U sudzie Leninskaha rajona 29 lipienia paŭtorna razhledzieli spravu ŭ dačynieńni da Iryny Novik, redaktarki śpiecprajektaŭ Hrodna.life. Jaje pryznali vinavataj u raspaŭsiudzie ekstremisckich materyjałaŭ. Pieršy raz spravu žurnalistki razhladali 3 červienia. Rašeńnie taho pasiadžeńnia było admieniena abłasnym sudom paśla skarhi žurnalistki na parušeńnie prava na abaronu.
Na paŭtornym razhladzie sudździa Rusłan Huryn vynies taki samy štraf, jak raniej pryznačała sudździa Alena Piatrova, — 25 bazavych vieličyniaŭ (725 rubloŭ).
Novy praces pa hetaj spravie prajšoŭ u adsutnaści žurnalistki. Pa stanie zdaroŭja Iryna Novik pakinuła krainu, kab prajści kurs lačeńnia za miažoj. Jaje prośbu adkłaści razhlad spravy da viartańnia ŭ Biełaruś sudździa Rusłan Huryn adchiliŭ.
Žurnalistku asudzili pavodle artykuła 19.11 KaAP («Raspaŭsiud infarmacyjnaj pradukcyi, jakaja źmiaščaje zakliki da ekstremisckaj dziejnaści abo jakaja prapahanduje takuju dziejnaść»). Za toje samaje parušeńnie pakarali i redakcyju sajta — 18 červienia sudździa Hanna Lausik vyniesła maksimalny štraf u 500 bazavych vieličyniaŭ (14 500 rubloŭ).
Za što sudzili Irynu Novik
Raspaŭsiudam ekstremisckich materyjałaŭ sud paličyŭ pamyłkova raźmieščanaje na sajcie Hrodna.life fota s łahatypam Telegram-kanała, pryznanaha ŭ Biełarusi ekstremisckim. Pamyłku zaŭvažyli praź niekalki hadzin i vydalili fota. Za hety čas zdymak z «ekstremisckim» łahatypam paśpieŭ zaŭvažyć namieśnik načalnika adździeła achovy pravaparadku i prafiłaktyki Andrej Pihulski. Jon prachodziŭ śviedkam pa spravie.
