Fota pixabay.com
Technałohii ŭsio bolš prysutničajuć u našym žyćci, i za čas z pačatku pandemii hetaja tendencyja tolki ŭzmacniłasia. Ale technałahičnyja hihanty nie adstajuć ad trendaŭ epochi. Jany prapanujuć niekalki cikavych rašeńniaŭ, jakija pavinny dapamahčy ludziam pravodzić mienš času razam z hadžetam.
Pačniom z kampanii Microsoft i jaje servisa Microsoft Outlook, adna z funkcyj jakoha — płanavańnie mierapryjemstvaŭ. Niadaŭna ŭ servisie źjaviłasia novaja funkcyja, jakaja dazvalaje płanavać sustrečy praź piać chvilin paśla pačatku hadziny, kab pamiž imi atrymaŭsia nievialiki pierapynak. Takoje novaŭviadzieńnie — adkaz kampanii na vyniki jaje ŭłasnaha daśledavańnia, jakoje pakazała, što praviadzieńnie virtualnych sustreč bieź pierapynku moža vyklikać u ludziej stres, piša VVS.
Nik Chiederman, adzin ź mieniedžaraŭ brytanskaha adździaleńnia Microsoft, tłumačyć, što rabić pierapynki ad pracy z hadžetami — fundamientalna važnaja reč, bo heta palapšaje našu zdolnaść kancentravać uvahu na pracy. Što datyčycca virtualnych sustreč, Chiederman rekamienduje skaračać ich praciahłaść da 20-40 chvilin, a taksama ładzić častku sustreč u vyklučna hałasavym farmacie i z mahčymaściu dla ich udzielnikaŭ prajścisia, kab źmianić abstanoŭku i palepšyć fizičny stan.
Kampanii Apple i Google taksama prapanujuć instrumienty dla taho, kab bolš śviadoma karystacca hadžetami. U vypadku z Apple razmova idzie pra funkcyju Screen Time, karystalniki Android u takim vypadku mohuć skarystacca aplikacyjami nakštałt Digital Wellbeing. Hetyja instrumienty paviedamiać karystalnikam, kolki času jany ŭžyvajuć aplikacyi na telefonie i kolki paviedamleńniaŭ jany atrymali. Možna stavić abmiežavańni pa kolkaści času, jaki vy płanujecie pravieści z hadžetam, i pa kolkaści paviedamleńniaŭ, jakija vy žadajecie atrymlivać. Google navat raspracoŭvaje instrumient, jaki budzie nahadvać karystalnikam nie hladzieć u telefon padčas špacyru.
Tyja, kamu hetyja technałohii nie dapamahajuć, mohuć pierajści na telefony ź minimalnym naboram funkcyj. Prykład takoha hadžeta — Light Phone, pryłada, ź jakoj možna tolki rabić zvanki i adsyłać paviedamleńni. Hety telefon taksama maje dadatkovyja funkcyi, naprykład mahčymaść razdavać Wi-fi, kalkulatar i prosty muzykalny płejer. Cikava, što padčas pandemii prodažy Light Phone mocna pavialičylisia, bo ludzi žadali padčas łakdaŭnu adpačyć ad hadžetaŭ.
Usio bolš ludziej razumiejuć, nakolki važnaja mahčymaść pracavać bieź pierapynku i adciahvańnia ŭvahi, u tym liku na elektronnuju pierapisku. Ale, viadoma, nie ŭsie majuć takuju mahčymaść. Jość kiraŭniki, jakija patrabujuć ad padnačalenych adkazvać na paviedamleńni jak maha chutčej, to-bok pryniataja ŭ arhanizacyi pracoŭnaja kultura moža drenna ŭpłyvać na zdolnaść ludziej kancentravacca na spravie.
