Pa-pieršaje, paviedamlajecca, što Sakałoŭ — uradženiec Lidy, były vajskoviec, ciapier na piensii pa vysłuzie hadoŭ, jamu 45 hod.
Na prademanstravanych kadrach dopytu mužčyna raspaviadaje, što paŭhoda tamu na jaho vyjšaŭ «niejki Aleh z Ukrainy» i prapanavaŭ sustrecca ŭ adnym z kafe Kijeva. Žychar Ukrainy, pa słovach Sakałova, paprasiŭ pryhladzieć jakuju-niebudź zbroju «dla baraćby z režymam».
Hrošy na aŭto, zbroju i inšyja zatraty pieradavali z-za miažy praz trecich asob abo pakidali jak zakładki ŭ adkrytym aŭto. Usio nieabchodnaje, pa viersii śledstva, zakuplali ŭ Rasii praz darknet. Zakładka sa zbrojaj, jakuju paźniej Sokałaŭ pryviazie ŭ Biełaruś, była ŭ lesie pad Sankt-Pieciarburham.
Pavodle infarmacyi, ahučanaj u efiry, jon pavinien byŭ darabić toje, čaho nie zmoh realizavać Uładzisłaŭ Vajciachovič, jaki razam sa svaim baćkam u noč na 11 lipienia nibyta pasprabavaŭ padpalić dom deputata Pałaty pradstaŭnikoŭ Aleha Hajdukieviča (pra rezanansnaje zatrymańnie siamji Vajciachovič stała viadoma litaralna tydzień tamu, 15 vieraśnia). Mienavita praź siamju z Barysava i vyjšli na Sakałova, śćviardžajuć siłavyja struktury.
Siarod metaŭ «kilera» byŭ nibyta nie tolki Aleh Hajdukievič, ale jak minimum dva dziasiatki čałaviek: milicyjanty, sudździ, vysokija načalniki, a taksama miedyjnyja asoby — paviedamili na BT. Jon taksama, pa słovach aŭtaraŭ siužeta, płanavaŭ abstreły śpiectranspartu z admysłovaha schovišča.
Zamiežnyja kuratary pastavili pierad Sakałovym zadaču stvaryć schoviščy dla zbroi pa ŭsioj Biełarusi, kab joj mahli skarystacca inšyja «ekstremisckija hrupy», śćviardžajuć žurnalisty.
Pieršuju partyju zbroi, jakuju Sakałoŭ atrymaŭ u Rasii, jon schavaŭ u Dziaržynskim rajonie. Častku jon zakapaŭ u lesie, častku zachoŭvaŭ u svaim aŭtamabili, a reštu — u tajniku na Varšaŭskich mohiłkach u Lidzie.
A zatrymali mužčynu ŭ Žyrovičach, dzie jon, pa viersii siłavikoŭ, rychtavaŭsia ažyćciavić zadumu kurataraŭ — heta «likvidacyja ludziej i pravakacyja chvalavańniaŭ, a taksama ŭvoz u krainu čarhovaj partyi zbroi».
Ciapier mužčynu vystaŭlena abvinavačvańnie pa artykule 289 KK («Akt teraryzmu»).
