Pra ich sustreču «Radyjo Svaboda» stała viadoma ad siastry Maksima Aleny.
«Sustreča była ŭ subotu, 29 maja. My pryjechali da turmy a 8-j ranicy, i ŭžo sfarmavałasia čarha, tolki adno miesca zastavałasia. Mahli abiedźvie pajści, ale tady na kožnuju z nas davali pa hadzinie sustrečy, a druhaja hadzina hublajecca. Vyrašyli, što pieršaj sustreniecca maci, a ja ŭ inšy dzień da jaho pajedu. Ciapier šukaju čas na hetym tydni», — raskazała Alena, siastra Maksima Viniarskaha.
Pavodle Aleny, jaje brat dobra padrychtavaŭsia da sustrečy z maci. «Nadzieŭ kašulu, padstryh vałasy, dobra trymaŭsia, byŭ strašenna rady sustrečy. Vyhladaje narmalna, krychu schudnieŭ, ale badziory, aktyŭny. Nie razhubiŭsia. Pra prysud supakoiŭ, što nie vieryć u toje, što daviadziecca siadzieć 5 hadoŭ, jakija jamu dali. Vieryć u lepšaje».
Maksima Viniarskaha asudzili na 5 hadoŭ źniavoleńnia pa artykule ab arhanizacyi masavych biesparadkaŭ. Paśla abviaščeńnia prysudu fihuranty spravy ŭ kletcy skandavali: «Vierym! Možam! Pieramožam!».
Da siami hadoŭ: vyniesieny prysud Sieviaryncu i aktyvistam «Jeŭrapiejskaj Biełarusi». U sudzie jany skandavali «Vierym! Možam! Pieramožam!»
«Ubačyŭ, što ŭ mianie pabiehła ślaza, i pačaŭ supakojvać» — Hanna Sieviaryniec pra svajo pieršaje za hod spatkańnie z bratam Paŭłam
Pavieł Sieviaryniec potym raskazvaŭ svajoj siastry Hańnie, što paśla hetaha jaho trymali ŭ «bietonnym stakanie». Alenie Cieraškovaj viadoma, što z Maksimam achoŭniki taksama abyšlisia žorstka.
«Kazaŭ maci, što zakinuli ŭ niejki «stakan» i trymali tam da nočy, vadu na padłohu vylivali, kab nie moh na padłohu sadzicca, a łaŭki nie było. I paśla ŭ turmie ŭ svaju kamieru jon užo nie trapiŭ — źmiaścili ŭ inšuju. Tam sukamiernikaŭ bolš, a miesca mieniej, ciskanina. Jašče skazaŭ, što rychtujecca skarha ŭ Viarchoŭny sud. Uśviedamlaje, što skarha prysud nie źmienić, ale miarkuje, što treba dalej zmahacca. Adčuvaje za saboj maralnuju pieravahu, i heta dapamahaje tryvać», — raskazała siastra Maksima Viniarskaha Alena.
Maci Maksima Viniarskaha, Taisija Kuźminična, dniami budzie spraŭlać 75-hodździe.
«Maci vielmi pieražyvaje, što śviatkavańnie jubileju projdzie biez Maksima. Nie mahła takoha ŭjavić, ale davodzicca. Ale Maksim na sustrečy jaje ŭžo pavinšavaŭ, usio skazaŭ jak treba», — pieradaje Alena Cieraškova.