Raskazvajem padrabiaźniej pra taho, chto zaraz staić za adnym z samych papularnych ajčynnych piersanažaŭ-lalek.
Alaksiej Piastrak u roli Mietroviča.
«Mietro dla vypusknikoŭ było jak manna niabiesnaja»
Loša naradziŭsia ŭ Ivacevičach u siamji inžynierki pryborabudaŭničaha zavoda i kiroŭcy. Kali paśla dzieviaci kłasaŭ paŭstała pytańnie, kudy rychtavacca pastupać, to baćka chłopca paraiŭ spynicca na prafiesii enierhietyka.
«Tata kazaŭ: enierhietyka była, jość i budzie. Tak ja apynuŭsia na enierhietyčnym fakultecie BNTU i atrymaŭ śpiecyjalnaść «Pramysłovaja ciepłaenierhietyka i ciepłatechnika»», — raskazvaje surazmoŭca.
Va ŭniviery Loša, ź jaho słovaŭ, byŭ sapraŭdnym fanatykam navučańnia. Jaho navat nazyvali «karalom rabočki» — takoha pakojčyka ŭ internacie, dzie možna pavučyć pradmiety biez šumnych susiedziaŭ pad bokam.
«Tut, vidać, spracavała vychavańnie baćkoŭ: u pieršych kłasach jany prymušali mianie vučyć uroki sa ślaźmi na vačach. Potym ja bačyŭ, što mnohija adnakurśniki, adarvaŭšysia ad baćkoŭ, sychodzili ŭ pjanki-hulanki. Mnie heta było nie cikava, i ja imknuŭsia bavić čas za niečym karysnym, što mahło b spatrebicca ŭ žyćci. Pieršyja miesiacy ja ŭvohule mnohaje vučyŭ na pamiać, a paśla troch kursaŭ maja zalikoŭka ŭžo pracavała na mianie», — raskazvaje Alaksiej.
Tak Alaksiej vyhladaje ŭ zvyčajnym žyćci.
Z dobrymi adznakami chłopiec byŭ piatym u śpisie na raźmierkavańnie (druhim siarod chłopcaŭ), i heta ŭ tym liku, na jaho dumku, dapamahło jamu trapić na pracu ŭ mietrapaliten.
«Kali sam sabie nie znojdzieš miesca raźmierkavańnia, to prapanovy zvyčajna nie vielmi. A tut na piatym kursie da nas zavitaŭ načalnik dystancyi elektramiechaničnaj častki aŭtamatyki i skazaŭ, što im patrebnyja maładyja śpiecyjalisty na absłuhoŭvańnie sistemy aciapleńnia i kandycyjanavańnia.
Viedajecie, mietro dla nas było jak manna niabiesnaja. Heta ličycca vielmi dobrym startam dla karjery. Tamu ja, nie adkładvajučy, źjeździŭ u depo, prademanstravaŭ svaje viedy — u vyniku staŭ adnym z troch, kaho zabrali z patoka na 40 čałaviek».
Alaksiej z kalehami adkazvaje za absłuhoŭvańnie sistem aciapleńnia i kandycyjanavańnia na stancyjach mietro «Jubilejnaja płošča» i «Płošča Franciška Bahuševiča».
Kali zdarajecca niejkaja pazaštatnaja situacyja, jany pavinny ŭ karotkija terminy jaje likvidavać i adramantavać usio ŭ karotkija terminy. Časam prychodzicca pracavać nočču, kali stajać ciahniki, a časam — lacieć na pracu ŭ piać ranicy, kab da zapusku pasažyraŭ usio ŭžo było narmalizavana.
Tak vyhladaje pracoŭnaje miesca Mietroviča.
«Kali na starych stancyjach haradskoje aciapleńnie, to na novych funkcyjanuje sistema aŭtamatyčnaha ciepłazabieśpiačeńnia. U pamiaškańniach, dzie siadzić piersanał — achova, kasa, dziažurnyja i načalniki stancyi — my ŭžo sami padtrymlivajem tempieraturu», — tłumačyć Alaksiej.
«Usie tak i imknulisia pamacać mianie»
Jašče va ŭniviery chłopiec padpracoŭvaŭ animataram: byŭ i Dziedam Marozam, i Miadźviedziem z «Maša i miadźviedzi», Spanč Bobam dy Piratam. Na tematyčnych śviatach u internacie studentu taksama dastavalisia cikavyja roli: naprykład Kupidona na Dzień śviatoha Valancina.
Fota: asabisty archiŭ
Ale reakcyja na tych piersanažaŭ nie paraŭnajecca z zachapleńniem biełarusaŭ Mietrovičam.
«Pieršy raz mnie prapanavali pieraŭvasobicca ŭ Mietroviča viasnoj na akcyi «Kirmaš vakansij». Ja prosta afihieŭ ad taho, jak jon padabajecca ludziam: «Vaŭ, heta Mietrovič! Davajcie zrobim sełfi ź im!» Usie tak i imknulisia pamacać mianie», — dzielicca ŭražańniami Alaksiej.
U paraŭnańni z kaściumami, u jakich chłopcu vypadała pracavać raniej, hety dobra sprajektavany. Nazirać za tym, što adbyvajecca vakoł, možna praz rot Mietroviča.
«Adziny minus — u im, kaniečnie, horača, bo ŭsio ž kaścium nabity pienapoliŭretanam. Ja kali chadžu, to svoj «žyvot» tudy-nazad tuzaju, kab niejak pavietra padkačać, a ludzi śmiajucca — dumajuć, što heta ŭ mianie taki taniec».
Nie tak daŭno Alaksiej byŭ Mietrovičam na dzień horada — tam uzvodzili placoŭku mietrapalitena. Adbivacca ad prychilnikaŭ znoŭ było niaprosta.
«Adnoj babuli-piensijaniercy ja tak spadabaŭsia, što jana mianie i z adnaho boku sfatahrafavała, i ź inšaha, i pacałavała. Stolki kamplimientaŭ vykazała! Vidać, ja joj vielmi spadabaŭsia».
Alaksiej pryznajecca, što kajfuje ad roli Mietroviča i prosić zadziejničać jaho ŭ akcyjach mietro i lubych aktyŭnaściach jak maha čaściej. Nie tak daŭno ŭ vobrazie jon jeździŭ u dziciačy dom.
Taksama Mietrovič vučyć dziaciej biaśpiečnym pavodzinam u mietro. A jašče nahadvaje pasažyram mietro nasić maski.
«Ja ŭpeŭnieny: maski nasić varta. Heta i vaša biaśpieka, i inšych. Tym bolš u mietro jeździć vielmi šmat ludziej».
«Sučasnyja dziaŭčyny nie vielmi lubiać hatavać, tak što ja vyrašyŭ navučycca sam»
Animatarskaje chobi źjaviłasia nie vypadkova. Alaksiej pryznajecca, što jamu padabajecca akciorskaje ramiastvo. Nie tak daŭno jon zapisaŭsia na čarhovyja kursy ŭ kinaškole, pačaŭ rychtavacca da premjery ŭ teatry.
«Ja daŭno dumaŭ zaniacca niečym takim u volny čas. I tut viasnoj, kali pieraapranaŭsia na pracy, da mianie padyšoŭ adzin supracoŭnik mietro, jakoha ja dahetul nie viedaŭ. I jon mnie skazaŭ: «Tabie treba zdymacca ŭ kino».
Vyśvietliłasia, što toj chłopiec sam skončyŭ šmatlikija kursy akciorskaha majsterstva. I jon niedzie ŭ instahramie pabačyŭ maje humarystyčnyja videaroliki.
Karaciej, ja vyrašyŭ, što heta znak. I paśla toj historyi zapisvajusia na ŭsie mahčymyja kursy. Užo paŭdzielničaŭ u epizodach sieryjała «Absurd», jaki zdymaŭsia ŭ nas dla NTB. U mianie byli dźvie karotkija sceny z krutym akcioram Andrejem Miarźlikinym».
Dla svajho instahrama Alaksiej zapisvaje karotkija humarystyčnyja skietčy.
Taksama Alaksiej zdymajecca ŭ rekłamnych rolikach. U teatry ž jamu vypała syhrać niaprostuju rolu — ałkaholika.
«U teatry pry kinaškole my stavim pjesu «Ujaŭnaja achviara», i mnie tam pakul daručyli prachadnuju rolu. Dzieja adbyvajecca ŭ palicejskim učastku: žonka zastukała svajho muža z paluboŭnicaj — razhareŭsia kanflikt. Kab zapoŭnić prastoru, uvodziać roznych piersanažaŭ — ałkaholikaŭ i kurtyzanak. Voś ja budu ałkaholikam».
Alaksiej u roli Dzieda Maroza.
U volny čas chłopiec lubić hrać u baskietboł i hatavać. Jaho firmovy recept — sałodki rulet.
«Ja vielmi lublu jeści, a sučasnyja dziaŭčyny nie vielmi lubiać hatavać. Typu: «Ja tabie kucharkaj nie najmałasia». I kab kanfliktaŭ takich nie było ŭ budučyni, ja vyrašyŭ navučycca hatavać sam.
Firmovymi receptami sa mnoj dzielicca maci, i ŭ Minsku ja abažaju piačy jaje bułački, pirahi, pirožnyja i potym jašče haračymi jeści ich z małakom. Takim čynam ja ŭspaminaju pra rodny dom».
Svaimi kulinarnymi dasiahnieńniami Alaksiej dzielicca ŭ instahramie.
Dziaŭčyny pakul u kuchmistra niama. Čamu? Hetym pytańniem jaho pieryjadyčna zasypajuć siabry.
«Ja zrazumieŭ, jak by banalna ni hučała, što prosta pakul nie sustreŭ tuju samuju. Što tyčycca mimalotnych ramanaŭ — jany mnie niecikavyja. Nie baču ŭ ich sensu», — kaža chłopiec.
«Chaču źniacca ŭ kamiedyi»
Raźmierkavańnie ŭ maładoha śpiecyjalista skončycca vosieńniu nastupnaha hoda, i jamu pryjdziecca vyrašać: praciahvać karjeru ŭ mietrapalitenie ci ŭsio ž ryzyknuć i całkam syści ŭ akciorstva.
«Heta vielmi ciažkaje pytańnie dla mianie, jano mianie stavić u tupik: pažyviem-pabačym, — pryznajecca Alaksiej. — Ale ja vielmi chaču źniacca ŭ kamiedyi. U žyćci vakoł vielmi šmat dramy — adzin sum. A dobry humar moža raźviesialić i adciahnuć ludziej ad prablem.
Ja vyrazna ŭjaŭlaju sabie: subotni viečar, ja z baćkami i siastroj uklučajem televizar i hladzim kino, dzie ja ŭ hałoŭnaj roli. I baćki rahočuć! Da hetaj mety ja budu imknucca».
