Katalickija biskupy Biełarusi nazvali karykaturu i artykuł «Minskaj praŭdy» «śviadomym i złamysnym skažeńniem praŭdy, paklopam i abrazaj». Jany taksama vykazali spadzieŭ, što «adpaviednyja orhany dziaržaŭnaj ułady daduć naležnuju pravavuju acenku hetaj karykatury i publikacyi ŭ haziecie «Minskaja praŭda», źmieščanaj u № 68 ad 7 vieraśnia 2021 hoda, niezadoŭha da śviatkavańnia Dnia narodnaha adzinstva».
9 vieraśnia biskup Aleh Butkievič, Staršynia Kanfierencyi Katalickich biskupaŭ u Biełarusi, atrymaŭ list ad imia Upaŭnavažanaha pa spravach relihijaŭ i nacyjanalnaściaŭ Alaksandra Rumaka, u jakoj čynoŭnik padkreśliŭ, što hetaja publikacyja nie adlustroŭvaje aficyjnuju pazicyju dziaržavy ŭ adnosinach da Ryma-katalickaha Kaścioła ŭ Biełarusi.
Nahadajem, paśla skandalnaj vokładki «Minskaj praŭdy» pasoł Vatykana sustreŭsia z Makiejem.
Uładzimir Makiej paćvierdziŭ nacelenaść na raźvićcio supracoŭnictva z Vatykanam.
Padkreślena niedapuščalnaść raspalvańnia relihijnaj nieciarpimaści i važnaść zachavańnia ŭ krainie etna-kanfiesijnaj zhody.
Jak adznačyŭ Makiej, u hetym kantekście nie varta nadavać nijakaj uvahi asobnym, vyklučna subjektyŭnym, sprobam namalavać situacyju inakš [NN — mahčyma, pad hetym majecca na ŭvazie skandał z vokładkaj «Minskaj praŭdy»].
Surazmoŭcy damovilisia padtrymlivać dyjałoh pa ŭsich pytańniach, źviazanych ź biełaruska-vatykanskim uzajemadziejańniem.
