Pavodle krynic partała ŭ MZS Polščy, prysutnaść biełarusa ŭ Karpačy źjaŭlajecca častkaj polskaj dypłamatyčnaj akcyi. Jaje kulminacyjaj pavinna stać sustreča kiraŭnikoŭ MZS Biełarusi i Polščy ŭ Ńju-Jorku, jakaja, mahčyma, projdzie padčas Hienieralnaj siesii AAN, pryznačanaj na 22-24 vieraśnia.
Jak Juryj Vaskrasienski trapiŭ za miažu? Arhanizatary ekanamičnaha forumu ŭ Karpačy śćviardžajuć, što jaho zaprasili vypadkova. Ale hetuju viersiju abviarhajuć dźvie krynicy ŭ polskim MZS: zhodna ź ich źviestkami, polskaja dypłamatyja viedała ab tym, što Vaskrasienski źjavicca na forumie. Miarkujecca, što jon voźmie ŭdzieł u nieaficyjnych pieramovach ab vyzvaleńni Anžaliki Borys i Andreja Pačobuta.
Jak ličać žurnalisty partała, Polšča, žadajučy damahčysia vyzvaleńnia Anžaliki Borys i Andreja Pačobuta i ŭ toj ža čas de-fakta nie majučy nijakich kanałaŭ suviazi z uładami ŭ Minsku, nie maje inšaha varyjantu, jak razmaŭlać z tymi, chto maje dačynieńnie da Alaksandra Łukašenki.
U situacyi zamarožvańnia aficyjnych kantaktaŭ polski bok pavinien razmaŭlać albo naŭprost z KDB, albo z ahientami KDB, piša partał. Ale MZS Polščy pry hetym nie raźličyŭ, što prysutnaść Vaskrasienskaha na forumie vykliča miedyjaskandał. Dypłamaty spadziavalisia, što jaho vizit zastaniecca niezaŭvažanym.
Udzieł Vaskrasienskaha na forumie ŭ Karpačy supravadžajecca surjoznym skandałam. Były vice-ministar zamiežnych spraŭ Polščy, deputat Siejmu Pavał Zaleŭski napisaŭ u tvitary: «Łukašenka prynižaje naš urad, pasyłajučy ŭ Karpač čałavieka, jaki łamaje apazicyju, kab razmaŭlać ab palapšeńni adnosin pamiž Varšavaj i Minskam. Zaprašajučy jaho ŭ Karpač, polski ŭrad pahadziŭsia na takoje prynižeńnie. Nikoli polskaja palityka nie apuskałasia tak nizka».
Juryj Vaskrasienski — były člen štabu Viktara Babaryki. Byŭ zatrymany, udzielničaŭ u kruhłym stale ŭ SIZA KDB z udziełam Łukašenki. Paśla vyzvaleńnia staŭ aktyŭnym prychilnikam dziejnaj ułady. Zaraz ahituje palitviaźniaŭ pisać prašeńni ab pamiłavańni na imia Łukašenki.
