Pradprymalnik Kanstancin siadzieŭ na Akreścina, jon aburany ježaj, kaža, što chacieŭ by bačyć taho, chto stvaryŭ rybnuju katletu. Pavodle jaho słoŭ, heta niezrazumiełyja adkidy kostak, łuski i vantrobaŭ, zamiašanyja mukoju. «Dzič i viačera» — 100 hr varanaj hrucy na vadzie, biez soli. Da hetaha nie było navat chałodnaj harbaty ci kampotu.
Andrej — były milicyjant — kaža, što ŭvosień 2020 hoda jon siadzieŭ u IČU i charčavańnie nie adpaviadała normam, viačera zvyčajna była chałodnaj.
U CIP na Akreścina, paviedamlajuć žurnalisty, ježu pryvoziać sa stałovaj Zavoda elektroniki i bytavoj techniki «Haryzont». Dla źniavolenych raspracoŭvajecca śpiecyjalnaje mieniu. Na fota sa stałovaj, jakoje dali žurnalistam, — antysanitaryja. Kiraŭnictva stałovaj admoviłasia kamientavać zdymki.
Z 25 sakavika 2021 hoda źmianilisia normy charčavańnia dla asudžanych i zatrymanych. Asnoŭnaje mieniu — heta bulba (500 hram) i chleb (450 hr). Taksama ŭ dzionnym mieniu 125 hr kapusty, 100 hr krupy, 100 hr miasa, 55 hr ryby, 25 hr kuraciny, 125 mł małaka. Miasa i ryby paśla pierahladu narmatyvaŭ stała mienš.
Košt charčavańnia dla asudžanych — pałova bazavaj vieličyni. Košt ža dzionnaha charčavańnia sa stałovaj — 3,69 rubla, plus maksimalnaja sarakapracentnaja nadbaŭka. Heta značyć, charčavańnie na Akreścina kaštuje 5,10 rubla. A asudžany płacić u try razy bolš — 14,5 rubla ŭ sutki.
Razam ź jurystam žurnalisty vyvučyli tendar na charčavańnie ŭ CIP na Akreścina na 2021 hod. Pretenzii — manipulacyi z tendarami, nievyraznaje techzadańnie, niazvykły vybar placoŭki dla raźmiaščeńnia tendaru — usio heta navodzić na dumki, što zahadzia mieŭsia pretendent na pieramohu.
