Fota Depositphotos.com
U 2008 hodzie Alaksiej Miler, kiraŭnik «Hazproma», zajaviŭ, što praz 7-8 hadoŭ kapitalizacyja kampanii dasiahnie 1 tryljona dalaraŭ. Na toj momant kapitalizacyja «Hazproma» składała $360 miljardaŭ — heta była treciaja pa vieličyni kampanija ŭ śviecie pa kapitalizacyi. (Kapitalizacyja — kolkaść vypuščanych akcyj, pamnožanaja na košt adnoj akcyi, jaki skłaŭsia na biržy.) Dla paraŭnańnia: u 2008 hodzie kapitalizacyja Microsoft składała $263 miljardy, Google — $170 miljardaŭ, Apple — $155 miljardaŭ, Amazon — $33 miljardy.
Kapitalizacyja adnoj z najbujniejšych u śviecie naftavych kampanij BP składała $145 miljardaŭ, a narviežskaj Statoil — kala $100 miljardaŭ.
«Hazprom» z rasijskaj kampanii z daččynymi pradpryjemstvami za miažoj pieratvarajecca ŭ hłabalnuju karparacyju z rasijskimi karaniami», — adznačyŭ Miler u červieni 2008 hoda padčas Jeŭrapiejskaha kanhresa. U 2008 hodzie naziraŭsia rezki rost cen na naftu i haz, što paspryjała tahačasnamu pośpiechu kampanii.
Adnak da 2021 hoda kapitalizacyja «Hazprom» źmienšyłasia ŭ čatyry razy — ciapier jana składaje $90 miljardaŭ. Ekśpierty źviazvajuć heta ź niežadańniem inviestaraŭ układvać hrošy u rasijskuju kampaniju, jakaja čas ad času traplaje pad sankcyi Zachadu i ZŠA.
Bolš za toje, za 2020 hod hadavy prybytak kampanii ŭpaŭ amal u 9 razoŭ — z 1,2 tryljona da 135,3 miljarda, jak śviedčyć dakumientacyja kampanii. «Hazprom» źviazvaje heta sa źnižeńniem kursa rasijskaj valuty i padzieńniem cen na haz i naftu.
U toj čas kampanijami, kapitalizacyja jakich pieravysiła 1 tryljon dalaraŭ, stali Apple — $2102 miljardy, Microsoft — $1914 miljardaŭ, Google — $1652 miljardy, Amazon — $1613 miljardaŭ. Suśvietnym naftavym lidaram zastajecca Saudi Aramco, jakaja ciapier zajmaje treciaje miesca pa vieličyni kapitalizacyi ŭ śviecie ($1885 miljardaŭ). Naftavy hihant z Saudaŭskaj Aravii ŭpieršyniu za 30 hadoŭ raskryŭ svaje finansavyja pakazalniki ŭ 2019 hodzie.
Kapitalizacyja BP na červień 2021 — $92 miljardy, Statoil — $75 miljardaŭ.
