55-hadovy Kryścijan Ziel abvinavačvajecca ŭ pieravozcy i raspaŭsiudzie vialikaj kolkaści narkotykaŭ. Jamu pahražaje pazbaŭleńnie voli na termin da 15 hadoŭ.
Ziel naradziŭsia ŭ Tadžykistanie i źjechaŭ u Hiermaniju jašče ŭ maładości, jon źjaŭlajecca hramadzianinam Hiermanii. Akramia taho, u jaho jość dazvoł na znachodžańnie ŭ Biełarusi, pakolki tam u jaho žyvuć svajaki.
U sudzie jon skazaŭ, što žyvie ŭ Hiermanii 30 hadoŭ.
«Pa śpiecyjalnaści ja zvarščyk, a pracuju aŭtamiechanikam u aŭtaservisie», — skazaŭ abvinavačany.
Ziel raniej nie byŭ sudzimy. Jon raźviedzieny. Dzieci ad pieršaha šlubu ŭžo darosłyja.
«U mianie jość pazašlubny syn, jamu 7 hadoŭ», — dadaŭ jon.
Litoŭskija mytniki zatrymali jaho 22 kastryčnika 2020 hoda.
Jon pryciahnuŭ uvahu mytnikaŭ tym, što jechaŭ na rovary i ciahnuŭ za saboj čamadan na kołcach. Pad padšeŭkaj u čamadanie mytniki znajšli dva pakiety, u jakich ahułam było 0,5 kh hierainu. Ziel uvieś hety čas znachodziŭsia pad aryštam, jaho nie adpuskali pad zakład, niahledziačy na nieadnarazovyja prośby.
Ziel zajaviŭ, što čamadan jamu nie naležyć. Jon sprabuje dakazać heta ŭ Vilenskim sudzie sudździ Arunasu Budrysu.
26 žniŭnia Ziel svaju vinu nie pryznaŭ, ale dać pakazańni pahadziŭsia tolki paśla apytańnia ŭsich śviedak.
Mužčyna padčas śledstva raskazaŭ, što jeździŭ u Biełaruś pradavać svaju kvateru. Jon skazaŭ, što dla taho, kab ujechać u krainu na mašynie, jon pavinien byŭ unieści zakład u pamiery 10 000 jeŭra.
Ziel vyrašyŭ nie płacić takija hrošy i pajechaŭ na rovary — pieššu nielha pierachodzić miažu. Jon pakinuŭ mašynu niedaloka ad miažy, pajechaŭ u Biełaruś na rovary, zrabiŭ usio nieabchodnaje i pajechaŭ nazad u Litvu, a adsiul jon płanavaŭ viarnucca dadomu ŭ Hiermaniju.
Ziel skazaŭ, što la miažy jon sustreŭ nieznajomaha mužčynu. Toj skazaŭ, što jaho nie puskajuć u Litvu i paprasiŭ Ziela pieravieźci praź miažu jaho čamadan. Ziel nibyta pravieryŭ čamadan, nie znajšoŭ u im ničoha padazronaha i pahadziŭsia akazać mužčynu pasłuhu.
Potym mytniki ŭžo dastali narkotyki, jakija byli schavany pad padšeŭkaj. Sud vyśvietlić, ci jość praŭda ŭ viersii abvinavačanaha.
