Vysnovy:
- Na praciahu miesiaca ŭłady praciahvali aktyŭna ŭžyvać kryminalny pieraśled hramadzian pa palityčnych matyvach. Pa danych Hienieralnaj prakuratury, za pieryjad sa žniŭnia 2020 h. było raspačata bolš za try tysiačy kryminalnych spravaŭ za parušeńnie paradku praviadzieńnia masavych mierapryjemstvaŭ i akcyj pratestu;
- Zhodna sa źviestkami PC «Viasna», na praciahu miesiaca sudy vynieśli prysudy ŭ dačynieńni da prynamsi 98 čałaviek pa palityčna matyvavanych kryminalnych spravach. Manitorynh zaśviedčyŭ šmatlikija parušeńni pryncypaŭ spraviadlivaha sudovaha raźbiralnictva i pracesualnych pravoŭ i harantyj abvinavačanych;
- U miescach niesvabody znachodziacca 360 palitviaźniaŭ, ich kolkaść praciahvaje pavialičvacca;
- Praciahvajucca zatrymańni ŭdzielnikaŭ mirnych akcyj pratestu, a taksama advolnyja zatrymańni hramadzian za vykarystańnie bieł-čyrvona-biełaj simvoliki, u tym liku ŭ pryvatnym žylli i terytoryjach. Usiaho za krasavik PC «Viasna» maje infarmacyju ab zatrymańni 304 čałaviek (ź ich u Minsku — 253) i ab vyniasieńni bolš za 210 sudovych pastanovaŭ: u 131 vypadku nakładzieny administracyjny aryšt, u 68 — štraf;
- 17 krasavika ŭ Maskvie supracoŭnikami FSB Rasii va ŭzajemadziejańni z KDB Biełarusi byli zatrymanyja hramadzianin Biełarusi i ZŠA Juraś Ziankovič i palityčny dziejač Alaksandr Fiaduta. Paźniej dziaržaŭnyja ŚMI Biełarusi paviedamili pra zatrymańnie ŭ Minsku staršyni Partyi BNF Ryhora Kastusiova i Volhi Hałubovič. U dačynieńni da zatrymanych raspačali kryminalnuju spravu pa č. 1 art. 357 KK (Zmova i inšyja dziejańni z metaj zachopu ŭłady). Dadzienyja pracesy supravadžajucca aktyŭnaj i ahresiŭnaj prapahandysckaj rytorykaj aficyjnaha Minska i Maskvy ab nibyta datyčnaści śpiecsłužbaŭ ZŠA da padrychtoŭki dziaržaŭnaha pieravarotu ŭ Biełarusi i zamachu na A. Łukašenku i členaŭ jaho siamji;
- Praciahvaŭsia cisk na pravaabaroncaŭ. Na praciahu miesiaca prachodzili pieratrusy i zatrymańni pradstaŭnikoŭ šerahu pravaabarončych arhanizacyj, a taksama aktyŭnyja śledčyja dziejańni ŭ dačynieńni da siabraŭ PC «Viasna»;
- Vyklikajuć zaniepakojenaść šmatlikija fakty žorstkaha abychodžańnia ŭ dačynieńni da hramadzian, zatrymanych i padvierhnutych administracyjnamu aryštu za ŭdzieł u mirnych schodach. Naŭmysna stvoranyja administracyjaj CIP i IČU biesčałaviečnyja ŭmovy ŭtrymańnia dla dadzienaj katehoryi aryštavanych rasceńvajucca ekśpiertami PC «Viasna» jak katavańni;
- Asablivuju zaniepakojenaść vyklikajuć pryniatyja parłamientam źmieny ŭ šerah zakonaŭ i Kryminalny kodeks, nakiravanyja na ŭzmacnieńnie kryminalnaj adkaznaści za ŭdzieł u pratesnych schodach i publičnuju krytyku dziejnaha palityčnaha režymu, a taksama datyčnych pracy ŚMI;
- Na praciahu miesiaca situacyja z pravami čałavieka ŭ krainie praciahvała paharšacca.
0
0
0
0
0
0
