«Vypytvali, za kaho hałasavaŭ na vybarach» — jak zatrymlivali Andreja
Jak raspavioŭ Andrej Parchomienka, za dva tydni da zatrymańnia da jaho prychodzili milicyjanty, ale doma chłopca nie było. Kab paźbiehnuć prablem, Andrej vyrašyŭ źniać skryniu z akna na bałkonie i pastavić jaje na padłohu. 26 krasavika ŭ dźviery ŭsio ž taki pahrukali ludzi ŭ cyvilnym. Jany pakazali paśviedčańnie, ale pradstaviŭsia tolki adzin ź ich — učastkovy Leninskaha RUUSa. Supracoŭniki patłumačyli, što na Andreja składzieny pratakoł za niesankcyjanavanaje pikietavańnie. Supracoŭniki milicyi adrazu pajšli da bałkona, dzie, na ich dumku, i pravodziŭsia pikiet. U pratakole, ź jakim jany pryjšli, było paznačana, što Andrej pikietavaŭ, raźmiaściŭšy papiarovaje pałatno bieł-čyrvona-biełaha koleru na škle bałkona. Ale zamiest papiarovaha pałatna milicyjanty znajšli skryniu. Heta ich ździviła, ale i nie spyniła pierad zatrymańniem. Tamu jany prapanavali Andreju sabrać rečy i prajechać razam ź imi.
Fota ilustracyjnaje
Sa słovaŭ chłopca, u Leninskim RUUSie vopis rečaŭ prachodziŭ u haražy. Andrej adznačyŭ, što ŭ toj dzień, 26 krasavika, ź im było kala siami čałaviek, zatrymanych u centry Minsku. U kabiniecie, kuda jaho pryviali dla hutarki, u jaho vypytvali, za kaho jon hałasavaŭ na vybarach, ci nie chacieŭ by jon źjechać z krainy, jakija ŭ jaho adnosiny da pavyšeńnia padatkaŭ i ci viedaje chłopiec pra telehram-kanał «Karniki». Paśla «prafiłaktyčnaj hutarki» Andreja adpravili ŭ aktavuju zału razam z astatnimi zatrymanymi i pratrymali tam amal da hadziny nočy. Zatym da suda jaho pieraviali ŭ kamieru ŭ RUUSie, a jašče praz sutki — u IČU na Akreścina. U piatnicu Parchomienka etapavali ŭ Žodzina, dzie jon pravioŭ astatnija 10 sutak.
Sud prajšoŭ u zakrytym režymie
Pieršy sud nad minčukom adbyŭsia 27 krasavika ŭ sudzie Leninskaha rajona Minska. Jaho abvinavacili ŭ «pikietavańni šlacham raźmiaščeńnia papiarovaha pałatna bieł-čyrvona-biełaha koleru na škle bałkona». Spravu Parchomienki razhladała sudździa Leninskaha rajona Julija Inčyna.
Svaju vinu Parchomienka nie pryznaŭ, bo, pa jaho słovach, skryniu pakinuli minułyja žychary. U materyjałach spravy majecca čorna-biełaje fota skryni, ale sudździa Julija Inčyna vyrašyła zaprasić u supracoŭnikaŭ RUUSa kalarovaje videa. Na videa sudździa zaŭvažyła, što na aknie ŭ chłopca jašče visić niejki malunak, jaki maje bieły i čyrvony kolery. Andrej ža patłumačyŭ, što heta hierb Lepiela, na jakim prysutničajuć jašče sini i žoŭty kolery. Bolš da hierbu sudździa nie viartałasia. U vyniku sudździa Inčyna adpraviła spravu Andreja na dapracoŭku. Bolš jaho sprava ŭ raskładzie Leninskaha suda nie źjaŭlałasia, tamu vałanciory «Viasny» nie patrapili na pasiadžeńnie pa spravie Parchomienki.
Paźniej vyśvietliłasia, što spravu ŭsio ž taki razhladzieli amal pierad zakryćciom suda. Sud faktyčna prajšoŭ u zakrytym režymie. Na druhim sudzie prysutničaŭ śviedka-milicyjant, jaki śćviardžaŭ, što zamiest skryni asabista bačyŭ na aknie ŭ chłopca papiarovaje BČB-pałatno. U vyniku sudździa Inčyna pavieryła śviedku i aryštavała Parchomienku na 15 sutak.
Asudžany za Pahoniu na pašparcie, były śledčy, zatrymany za trusika z BČB-abrožkam. Z kim chłopiec siadzieŭ na «sutkach»
Andrej paćvierdziŭ, što ciapier u izalatarach usia karespandencyja zabaronienaja, tamu ŭsio, čym im było dazvolena zajmacca, — razmaŭlać. Jon zhadaŭ, što ź im siadzieŭ chłopiec, jaki byŭ asudžany na 15 sutak aryštu za hierb z Pahoniaj na vokładcy pašparta. Ale daviedalisia ab hetym supracoŭniki milicyi tolki paśla taho, jak jaho kvadrakoptar zalacieŭ na terytoryju administracyjnaj ustanovy, što paciahnuła adpaviednuju pravierku.
Jašče niejki čas jamu daviałosia siadzieć pobač z byłym śledčym — Mikitam Staraženkam, jaki zvolniŭsia paśla žnivieńskich padziej. Jaho zatrymali napiaredadni «Čarnobylskaha šlachu» 23 krasavika i pakarali 15-sutačnym aryštam nibyta za niepadparadkavańnie supracoŭnikam milicyi. Mikita raspavioŭ u kamiery, što paśla zvalnieńnia nijakaha cisku na jaho nie akazvali, tamu amal vosiem miesiacaŭ jon spakojna pracavaŭ na inšym miescy, pakul da jaho nie pryjšli ŭ krasaviku.
Fota: sa staronki Mikity Staraženki ŭ sacyjalnych sietkach
Ale samaja pryjemnyja ŭspaminy dla Andreja pakinuŭ 59-hadovy Alaksandr. Hetaha mužčynu ŭžo niekalki razoŭ zatrymlivali pa palityčnym artykule za pikietavańnie. Apošni raz jaho zatrymali kala mietro «Mahiloŭskaja» za toje, što ŭ trusa, jakoha jon pradavaŭ, byŭ BČB-abrožak. Alaksandr Kutas nie maje domu, ale maje zarobak i aktyŭnuju hramadzianskuju pazicyju. Pa słovach Andreja, mienavita praz dobryja adnosiny supracoŭnikaŭ izalatara da Alaksandra ablehčyli ŭmovy i dla ŭsich astatnich.
Skinuŭ 7 kiłahramaŭ za 15 sutak. Jakija ŭmovy ŭ IČU
Andrej raspavioŭ, što pieršyja dva dni z momantu zatrymańnia jaho ŭvohule nie karmili, a vadu možna było pić tolki z-pad krana. Izalatary pa-raniejšamu pierapoŭnienyja: u CIPie na dva spalnyja miescy siadzieli 11 čałaviek. U piatnicu ŭ Žodzina etapavali 70 čałaviek i tam stała trochi bolš miesca — 15 čałaviek na 10 miescaŭ.
Na vulicu asudžanych vyvodzili niekalki razoŭ, a voś u duš — tolki adzin raz za dva tydni. Andrej raspavioŭ pra charčavańnie ŭ Žodzinie:
«Kali na Akreścina mahli dać navat katletu, to ŭ Žodzinie časam davali tolki tušonku abo advarnuju kurycu biez smaku. Sup naohuł vyhladaŭ jak vada».
7 kiłahram — mienavita stolki straciŭ u vazie Andrej za 15 sutak.
«Bili pa nyrkach, ale heta było pa łajcie, kab siniakoŭ nie zastavałasia». Jak staviacca da «palityčnych» u turmie
Andrej Parchomienka raspavioŭ pra katavańni, jakija praciahvajucca ŭ izalatarach da hetaha času:
«U žodzinskim IČU nas stavili na raściažku i kamuści bili pa ščykałatkach, ad čaho zastavalisia hiematomy. Taksama bili pa nyrkach, ale heta było pa łajcie, kab siniakoŭ nie zastavałasia. Rabili jany heta ŭ «prafiłaktyčnych metach». Chłopcy tam pracujuć u asnoŭnym maładyja i ahresiŭnyja, tamu dyjałohu ŭ nas ź imi nie było. Jany sprabavali nas pałochać svaimi krykami».
Alaksandr Parchomienka adznačyŭ, što ŭ žodzinskich kamierach choładna, tamu jon tam zachvareŭ. Na voli chłopiec zdaŭ test na COVID-19, jaki paćvierdziŭsia. Tabletki ŭ turmie — raskoša, jakuju atrymać mohuć nie ŭsie. Matracaŭ u kamierach, u jakich za 15 sutak paśpieŭ pabyvać Andrej, taksama nie było.
