dyrektar festu dakumientalnaha kino. — Učora my parailisia z kamandaj i vyrašyli pieranieści BelarusDocs na niapeŭny termin. Choć u nas i ŭsio hatova, jak kažuć, biary dy zapuskaj. I tolki ŭčora my razasłali anonsy ŭ ŚMI.
Aleś Łapo nie admaŭlaje, što na taki krok jaho padšturchnuli apošnija naviny ŭ krainie i kłopat pra kamandu. Tolki ŭčora biełaruski režysior viarnuŭsia z rasijskaha fiestyvalu «Artdokfest», dzie demanstravałasia jaho karcina «Usie mierapryjemstvy zhodna z płanam».
— Viarnuŭsia ŭ davoli dobrym nastroi, a tut takoje, — dzielicca režysior. — Pračytaŭ pra spynieńnie ŭžo i anłajn-viersii prajekta «Mašina dyšit, a ja — niet», pra zatrymańnie arhanizataraŭ vystavy pra miedykaŭ. Ciažka heta ŭsio. Tym bolš, u mianie jość pieraściarohi pa adnoj kinastužcy ŭ našaj prahramie, — zaznačaje dakumientalist. — Kali b rabiŭ fiestyval adzin, ja b nie spyniŭsia. Ale pakolki BelarusDocs — sprava kalektyŭnaja, daviałosia pryniać davoli niaprostaje rašeńnie.
BelarusDocs-2021 musiŭ byŭ adbycca na sajcie kinapadziei z 13 pa 19 krasavika. Akcent u prahramie čaćviortaha anłajn-fiestyvalu dakumientalnaha kino tematyčna byŭ zrobleny na pytańniach pravoŭ čałavieka. U jaho konkursie zajaŭleny stužki biełaruskich dakumientalistaŭ: Haliny Adamovič, Lubovi Ziamcovaj, Maksima Švieda, Vieraniki Nikanavaj, Darji Jurkievič i Julii Šatun. Novuju datu fiestyvalu arhanizatary paviedamiać na aficyjnym sajcie i na staronkach fiestyvalu ŭ sacyjalnych sietkach.
