Dźmitry Kučuk, lider partyi, archiŭnaje fota.
Jak paviedamiŭ Svabodzie staršynia «Zialonych» Dźmitry Kučuk, nieviadomyja asoby nastojliva praryvalisia ŭ ofis partyi, ale im nie adčynili.
Pavodle Kučuka, jakraz u hety čas adbyvaŭsia internet-maraton da 35-j hadaviny čarnobylskaj katastrofy, jon byŭ zaprošany ŭ žyvy efir.
Nieŭzabavie paśla hetaha raptoŭna źnikła śviatło i, jak, vynik, internet-suviaź. Taksama nie pracuje stacyjanarny telefon.
Choć sproby nieviadomych trapić u pamiaškańnie spynilisia, u padjeździe i na vulicy stajać niekalki čałaviek u cyvilnym, paviedamiŭ Dźmitry Kučuk.
Palityk heta źviazvaje z tym, što jon byŭ siarod zajaŭnikaŭ tradycyjnaj akcyi «Čarnobylski šlach», jakuju mienskija ŭłady nie dazvolili. Vierahodna, siłaviki aścierahajucca, što chtości ŭsio ž vyjdzie ŭšanavać achviaraŭ katastrofy.
Pavodle Kučuka, pra heta śviedčać i kalony spectechniki, jakija rušać praspektam Niezaležnaści ad miescaŭ dyślakacyi ŭ mikrarajonie Ŭručča ŭ bok centru. Tut i pazadarožniki z mabilnaj aharodžaj, i aŭtazaki, i tentavanyja hruzaviki dla pieravozki asabovaha składu ŭnutranych vojskaŭ.
