Suprać Volhi pačali kryminalnuju spravu pa artykule 369 Kryminalnaha kodeksu (źniavaha pradstaŭnika ŭłady) za kamentar pad pastom pra milicyjanta ŭ sacsietkach sa słovam «čałaviek…» i try emodzi z kakaškaj.
Što za sprava?
U pastanovie Ivacevickaha rajonnaha adździełu Śledčaha kamitetu ad 5 krasavika havorycca, što «nieŭstanoŭlenyja asoby» mieli namier na publičnuju źniavahu pradstaŭnika ŭłady ŭ suviazi z vykanańniem im słužbovych abaviazkaŭ. Jany pakinuli źniavažlivyja kamentary ź «nieŭstanoŭlenych techničnych srodkaŭ» i z ananimnych akaŭntaŭ u telehram-čacie «Karatieli Biełarusi» pad fatazdymkam 31-hadovaha kapitana milicyi, operupaŭnavažanaha Ivacevickaha RAUS Rusłana Kucko.
A taksama nakiravali na adras jahonaha ŭlikovaha zapisu ŭ sietcy «ŬKantakcie» paviedamleńni, jakija ŭtrymlivajuć «nehatyŭnuju acenku asoby». Pavodle śledčych, tym samym aŭtary kamentaroŭ publična źniavažyli milicyjanta «jak pradstaŭnika ŭłady ŭ suviazi z vykanańniem im słužbovych abaviazkaŭ».
Pavodle śledčych, dačynieńnie da hetaha złačynstva maje žycharka Ivacevičaŭ Volha Kronda.
Sud zrabili zakrytym pa prośbie milicyjanta
Razhlad spravy pačali 14 červienia ŭ Ivacevickim rajonnym sudzie, spravu razhladaje sudździa Alaksandar Kiryłovič.
Padčas pracesu milicyjant Rusłan Kucko paprasiŭ, kab spravu razhladali ŭ zakrytym pracesie.
«Padymajecca milicyjant i pačynaje šturchać pramovu, maŭlaŭ, u metach nierazhałošvańnia źviestak, jakija jość u kryminalnaj spravie, jakija nibyta prynižajuć jaho honar i hodnaść, i dziela zabieśpiačeńnia jaho biaśpieki zrabić sud zakrytym. Jon prosta bačyŭ, što ŭ zali siadziać žurnalisty, pabajaŭsia, — kaža Volha. — Advakat i ja byli suprać, kab sud byŭ zakryty, bo ŭžo byli artykuły ŭ internecie. Kali jon taki pravilny i česny, to čaho tady baicca? Kali ŭ milicyjanta spytali adras pražyvańnia, jon nazvaŭ adras, pa jakim znachodzicca Ivacevicki RAUS».
Sudździa pastanaviŭ razhladać spravu ŭ zakrytym pracesie i abviaściŭ pierapynak da 2 lipienia.
«Na sudzie spytali, dzie ja pracuju. Ja kažu, što nidzie, bo ciapier takaja sytuacyja, što ja nie mahu pracu znajści, kudy ni źviartajusia, mianie ŭsiudy adšyvajuć. Horad mały, puścili čutki, mianie brać nia chočuć. Sudździa spytaŭ, dzie ja pracavała da dekretu, ja kažu — pracavała ŭ Miensku, ale haspadar ustanovu začyniŭ i, kažuć, źjechaŭ u Maskvu», — kaža Volha.
Supracoŭnik milicyi patrabuje ad Volhi kampensacyju maralnaj škody ŭ dźvie tysiačy rubloŭ.
«Ja spytałasia ŭ śledčaha: a čamu tak mnoha? Jon tam što, paciarpieŭ, byli niejkija paboi? Ich nie chvaluje, što ŭ mianie małoje dzicia», — kaža žančyna.
Volha skazała, što paśla publikacyj u ŚMI śledčy źniaŭ aryšt z majomaści, jakaja, pavodle Volhi, naležyć jaje maci. Ale sama jana zastajecca pad padpiskaj ab niavyjeździe. Dačce Volhi čatyry hady i try miesiacy, u jaje prablemy sa zdaroŭjem, sa zrokam. Jana vozić dačku ŭ lakarniu ŭ Baranavičach.
«Kala šaści rubloŭ kaštuje kvitok da Baranavičaŭ, i adzin analiz kaštuje 37 rubloŭ, a ŭ miesiac treba zdavać dva-try analizy. Dla mianie heta hrošy, ja nie mahu dzieści padpracoŭku znajści. Dzicia nia chodzić u sadok, bo jon na ramoncie da 25-ha. Mnie niama z kim dzicia pakinuć. Ja ŭžo nia viedaju, što mnie rabić i kudy źviartacca, — kaža žančyna. — U traŭni mianie śledčy vyklikaŭ try razy. U mianie ciapier padpiska pra niavyjezd z horadu, i ŭ mianie tut składanaści, bo ja važu dzicia ŭ Baranavičy ŭ balnicu adzin raz na paŭtara-dva tydni. Mnie treba iści da śledčaha, prynižacca, prasić dazvołu. Kali dajuć dazvoł, ja jedu ź dziciem u balnicu, potym ja śledčamu spravazdačusia, skidaju vypiski z kartki, čeki pra apłatu pasłuhaŭ u lakarni. Ja hetaha nie razumieju, heta ŭžo niejki idyjatyzm. Čamu ja pavinna spravazdačycca, što ja vyviezła dzicia da lekara?».
Jak Volha stavicca da spravy, pačataj suprać jaje?
«Heta dzikaść, była b tam niejkaja źniavaha. Nu, smajliki kakašak, jakaja heta źniavaha? I maralnaja kampensacyja ŭ 2 tysiačy rubloŭ, za što? Heta niejki cyrk. Było b za što, kali b ja jamu, naprykład, niedzie pa tvary dała, ci što, tady sapraŭdy było b za što mianie sudzić. A tut prosta na praŭdu pakryŭdziŭsia».
Čytajcie taksama:
Maci-adzinočcy ź Ivacevičaŭ pahražaje 3 hady chimii — za smajliki z haŭniaškaj
Praz smajlik z haŭniaškaj pad pastom pra milicyjaniera ŭ maci-adzinočki apisali ladoŭniu, pralnuju mašynu i televizar
