«U minułuju niadzielu, 4 lipienia, u našu minskuju archikatedru pryjšli supracoŭniki milicyi z pretenzijaj, što parušana niejkaja tam norma zakanadaŭstva nakont malitvy «Mahutny Boža». Što kankretna, jany nie razumieli sami…
Dyk što ž nie tak z našym lubimym relihijnym himnam? Himn «Mahutny Boža» byŭ napisany ŭ 1943 hodzie Natallaj Arsieńnievaj. U 1947 hodzie kampazitar Mikałaj Ravienski napisaŭ muzyku da hetaha vierša. Himn staŭ malitvaj paślavajennaj biełaruskaj emihracyi. U 1993 hodzie śpiecyjalnaja kamisija Viarchoŭnaha Savieta prapanavała navat zrabić hety himn dziaržaŭnym himnam Biełarusi. Na siońniašni dzień hety himn staŭ malitvaj, jakaja vykarystoŭvajecca ŭ nabaženstvach katalikoŭ, pravasłaŭnych, pratestantaŭ, a taksama apošnim časam hety himn śpiavajuć ludzi, jakija nie atajasamlivajuć siabie ź niejkaj relihijaj.
Himn «Mahutny Boža» heta pierš za ŭsio malitva za našu baćkaŭščynu i za naš narod. Kožnaja malitva niasie ŭ sabie nievierahodnuju siłu i moža zrabić navat vialikija cudy. Kali ž peŭnaja malitva maje vialikuju moc, to i djabał budzie zmahacca ź joj z najbolšaj siłaj i rabić šmatlikija pieraškody, kab ludzi hetu malitvu nie ŭžyvali… Čamu my nie možam śpiavać «Mahutny Boža»? Pytańnie rytaryčnaje…»
Nahadajem, 2 lipienia padčas vystupu na schodzie ŭ honar Dnia Niezaležnaści Alaksandr Łukašenka pieraściaroh ad vykanańnia relihijnaha himna «Mahutny Boža».
«Ciapier vy bačycie: jany chočuć paviarnuć historyju nazad, reabilitavać svaich dziadoŭ i pradziedaŭ i zaviaršyć imi pačatuju spravu. Tamu vyjšli razburać suvierennuju dziaržavu. Heta niejmavierna: da sakralnych miescaŭ našaj dziaržaŭnaści jany rušyli pad ściahami fašysckich najmitaŭ-palicajaŭ. I apošni čas našy srodki masavaj infarmacyi ŭsio bolš raspaŭsiudžvajuć fakty pra toje, što ŭ kaściołach chočuć pamalicca [h. zn. 3 lipienia] pad «Mahutny Boža». Hladzicie, narviaciesia», — cytuje słovy Łukašenki jaho pres-słužba.
Vierš «Mahutny Boža» byŭ napisany Natallaj Arsieńnievaj u Minsku ŭ 1943 hodzie. U 1947-m byŭ pakładzieny na muzyku Mikołam Ravienskim. Tradycyjna vykonvaŭsia ŭ chramach u kancy bahasłužby. Ën nabyŭ novuju papularnaść u hramadstvie sa žniŭnia 2020 hoda.
Na prapanovu ad uład pravieści 3 lipienia ahulnabiełaruskuju malitvu za Biełaruś, u kuryi katalickaj Minska-Mahiloŭskaj dyjacezii tady adkazali, što kataliki ŭ hety dzień buduć malicca ab jednaści i supakoi ŭ našaj krainie, a taksama kuryja zaachvočvaje naprykancy śviatoj imšy vykanać himn «Mahutny Boža», «u jakim budziem prasić Usiemahutnaha Boha, kab zachavaŭ nas i naš kraj ad usiaho złoha».
