Kalijnyja ŭhnajeńni
Z 25 červienia zabaraniajecca impart u krainy ES, kupla abo pierasoŭvańnie — naŭprost ci apasrodkavana — praduktaŭ chłarydu kaliju, pieraličanych u dadatku VIII. U samym dadatku paznačany piać punktaŭ roznaj pradukcyi haliny.
U apošnim punkcie paznačany «inšyja ŭhnajeńni» z peŭnaj hrupy.
Adnym sa značnych ekspartnych tavaraŭ «Biełaruśkalija» źjaŭlajucca kalij chłorysty hranulavany i kalij chłorysty drobny, jakija ŭžyvajuć u jakaści syraviny pry vytvorčaści kompleksnych minieralnych uhnajeńniaŭ u sielskaj haspadarcy. Hetyja tavary prachodziać u mižnarodnym handli pa tavarnym kodzie 3104 20 500 0. Jak vidać z tablicy, ich niama ŭ praduktach haliny, jakija patrapili pad sankcyi.
U Biełaruskaj kalijnaj kampanii paćvierdzili, što z troch kodaŭ pradukcyi, jakija jana realizuje, pad sankcyi trapili dva.
Naftapierapracoŭka
Dakumient uvodzić zabaronu na impart u Jeŭrasajuz naftapraduktaŭ, pieraličanych u Dadatku VI, kali jany zrobleny ŭ Biełarusi abo ŭvoziacca ź Biełarusi. Taksama ŭvodzicca abmiežavańnie na pieravozku naftapraduktaŭ, kali jany vyrablajucca na biełaruskich pradpryjemstvach abo ekspartujucca ź Biełarusi ŭ lubuju inšuju krainu.
Nie dazvalajecca akazvać techničnuju dapamohu, brokierskija pasłuhi, finansavańnie abo finansavuju dapamohu, uklučajučy strachavańnie, lubyja ździełki z naftapraduktami.
U pieraliku nie paznačany subpazicyi, jakija adnosiacca da bienzinu i dyzielnaha paliva. Ale tak jak bienzin i paliva źjaŭlajucca častkaj mikrakoda 2710, heta aznačaje, što jany taksama padpadajuć pad uviedzienyja abmiežavańni, tłumačyć staršy navukovy supracoŭnik BEROC Leŭ Lvoŭski.
Tytuniovaja halina
Krainam ES budzie zabaroniena pastaŭlać u Biełaruś cyharetnyja filtry i papieru, aramatyzujučyja rečyvy dla cyharet, mašyny i abstalavańnie dla tytuniovaj pramysłovaści.
Sama syravina dla vytvorčaści cyharet u sankcyjnym śpisie nie značycca.
Staryja kantrakty nie anulujucca
Pad kožnym raździełam dakumienta jość važnaja ahavorka. «Zabarony nie nanosiać škody vykanańniu kantraktaŭ, zaklučanych da 25 červienia 2021 hoda, abo dadatkovych kantraktaŭ, nieabchodnych dla vykanańnia takich kantraktaŭ». Heta značyć, što ŭsie dahavory pa eksparcie, imparcie, pieramiaščeńni tavaraŭ, jakija trapili pad sankcyi, praciahvajuć vykonvacca, kali jany zaklučany da ŭstupleńnia ŭ siłu pastanovy Rady ES ab siektaralnych sankcyjach.
U kalijnaj i naftapierapracoŭčaj halinach (chutčej za ŭsio, u tytuniovaj taksama) dvuchbakovyja i šmatbakovyja dahavory pa źniešnim handli zaklučajucca ŭ pačatku kalandarnaha hoda jak minimum na adzin kalandarny hod. Z hetaha vynikaje, što dahavory pa eksparcie kalijnych uhnajeńniaŭ i naftapraduktaŭ, jakija trapili pad sankcyi, da kanca hetaha hoda buduć vykonvacca zhodna ź dziejnym kantraktam.
Što tyčycca pieramiaščeńnia i ŭskosnaha ŭdziełu krain ES u handlovych ździełkach trecich krain ź Biełaruśsiu, to ŭpłyŭ uviedzienych abmiežavańniaŭ budzie zaležać ad zakančeńnia terminu kantraktaŭ, naprykład, na tranzit kalijnych uhnajeńniaŭ praź Litvu i handlovych dahavoraŭ.
