«Z pačatku 2021 hoda piać advakataŭ byli vyklučanyja z advakackaj supolnaści rašeńniami dyscyplinarnych kamisij za parušeńnie patrabavańniaŭ i ŭmoŭ ažyćciaŭleńnia prafiesijnaj dziejnaści, — adznačaje na sajcie Biełaruskaj respublikanskaj kalehii advakataŭ staršynia dyscyplinarnaj kamisii Taćciana Tkačonak. — Było i jość niamała kryŭd ź ich boku. Svajo staŭleńnie da ŭžytych da ich dyscyplinarnych spahnańniaŭ asobnyja, užo byłyja advakaty, vykazvali publična, u tym liku ŭ sacyjalnych sietkach i inšych internet-resursach. Ich kamientary nie adpaviadali rečaisnaści: skažałasia pazicyja dyscyplinarnaj kamisii albo situacyja padavałasia nieabjektyŭna ŭ cełym».
Jana kaža, što «luboje rašeńnie dyscyplinarnaj kamisii zasnavana na abaronie intaresaŭ kožnaha advakata i advakackaj supolnaści ŭ cełym». Pierad rašeńniami ab vyklučeńni z advakatami hutaryli zahadčyki jurydyčnych kansultacyjaŭ, staršyni terytaryjalnych kalehij. Ale «parušalniki ŭ razmovach razumieli i pryznavali svaje pamyłki, abiacali vypravicca, adnak užo na nastupny dzień praciahvali parušać praviły prafiesijnaj etyki».
«Rašeńnie ab vyklučeńni advakata prymałasia tolki tady, kali stanaviłasia zrazumieła, što čakać ad jaho spynieńnia parušeńniaŭ praviłaŭ prafiesijnaj etyki nie prychodzicca, — kaža Tkačonak u svaim kamientary. — Tamu ŭsim, chto vyklučany z kalehii, varta kryŭdzicca tolki na siabie. Treba zrazumieć, što ihnarujučy zakanadaŭstva i hrebujučy praviłami supolnaści, da jakoj vy datyčnyja, ažyćciaŭlać prafiesijnuju dziejnaść niemahčyma».
Nahadajem, «za dyskredytujučyja dziejańni» bieź licenzii zastalisia:
Alaksandr Pylčanka — abaraniaŭ palitviaźniaŭ Maryju Kaleśnikavu i Viktara Babaryku;
Michaił Kiryluk — abaraniaŭ palityka Juryja Vaskrasienskaha, źjechaŭ ź Biełarusi i dałučyŭsia da Narodnaha antykryzisnaha ŭpraŭleńnia;
Ludmiła Kazak — abaraniała palitviaźniaŭ Maryju Kaleśnikavu i Irynu Złobinu;
Maksim Konan — abaraniaŭ paciarpiełych ad dziejańniaŭ siłavikoŭ paśla vybaraŭ;
Alena Šynkarevič — abaraniała paciarpiełych ad dziejańniaŭ siłavikoŭ paśla vybaraŭ;
Julija Levančuk — abaraniała paciarpiełych ad dziejańniaŭ siłavikoŭ paśla vybaraŭ;
Siarhiej Zikracki — abaraniaŭ mnohich žurnalistaŭ, jakich za pracu kidali na sutki, byŭ abaroncam palitviaźniaŭ Kaciaryny Andrejevaj i Ały Šarko;
Dźmitryj Łajeŭski — abaraniaŭ palitviaźniaŭ Viktara Babaryku, Maksima Znaka;
Andrej Mačałaŭ — abaraniaŭ mnohich žurnalistaŭ, jakich kidali na sutki, byŭ abaroncam palitviaźniaŭ Kaciaryny Barysievič, Volhi Załatar, Kaciaryny Andrejevaj;
Anton Hašynski — abaraniaŭ palitviaźniaŭ Viktara Kuŭščynava, Volhu Fiłatčankavu, Safiju Sapiehu, Jahora Dudnikava.
Hety śpis niapoŭny, niekatoryja advakaty paśla pazbaŭleńnia licenzii nie zachacieli heta apubličvać. Tym nie mienš, jašče nikoli ŭ historyi Biełarusi tak masava nie začyščali advakaturu.
