Režym spynieńnia ahniu ŭstupiŭ u siłu ŭ piatnicu ŭ 02: 00 pamiž Izrailem i paleścinskimi hrupoŭkami ŭ siektary Haza, piša TASS.
Jak pieradaje telekanał Al-Aqsa, u siektary Haza aktyŭna śviatkujuć «pieramohu supracivu». Sotni ludziej vyjšli z paleścinskimi ściahami i na vulicy Ramały, u nieba zapuskajucca saluty.
Pieramirja ŭdałosia dasiahnuć pry aktyŭnym pasiarednictvie Jehipta paśla 11 dzion abmienu rakietnymi ŭdarami. U čaćvier viečaram vuzki vajskova-palityčny kabiniet Izraila na śpiecyjalnym pasiadžeńni ŭchvaliŭ adnabakovaje spynieńnie ahniu. Ruch CHAMAS pahadziŭsia na pieramirje.
Pavodle infarmacyi Dziaržaŭnaha jehipieckaha telebačańnia, prezident Abdel Fatach as-Sisi daručyŭ nakiravać dźvie delehacyi ŭ Paleścinu i Izrail dla kantrolu za vykanańniem pieramirja ŭ Hazie.
Intensiŭny abmien rakietnymi ŭdarami pamiž bakami kanfliktu praciahvaŭsia da apošniaha momantu — za 12 chvilin da ŭstupleńnia ŭ siłu pieramirja izrailskaja armija paviedamiła ab novych abstrełach paŭdniovych rajonaŭ.
Dziejnyja ŭ Hazie hrupoŭki i izrailskaja armija abmieńvalisia ŭdarami z 10 maja. Rakietnyja abstreły pačalisia paśla kanfliktu kala miačeci Al-Aksa va Uschodnim Ijerusalimie z-za rašeńnia izrailskaha suda ab kanfiskacyi damoŭ u kvartale Šejch-Džarach u arabskich siemjaŭ. Za hety čas pa terytoryi Izraila vypuścili zvyš 4 tys. rakiet, u adkaz izrailskija vajskoŭcy abstralali sotni celaŭ u ankłavie.
Pavodle apošnich źviestak, kolkaść zahinułych paleścincaŭ u Hazie dasiahnuła 232, 1900 atrymali ranieńni. Usiaho achviarami kanfliktu na paleścinskich terytoryjach z ulikam Zachodniaha bieraha Iardana stali 260 čałaviek. Ź izrailskaha boku zahinuli nie mienš za 12 čałaviek.
Za hety čas u prybiarežnym ankłavie było całkam razburana kala 1800 adzinak žylla, častkova paškodžanyja — 16 800. U centry horada Hazy źniesienyja piać bujnych žyłych vysotak, a pa ŭsim siektary — 74 uradavyja ofisy i dziaržustanovy. Adnaŭleńnie zapatrabuje nie mienš jak $350 młn.
