«Łukašenku treba hrošy, a prasić asabliva bolš niama ŭ kaho, — ličyć były pasoł Biełarusi ŭ Słavakii Ihar Laščenia. — Kali hlanuć na toje, što nam pakazali z apošniaj sustrečy, to pramova Pucina — heta pramova kredytora, jaki aceńvaje stan patencyjnaha zajomščyka: voś tut u vas pakazčyki na ŭźlocie, a tut prasiadajecie, ale kredyty płocicie spraŭna, małajcy. Raniej havorka išła pra kampiensacyju padatkovaha manieŭra, to ciapier vyśviatlajecca, što havorka pra novy kredyt, jaki treba addavać. Heta pakazvaje, što nijakaj darmavoj dapamohi nie budzie. A kali i budzie, to tolki ŭ abmien na realnuju intehracyju. I kali ŭ adkaz Pucin i ŭrazicca raspoviedami ab suśvietnaj zmovie suprać Biełarusi, sprobach nibyta padpału doma Hajdukieviča, to naroščvacca budzie tolki supracoŭnictva ŭ śfiery biaśpieki: my bačym, što mienš čym za miesiac u Biełarusi pabyvaŭ i kiraŭnik FSB, i kiraŭnik Rady biaśpieki. Kali niechta dumaje, što Łukašenka pajedzie i «zdaść Biełaruś», to, vidać, heta nie zusim tak — praces zdačy suvierynitetu doŭhi, składajecca z mnostva krokaŭ i rašeńniaŭ. Ale toje, što adbyvajecca, asłablaje i krainu i ciapierašniuju ŭładu».
Laščenia nie bačyć suviazi pamiž pryjezdami ŭ Minsk haściej z rasijskich orhanaŭ biaśpieki i pavyšeńniem hradusa represijaŭ u Biełarusi.
«Dumaju, što i represii, i mihracyjny kryzis — heta rašeńni haspadara pałaca niezaležnaści, ale, kali razabracca, to ŭ vyniku robicca heta ŭ intaresach rasijskaha partniora, im vyhadna abvastreńnie, jakoje ŭciskaje Biełaruś u Rasiju».
Jašče adzin dziejsny biełaruski dypłamat, jaki paprasiŭ nie nazyvać imia, ličyć, što Rasija choča pieraŭtvaryć Biełaruś u Čačniu z pravam hołasa ŭ AAN.
«Padarožžy Łukašenki da Pucina vyhladajuć jak spravazdačy padparadkavanaha svajmu načalniku, bo vizitaŭ u adkaz nie nanosicca, chacia jany i anansujucca — naprykład, Pucina nibyta čakali ŭ Bresckaj krepaści ŭ červieni. Vidać, jamu heta ŭžo prosta niecikava. Heta vynik stratehičnych pamyłak, jakija dapuściŭ Łukašenka z 2019 hoda, kali pahadziŭsia na pieramovy ab pahłyblennaj intehracyi. Ciapier my majem situacyju, kali pamiž Pucinym i Łukašenkam ŭstalavalisia asabistyja stasunki tet-a-tet. Isnuje kompleks vusnych damoŭlenaściaŭ, pra jakija viedajuć tolki dva čałavieki. Usio heta adbyvajecca na fonie defołta prava i źniešniaj palityki Biełarusi, to bok našaj dziaržaŭnaści. Kali tak sprava budzie iści dalej, Łukašenka budzie vymušany vyvozić hrošy ad Pucina ŭ čamadanach.
Hledziačy na vyniki pieramoŭ, Maskva nie nastrojena akazvać šyrokuju dapamohu Łukašenku. Niejkaja simaličnaja dapamoha budzie, ale lačyć chvaroby biełaruskaj haspadarki ruskija nie stanuć. Treba razumieć, što $1,5-3 młrd — vialikija hrošy dla Biełarusi, ale całkam dapuščalnyja dla Rasii. Vyhladaje, što pamiž prahmatyčnym i aŭtarytarnym padychodam da Biełarusi ŭ Rasii pieramoh trend na padtrymku dyktatur, za jakim staić Patrušaŭ i Naryškin. Ja dumaju, u bližejšyja hady Maskva budzie imknucca pieraŭtvaryć Biełaruś u Čačniu z pravam hołasu ŭ AAN. I tut pytańnie, jak daloka hatovy pajści Zachad dla pavieličeńnia koštu utrymańnia aŭtarytarnaha revanšysta dla Rasii», — miarkuje dypłamat.
Palityčny ahladalnik Arciom Šrajbman ža miarkuje, što za sustrečami Pucina i Łukašenki ŭ realnaści ničoha nie staić, bo jany tak i nie pahadžajucca na ŭmovy adzin adnaho.
«Łukašenka choča padtrymki palityčnaj i ekanamičnaj, palityčnuju jon atrymlivaje, a voś z ekanamičnaj tuhavata — pa hetaje i jeździć. Z vynikaŭ — nijakaj kankretyki. Toje, što ahučvajecca, «dasiahajecca» nie pieršy raz, ab padatkovym manieŭry nijakich jasnych dadzienych: u jakoj formie kampiensacyja? Novyja kredyty? Novaje pavieličeńnie doŭha? Ja dumaju, što biaspłatnyja hrošy mohuć być tolki ŭ vypadku niejkich realnych krokaŭ pa zdačy suvierynitetu, i ja nie vyklučaju, što Łukašenka moža hetyja «darožnyja karty» i padpisać. Inšaja sprava, što potym pačniecca handal za ich vykanańnie, jak adbyłosia z damovaj ab Sajuznaj dziaržavie. Reziumujučy, za hetymi sustrečami, aproč antyzachodnich pasažaŭ, ničoha nie staić, praktyčnych vynikaŭ my nie bačym», — kaža Šrajbman.
«Naša Niva» taksama paprasiła prakamientavać biełaruska-rasijskuju aktyŭnaść byłoha časovaha pavieranaha ŭ spravach Biełarusi ŭ Šviejcaryi Paŭła Macukieviča.
«Techničnyja aśpiekty — ci była sustreča zapłanavana za dzień ci za dziesiać, jakija šmat abmiarkoŭvali, u dadzienym vypadku, na moj pohlad, druhasnyja. U nas u krainie amal vajenaje stanovišča, i stasunki z Rasiej užo mała nahadvajuć adnosiny dźviuch niezaležnych dziaržaŭ, tamu što inakš vizitami b abmieńvalisia, — ličyć Macukievič. — Ź niadaŭnich časoŭ usio kantakty Łukašenki i Pucina za vyklučeńniem chiba što uzajemnych vinšavańniaŭ sa śviatami abo niadaŭniaha forumu rehijonaŭ nosiać niezapłanavy ekstrany charaktar. Ź vieraśnia minułaha hoda ad Rasii ekstrana patrebnyja padtrymka i hrošy. U cełym, i toje, i inšaje Łukašenka ad Pucina atrymlivaje, i padstaŭ mierkavać, što padtrymka spynicca, u mianie niama. Łukašenka vyrašaje svaje zadačy, hałoŭnaja ź jakich — zachavać uładu. Mienavita na heta pracuje represiŭnaja mašyna. Hradus u adnosinach z Zachadam padymajecca, i Rasija jak raz toj bok, jaki ŭ hetym bolš za ŭsio zacikaŭleny. Biez padtrymki Rasiei hety kryzis tak daloka nie zajšoŭ by. Mahčyma, siońnia mienavita dalejšaja kanfrantacyja z Zachadam źjaŭlajecca ŭmovaj padtrymki Rasijaj zachavańnia ŭłady Łukašenki. Chacia zaležnaść, na maju dumku, tut dvuchbakovaja. U lubym vypadku, prablema nie ŭ hradusie kanfliktu z Zachadam, a ŭ jaho košcie dla Biełarusi i biełarusaŭ. Jon vyličvajecca ŭ pracentach da vałavaha ŭnutranaha praduktu, u stracie niezaležnaści i biaskoncych pałamanych losaŭ biełarusaŭ», — ličyć Macukievič.
I, narešcie, niehatyŭ va ŭsich sensach u hetych vizitach bačyć pamočnik Śviatłany Cichanoŭskaj pa mižnarodnych pytańniach Valeryj Kavieleŭski.
«Terminovaść sustrečy pakazvaje, što stratehii ŭrehulavańnia palityčnaha kryzisa ŭ Biełarusi ŭ Łukašenki niama, płana napierad niama. Jość tolki adzin čałaviek, da jakoha jon moža pryjści i abmierkavać svaje prablemy — heta Pucin. Nijakich idej, jak adbudavać adnosiny z hramadstvam, u jaho niama, tamu hetyja sustrečy vyhladajuć jak sieansy psichaterapii. Nu i my nie viedajem, pra što jany havorać, usio ścisła i zakryta. Anansavanyja «damoŭlenaści» pra niejkuju kredytnuju padtrymku tolki demanstrujuć uraźlivać łukašenkaŭskaj ekanomiki, jakuju ŭvieś čas treba napampoŭvać źniešnimi resursami. Toje, što Pucin u adnoj łodcy z Łukašenkam, nie vielmi dobraja navina, bo Rasija mahła b zaniać bolš pradumanuju pazicyju i nie padtrymlivać taktyku vypalenaj ziamli, jakuju Łukašenka ažyćciaŭjaje, imavierna, u ramkach dakazvańnia Rasii, što ŭ jaho ŭsio pad kantrolem. Ale heta pahražaje Rasii zastacca ŭ baku ad vyrašeńnia biełaruskaha kryzisa», — skazaŭ Kavaleŭski.
