— Naša revalucyja biełaruskaja amal vyklučna haryzantalnaja, jana adbyvajecca faktyčna bieź lidaraŭ, tamu što ich albo sadžajuć, albo vyciskajuć z krainy, albo ŭsialakim čynam zaminajuć kantaktavać, arhanizoŭvać hramadstva.
Tamu naša subjektnaść pakul raźmierkavanaja, jana haryzantalnaja, — ličyć navukoviec. — Zvyčajna ŭsio robicca ŭ ijerarchii: jość lidar, u jaho jość kamanda, niejkija arhanizacyi — usio heta idzie da hramadstva, ludzi słuchajuć, što im kažuć, i vykonvajuć.
U nas hetaha nie zdaryłasia, choć jość šerah arhanizacyj i my bačym, što dla taho stanu, u jakim jany znachodziacca, z tym abmiežavanym resursam jany robiać nadzvyčaj šmat. Reśpiekt im i, jak kažuć, «uvažucha».
«Vyniščajecca lubaja kropka, patencyjnaja navat, luboj supolnaj dziejnaści»
Pa słovach Koršunava, ciapier u Biełarusi vyniščajucca nie tolki sproby samaarhanizacyi:
— Vyniščajecca lubaja kropka, patencyjnaja navat, luboj supolnaj dziejnaści, jakaja choć krychu adroźnivajecca ad aficyjnaj. Ale hetuju raźmierkavanuju subjektnaść źniščyć nielha.
Adzinaje, što moža rabić ułada i što jana robić, — jana vyniščaje lubyja mahčymaści hetaj haryzantalnaj subjektnaści skancentravacca na niečym, zrabić niejkuju ahulnuju dzieju. U čym moc hetaj haryzantali? Jaje źniščyć nielha.
«Bolšaść tych, chto padtrymlivaje jaje [uładu], robiać heta sa strachu»
Šmat razmoŭ siońnia i pra toje, što hramadstva padzielenaje. Ale tut šmat niuansaŭ, asabliva kali havaryć pra tych, chto «ni za tych, ni za tych».
— Kali kazać pra ličby, tut vielmi cikavaja reč: hramadstva padzielenaje dzieści 35-40 adsotkaŭ tych, chto padtrymlivaje pratest, kala 25-30 adsotkaŭ tych, chto padtrymlivaje ŭładu, ale «žorstkich» prychilnikaŭ ułady 15-20%, astatnija padtrymlivajuć uładu tamu, što nie bačać alternatyvy.
Čytajcie taksama: «My zrabili pamyłku, što nie stvaryli alternatyŭnych instytutaŭ ułady». Pra što Cichanoŭskaja i Łatuška kazali na kanfierencyi biełarusaŭ śvietu
A voś tych, chto nie padtrymlivaje ni tych, ni tych, z adnaho boku, možna zrazumieć. Jany, chutčej za ŭsio, hałasavali suprać Łukašenki, ale jany nie dumali, što ŭsio budzie tak doŭha. Jany dumali: prahałasavali, Łukašenka sydzie, i ŭsio budzie dobra…
Heta ludzi, jakija zasiarodžany na paŭsiadzionnaści. Ja dumaju, što zaraz davoli ciažka budzie ich niejak uskałychnuć… Ceny rastuć, pytańni z pracaj jość, asabliva ŭ rehijonach. Dobraja častka ludziej adychodzić ad pytańniaŭ palityki, pieramien da pytańniaŭ paŭsiadzionnaści.
Jany buduć zajmacca pytańniami vyžyvańnia. Tamu što žyćcio daražeje, a niejak treba karmić siamju. Jany nie tyja, chto suprać čahości, jany zasiarodžvajucca na sabie.
Ale Koršunaŭ upeŭnieny, što razłom najpierš jość pamiž bolšaj častkaj hramadstva i ŭładaj.
— Tamu što bolšaść tych, chto padtrymlivaje jaje [uładu], robiać heta sa strachu. Ich ništo akramia hetaha nie jadnaje. A tych, chto suprać ułady, jadnaje šmat čaho. Ščyraj padtrymki ŭłady ja nie baču.
«Usie my hublajem pierš za ŭsio čas, tamu što idzie razbureńnie dziaržavy»
Kanstatuje jon i nastupnaje: nasamreč šmat u kaho praz padziei, jakija adbyvalisia apošnija paŭtara hoda, jość traŭma — jana jość u hramadstva ŭ cełym. Ale stavicca navukoviec prapanoŭvaje da hetaha tak: traŭma — heta dośvied, jaki macuje kožnaha paasobku i ŭsich razam.
Niechta sprabuje vyratavacca ŭ tym liku ad hetaj traŭmy praź mihracyju. Adkazvajučy na pytańnie pra jaje, Koršunaŭ pryznaje:
— Zrazumieła, Biełaruś hublaje šmat ciapier. Usie my hublajem pierš za ŭsio čas, tamu što idzie razbureńnie dziaržavy. Ułada razburaje našu dziaržavu i našu budučyniu.
Ale jość i pazityŭny punkt hledžańnia.
— I daśledavańni pakazvajuć, i asabisty dośvied: dobruju častku svaich vysiłkaŭ jany kładuć nie na siabie, navat nie na svaju siamju, ale na budučyniu. Ludzi pracujuć na Biełaruś. Układvajucca, časam finansava, u našu budučyniu ahulnuju. Zrazumieła, ź ciaham času ŭsio bolš buduć asiadać, viernucca nie ŭsie.
U jakaści prykładu Koršunaŭ pryvodzić tych, chto zjechaŭ dziesiać-piatnaccać hadoŭ tamu: šmat chto ź ich nie paryvaje ź Biełaruśsiu.
Adsiul i takaja vysnova: «Navat tyja, chto nie vierniecca, buduć ličyć spravaj honaru dapamahać budavać novuju krainu, novuju dziaržavu».
Čytajcie taksama: «Kali ty ŭ panicy, nielha pierachodzić miažu». Hutarka z akcioram Illom Jasinskim, jakomu na maršy złamali pazvanki, a paśla zaviali kryminałku
