Spravu razhledzieŭ sudździa Siarhiej. Abaroncaj vystupiŭ Ahiejeŭ.
Ivana Bahdzieviča pryznali vinavatym u tym, što 12-13, 13-14, 14-15, 16, 23 žniŭnia, znachodziačysia ŭ roznych kropkach Minska, jon «publična vykrykvaŭ łozunhi i rabiŭ hučnyja vopleski rukami, tym samym ździajśniaŭ dziejańni, nakiravanyja na praciahłaje parušeńnie spakoju hramadzian». Jany byli spałučanyja ź niepadparadkavańniem zakonnym patrabavańniam pradstaŭnikoŭ ułady. Svaimi dziejańniami jon «abmiežavaŭ prava dobraprystojnych hramadzian na spakoj, pracu i inšaje».
U apošnim słovie palitviazień paprasiŭ prabačeńnia ŭ maci i žonki, skazaŭšy, što pavioŭ siabie biezadkazna i što vinavaty tolki ŭ tym, što ŭ telefonnych razmovach pierabolšvaŭ svaje dziejańni. Jon upeŭnieny, što na samaj spravie nie ździajśniaŭ supraćpraŭnych dziejańniaŭ, nijakich hrošaj jamu nie płacili. Ivan pryznaŭ, što jamu soramna za chłuśniu, jon zasłuhoŭvaje maralnaj vymovy, ale vinavatym u pradjaŭlenym siabie nie pryznaje. Palitviazień skazaŭ, što choča, kab jaho dzieci vyraśli sumlennymi i hodnymi ludźmi, i ŭ kancy jašče raz paprasiŭ prabačeńnia ŭ rodnych i blizkich.
Ivan Bahdzievič da zatrymańnia zajmaŭsia ramontam aŭtamabilaŭ. Maje troch maleńkich dziaciej. Aktyŭna ŭdzielničaŭ u pošukach źnikłych ludziej z PVA «Anioł». Zachaplajecca rybałkaj.
Byŭ zatrymany 19 kastryčnika doma ŭ vioscy Rybcy Puchavickaha rajona. Zatrymlivać Ivana pryjechaŭ bus sa ŭzbrojenymi amapaŭcami.
