Namieśnik premjer-ministra Alaksandr Subocin padkreślivaje, što ŭ Biełarusi pa vynikach uboračnaj budzie dastatkova ŭ zasiekach dla taho, kab zabiaśpiečyć patreby nie tolki dla charčavańnia ludziej, ale i dla žyviołahadoŭli, paviedamlaje BiełTA.
«My nie budziem haładać i našy žyvioły nie buduć haładać», — padkreśliŭ vice-premjer.
Jon adznačyŭ, što na fonie ŭviedzienaj zabarony na ekspart zbožža ź Biełarusi niekatoryja pačynajuć «raździmać», što ŭ krainie mała zbožža. U hetym płanie jon zaŭvažyŭ, što ŭsie paraŭnoŭvajuć ciapierašni ŭradžaj ź letašnim, adnym z rekordnych. «A kali paraŭnoŭvać z 2016-m ci 2017-m, to my i ŭ plusie idziom», — skazaŭ namieśnik premjer-ministra.
«Niedachop — heta nie krach», — adznačyŭ jon.
Nahadajem, uradžajnaść zbožžavych sioleta ŭ susiednich krainach značna vyšejšaja, čym u Biełarusi.
Ukraina sabrała rekordny za ŭsiu historyju krainy ŭradžaj pšanicy (32 miljony ton) i jačmieniu (bolš za 10 młn ton). Rekord dasiahnuty dziakujučy rostu ŭradžajnaści, jakaja vyrasła proci minułaha hoda na 18 pracentaŭ. Pra heta paviedamiła Ministerstva ekanomiki Ukrainy.
Siaredniaja ŭradžajnaść pšanicy va Ukrainie skłała 46,2 c/ha, jačmieniu — 41 c/ha.
Prahnazujecca, što razam z kukuruzaj Ukraina źbiare sioleta 80-82 młn ton zbožža, što taksama stanie rekordam za ŭsiu historyju krainy. Dahetul maksimalny byŭ 2019 hod, kali ŭradžaj skłaŭ 75 miljonaŭ ton.
Ukraina ŭ apošnija hady stała druhim pa abjomie eksparcioram zbožža ŭ śviecie paśla ZŠA.
Rekordna vysoki ŭradžaj zbožžavych i rapsu sabrała i Litva. Prahnazujecca, što ŭradžaj zbožžavych tam składzie 6,93 młn ton i budzie na 0,1% bolšy, čym letaś, i a ŭradžaj rapsu pavinien pavialičycca na 7,7% da 1,04 młn ton.
U Litvie bolš za ŭsio pasiejana pšanicy, uradžajnaść jakoj pavinna skłaści 56 c/ha. (U minułym hodzie ŭradžajnaść była 54 c/ha.) Uradžaj rapsu taksama pavinien być vyšejšy dziakujučy ŭradžajnaści 37 c/ha (u Biełarusi — 21,3 c/ha, va Ukrainie — 27,5 c/ha).
U Biełarusi pavodle źviestak Ministerstva sielskaj haspadarki i charčavańnia namałočana 6,3 miljona ton ziernia pry siaredniaj uradžajnaści 30,5 c/ha (było 37,3 c/ha ŭ 2020 hodzie).
Minsielhascharč tłumačyć padzieńnie ŭradžajnaści zaciažnoj chałodnaj viasnoj i rekordna vysokimi tempieraturami letam.
Cikava paraŭnać siaredniuju ŭradžajnaść zbožžavych u susiednich rehijonach.
- Bresckaja vobłaść 34,8 c/ha
- Vałynskaja vobłaść Ukrainy 48,8 c/ha
- Rovienskaja vobłaść Ukrainy 47,9 c/ha
- Homielskaja vobłaść 23 c/ha
- Žytomirskaja vobłaść Ukrainy 50,2 c/ha
- Kijeŭskaja vobłaść Ukrainy 48,9 c/ha
- Čarnihaŭskaja vobłaść Ukrainy 52,1 c/ha
- Hrodzienskaja vobłaść 36,1 c/ha
- Litva 48,7 c/ha
