Voś što kažuć miedyki. 

«Na 12-13 siekundzie i potym jašče niekalki razoŭ my bačym pramočvańnie futbołki ŭ vobłaści śpiny rečyvam buraha koleru, jakoje nahadvaje kroŭ.

Krynicaj kryvacioku moža być tolki rana. Z ulikam taho, što potym na videa pakazvajuć mierkavana ahniastrelnyja «ranieńni» hetaha ž čałavieka, ja nie baču na videa paškodžańniaŭ tkanki.

Ale nanieści ranu, nie paškodziŭšy tkaninu adzieńnia, niemahčyma.

Taksama pry ranach jość charakternyja padcioki kryvi, jakija spuskajucca ŭniz ad rany, u zaležnaści ad znachodžańnia cieła ŭ prastory. Tut ja ich nie baču, ja baču tolki plamy. Kali ŭjavić, što heta sapraŭdnaje ranieńnie, to ŭ momant atrymańnia traŭmy i dalej čałaviek mieŭsia lažać uvieś čas na žyvacie.

Heta samaje vialikaje majo pytańnie da realnaści pakazanaha».

«Na 15 siekundzie čałaviek pryciskaje tampon nad klučycaj, a nie pad klučycaj.

Pry hetym viadoma, što padklučyčnyja viena i arteryja prachodziać pad klučycaj, tamu mnie nie zusim jasna, što tam nad klučycaj daje stolki kryvi.

Kali ž ujavić, što rana hłybokaja i kroŭ pastupaje z hłybiejšaj vobłaści, to mianie ździŭlaje, čamu maska, jakuju čałaviek pryciskaje da rany, nie pramočanaja kryvioj, jak heta zvyčajna byvaje — kroŭ raspaŭsiudžvajecca pa tkaninie i pramočvaje jaje. A tut maska prosta vyhladaje vymazanaj bardovym koleram z abodvuch bakoŭ».

«Mianie taksama zasmučaje, što na 03:05 razam ź niaŭmiełymi dziejańniami doktara pa apracoŭcy suchoj (!) rany, bačna, što na stoliku ŭ jaho stajać dźvie charakternyja jomistaści pradukcyi Biełasieptyka z dezynfiektantami, jakija nie ŭžyvajucca dla apracoŭki ran — hety rastvor vykarystoŭvajecca dla apracoŭki skury pierad injekcyjaj albo ruk chirurha pierad apieracyjaj. 

Mnie nie jasna, čamu miedrabotnik pramakaje hetym srodkam marlevy tampon i naciraje im ranu». 

«3 chvilina 14 siekunda. Miedrabotnik tamponam pramakaje nibyta paškodžańnie na šyi, ale tampon zastajecca suchim. Z «paškodžańnia» ničoha nie vydzialajecca.

Mianie heta ździŭlaje. Potym miedrabotnik bintuje hetaje suchoje paškodžańnie na šyi», — kaža miedyk. 

«Heta vielmi nietypovaja, vielmi niestandartnaja rana, ščyra kažučy, nie zusim jasny miechanizm jaje atrymańnia, było b cikava pasłuchać paciarpiełaha pra abstaviny», — dadaje druhi ekśpiert. 

«4 chvilina, 55 siekunda. Ja nie razumieju, što pakazvajecca. Kali heta ślady ŭkusu žyvioły (sabaki), to heta niejki vielmi stary sabaka z 4-ma ikłami i biez astatnich zuboŭ.

Niemahčyma ŭjavić, što paškodžańni zastalisia tolki ad ikłoŭ. 

Va «ŭkušanych ranach» nie bačny irvany kampanient, ale vyjaŭlenyja ranki ad ikłoŭ, što źjaŭlajecca ŭzajemavyklučnym: žyvioła nie moža samknuć i razamknuć skivicy, jak šviejnaja mašynka. Žyvioła chapaje, prakusvaje, zatym ciahnie ŭ baki, raździrajučy miakkija tkanki i pakidajučy adpaviedny śled. Na videa ž bačny tolki ślady prakusvańnia, na moj pohlad, nie chapaje pramiežkavaha kampanienta — irvanaj rany», — kaža miedyk. 

«5 chvilina 44 siekunda. Na śpinie sprava bačnyja prykmiety nibyta dvuch ahniastrelnych paškodžańniaŭ. Adno ź ich vidavočna ŭ prajekcyi lohkaha. U paciarpiełaha pry takim paškodžańni vidavočna pavinien być hiemapnieŭmatoraks. Ale ničoha nie vydaje na videa jaho prablemy z dychańniem, miedrabotnik u hety čas padviazvaje jamu ruku. Dziŭna heta», — kaža sudmiedekśpiert. 

«Na fota mierkavany ahniastreł — my bačym kruhłuju, vialikuju, dobra ačerčanuju formu. Nieviadoma, ci heta skraznoje ranieńnie, ci heta roznyja rany. Niemahčyma vyznačyć, dzie ŭvachodnaje ranieńnie, a dzie vychodnaje. Kali ŭjavić, što jamu prabiła kulaj lohkaje, to doktar by nie nakładvaŭ jamu, nie śpiašajučysia, paviazku na ruku — takija pacyjenty terminova apieryrujucca, bo treba vydalić ź pleŭralnaj prastory kroŭ i pavietra, jakija nie dajuć čałavieku dychać. Heta robicca apieratyŭnym sposabam, u dadzienaha pacyjenta nijakich śladoŭ umiašańnia nie bačna. Kali kroŭ vakoł rany vycirali, to čamu zastalisia dźvie admieciny? Kali nie vycirali, to čamu tak mała kryvi?» — kaža druhi. 

Taksama ŭčora ŭ efiry kanała ANT pakazali videa z «trupam» irakca, nibyta zabitaha. My paprasili ekśpiertaŭ praanalizavać i hetaje videa.

Dyktar ANT skazała, što «navat nie ekśpiertu vidavočna — rany na ciele niesumiaščalnyja z žyćciom». Našy ekśpierty kažuć, što ekśpiertu akurat-taki jasna: na videa niama paškodžańniaŭ, niesumiaščalnych z žyćciom. 

«Na videa ja nie baču paškodžańniaŭ, jakija b mahli pryvieści da śmierci. 

Bolš za toje, ja nie baču prykmiet bijałahičnaj śmierci: niama trupnych plamaŭ i trupnaha zdranćvieńnia, pa hetym videa ja nie mahu na 100% skazać, što pakazvajuć trup. 

Trupnyja, «hipastatyčnyja» plamy ŭtvarajucca ad ściakańnia kryvi z sasudaŭ u nižej raźmieščanyja adździeły cieła z nastupnym pramočvańniem tkanak. Pa pakazanym stanoviščy cieła trupnyja plamy pavinny być bačnyja na piaredniebakavych pavierchniach cieła ŭ vyhladzie sinie-fijaletavaj afarboŭki skury. Plamy ŭtvarajucca praz 1-2 hadziny paśla zaŭčasnaha nastupleńnia śmierci (infarkt, ranieńnie), i praz 3-4 hadziny ŭ vypadku, kali čałaviek ahanizuje (ankałohija, pnieŭmanija). 

Byvaje, što trupnyja plamy amal niabačnyja, ale heta mahčyma pry masiŭnaj stracie kryvi, kali, naprykład, paškodžany bujny sasud. Na videa my takich paškodžańniaŭ nie bačym, roŭna jak i nie bačna, kab trup byŭ vypackany ŭ kryvi. 

Taksama na videa nie bačna trupnaha zdranćvieńnia, jakoje nastupaje praz paru hadzin paśla śmierci — «miedyk» vielmi lohka padymaje i apuskaje ruku «pamierłaha», chacia trupnaje zdranćvieńnie nie dazvalaje lohka zhinać sustavy — dla hetaha patrebna namahańnie, bo ciahlicy, kali vielmi spraścić, «napružany», i trup pavinien «supraciŭlacca» sprobie jaho varušyć», — kaža sudmiedekśpiert. 

«Ja tut nie baču niesumiaščalnych z žyćciom paškodžańniaŭ, prynamsi vonkava. Drobnyja krovapadcioki na ciele, naprykład, uvohule nie niasuć kaštoŭnaści dla analizu biez unutranaha daśledavańnia, bo takich drapin u vypadkova ŭziataha padletka ŭ dvary budzie bolej. Ja nie mahu skazać, što na videa trup», — dadaŭ inšy.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?