Cyvieta. Fota Depositphotos.com
Daśledavańnie, apublikavanaje ŭ časopisie Scientific Reports, vyjaviła, što dzikich žyvioł časta zabivali prosta na rynku i trymali ŭ niehihijeničnych umovach, što mahło spryjać raspaŭsiudžvańniu virusaŭ. Siarod žyvioł byŭ 31 redki vid, jaki znachodzicca pad achovaj.
Taksama daśledavańnie vyjaviła, što bolšaja častka handlu va Uchani ažyćciaŭlałasia nielehalna, a zdaroŭje i pachodžańnie žyvioł pierad prodažam nijak nie praviarałasia.
Amal usich žyvioł pradavali žyvymi, a niekatoryja handlary prapanoŭvali pasłuhi pa razborcy miasa na miescy, što mieła značnyja nastupstvy dla hihijeny charčovych praduktaŭ.
Aŭtarami daśledavańnia źjaŭlajucca navukoŭcy z Oksfardskaha ŭniviersiteta sumiesna z kalehami z Kitajskaha zachodniaha piedahahičnaha ŭniviersiteta. Jany źbirali źviestki niepasredna ad haspadaroŭ 17 handlovych kropak va Uchani. Vyjaviłasia, što za dva hady na ŭchańskich rynkach pradali bolš za 47 tysiač žyvioł 38 vidaŭ.
Navukoŭcy nie znajšli dokazaŭ tamu, što na rynkach pradavalisia kažany ci panhaliny — najbolš imaviernyja pieršakrynicy karanavirusa pa viersii ekśpiertaŭ z SAAZ. Ale tam pradavalisia norki, barsuki, janotapadobnyja sabaki i cyviety — vidy, jakija mohuć pieranosić COVID-19.
