Dla paraŭnańnia, na pačatku 2020 hoda hetaja ličba składała kala 3 tysiač. My pahladzieli, na jakich miedycynskich śpiecyjalistaŭ i ŭ jakich rehijonach popyt najbolš vostry. I kolki hrošaj im za heta hatovy płacić.
U Dziatłaŭskim rajonie šukajuć 102 miedykaŭ, u Połackim — 107, u Baranavickim — 272
Da prykładu, Dziatłaŭskaja centralnaja rajonnaja balnica, miarkujučy pa dadzienych ahulnarespublikanskaha banka vakansij, šukaje zaraz bolš za sotniu śpiecyjalistaŭ — tam 102 vakantnych miescy.
Prytym 32 vakansii na pasadu «urač» z zarobkam ad 215 rubloŭ za 0,25 staŭki da 800 rubloŭ za staŭku. Taksama vostra nie chapaje farmaceŭtaŭ, akušerak, fielčaraŭ i miedsiaścior. Apošnim za poŭnuju pracoŭnuju staŭku prapanujuć 580 rubloŭ.
Na sajcie my znajšli amal 30 padviedamasnych ustanoŭ Dziatłaŭskaj centralnaj rajonnaj balnicy. Mnohija ź ich — fielčarska-akušerskija punkty ŭ vioskach. Ale, jak nam raskazali ŭ miedustanovie, usie asnoŭnyja vakansii volnyja ŭsio ž u samaj Dziatłaŭskaj rajonnaj balnicy.
«Ciakučka kadraŭ. Pracavać składana. I choć «kavidnyja» nadbaŭki płaciać, ludzi ŭsio roŭna sychodziać, — adznačyła adna z supracoŭnic balnicy. — Šmat vakansij, kali vy bačyli, vystaŭleny na 0,25 i 0,5 staŭki.
Heta značyć, što nie abaviazkova buduć brać novaha čałavieka na hetaje miesca. Mahčyma, chtości ź miedykaŭ dadatkova pahadzicca ŭziać nahruzku. Ale iści i ryzykavać žyćciom za 250 rubloŭ nichto nie choča».
U samoj ustanovie adznačyli, što kamientavać situacyju bieź Ministerstva achovy zdaroŭja nie buduć. My nakiravali zapyt u ministerstva, ale adkazu nie atrymali.
My vyvučyli sajt Dziatłaŭskaj centralnaj rajonnaj balnicy. Viadučych pryjom lekaraŭ my naličyli tam ŭsiaho 17, a vakansij na pasadu «urač» siońnia tam visić až 32. Zastajecca tolki zdahadvacca, u jakich umovach i ź jakoj kolkaściu pacyjentaŭ siońnia prychodzicca spraŭlacca dziejučym miedykam balnicy.
A voś u Połackaj centralnaj haradskoj balnicy zaraz 107 vakansij. Niekalki, praŭda, dla śpiecyjalistaŭ-niemiedykaŭ. Takich, naprykład, jak buchhałtar, inžynier pa achovie pracy i kasir.
Astatnija — dla miedrabotnikaŭ. Miarkujučy pa raźmieščanych vakansijach, u miedustanovie taksama nie chapaje sanitaraŭ, miedsiaścior, łabarantaŭ, fielčaraŭ pamočnikaŭ uračoŭ, ale bolš za ŭsio nie chapaje samich uračoŭ — dla ich na sajcie 36 vakansij. Biudžet prapanuje na staŭku prapanujuć u siarednim ad 600 da 800 rubloŭ.
U samoj balnicy kamientavać situacyju deficytu miedykaŭ admovilisia.
Pry hetym, jak vynikaje z sajta balnicy, u jaje ŭvachodziać 37 arhanizacyj achovy zdaroŭja roznaha profilu, u tym liku 3 darosłych palikliniki, dziciačuju palikliniku, stamatałahičnuju palikliniku, 18 fielčarska-akušerskich punkta.
Tym nie mienš, pieravažnaja bolšaść svabodnych vakansij, raźmieščanych na sajcie ahulnarespublikanskaha banka vakansij, adpraŭlajuć na adras Połack, pr-t Skaryny, 6, pa jakim znachodzicca niepasredna sama balnica.
Baranavickaja centralnaja paliklinika siońnia šukaje 271 śpiecyjalista. Taksama nie chapaje sanitarak, fielčaraŭ, pravizaraŭ, miedsiaścior, niekatorych techničnych rabotnikaŭ.
Amal pałova vakansij — dla śpiecyjalistaŭ sa śpiecyjalnaściu «urač». Dla ich Baranavickaja centralnaja paliklinika adkryła 123 vakansii. Niekatorym prapanujuć 0,25 ci 0,5 staŭki, niekatorym — staŭku. Zarobki, u siarednim, ad 125 da 600 rubloŭ.
U paliklinicy ŭdakładnili, što ŭ jakaści najmalnika Baranavickaja centralnaja paliklinika šukaje śpiecyjalistaŭ nie tolki dla siabie, ale adrazu dla niekalkich miedustanoŭ u horadzie: dla čyhunačnaj palikliniki, haradskoj palikliniki № 2, dla haradskoj stamatałohii i skurviendyspansiera.
«U niekotorych paliklinikach nie chapaje pa 20% miedykaŭ. Kali jość siamja, šmat chto zaraz prymaje rašeńnie syści z pracy i zastacca doma na haspadarcy, čym sutkami siadzieć na pracy ŭ niebiaśpiečnych dla žyćcia umovach za 500 rubloŭ», — raskazała nam miedyk z Baranavičaŭ.
Jak minimum, kožnaja dzieviataja vakansija ŭ krainie — dla miedycynskich śpiecyjalistaŭ
Usiaho na dadzieny momant u respublikanskim banku vakansij my znajšli 98 830 svabodnych pracoŭnych miescaŭ.
Na pasadu «urač» šukali 4429 čałavieka. Zarobak miedykam prapanoŭvali ad 465 rubloŭ (takija hrošy za poŭnuju pracoŭnuju staŭku płociać u Škłoŭskaj śpiecškole — internecie) da 1200 rubloŭ (na hetyja hrošy moža raźličvać urač-psichaterapieŭt u Bresckim abłasnym ankadyspansiery).
Vakansij z zarobkam vyšej za 2000 rubloŭ usiaho 10. I bolšaść ź ich — heta vieterynarnyja daktary. Bolš za 3000 hatovy płacić taksama vieterynarnamu doktaru ŭ vioscy Znamienka Bresckaha rajona.
Tradycyjna bolš za ŭsio daktaroŭ nie chapaje ŭ Minsku — tam 831 vakansii, dalej u Bresckaj vobłaści — 778 vakansii, u Homielskaj — 709 (heta samaja vialikaja vobłaść Biełarusi), u Minskaj — 598, Mahiloŭskaj — 572, u Hrodzienskaj — 568 (samaja maleńkaja pa terytoryi vobłaść Biełarusi), u Viciebskaj — 376.
Taksama ŭ bazie jość 1057 vakansij dla fielčaraŭ z zarobkam 450-900 rubloŭ za cełuju pracoŭnuju staŭku.
Na pasadu «miedycynskaja siastra-śpiecyjalist» šukajuć 2821 čałaviek. Zarobak vahajecca ad 475 da 1000 rubloŭ. Jašče jość 806 miescaŭ łabarantaŭ za 400-700 rubloŭ u miesiac i 405 pamočnikaŭ daktaroŭ za 480-1150 rubloŭ na poŭnuju pracoŭnuju staŭku.
Patrabujecca i 1762 sanitara z zarobkam u 400-1100 rubloŭ, a taksama 329 farmaceŭtaŭ za 560-1100 rubloŭ u miesiac i 52 vakansii miedycynskaha rehistratara z zarobkam u 400-1200 rubloŭ.
Zrazumieła, heta nie ŭsie vakansii ŭ śfiery miedycyny. Ale navat tych, jakija my znajšli, u ahulnaj kolkaści naličyli bolš za 11 tysiač. Atrymlivajecca, što navat pa samych ścipłych padlikach kožnaja dziaviataja vakansija ŭ krainie — heta vakansija dla śpiecyjalistaŭ u śfiery miedycyny.
«Miedykaŭ nie chapaje nastolki, što mnohija pracujuć na 1,5 staŭki i ŭsio roŭna vymušany zatrymlivacca na pracy pa 1,5-2 hadziny, kab paśpieć pryniać usich pacyjentaŭ. Ale navat niahledziačy na heta, nie paśpiavajuć, — raskazała miedyk adnoj sa staličnych paliklinik z 20-hadovym pracoŭnym stažam. — Pry hetym mnohija jašče nie zvolnilisia tolki tamu, što vyrašyli dapracavać da zakančeńnia pracoŭnaha kantraktu.
Šmat chto z maładych śpiecyjalistaŭ adpracoŭvajuć raźmierkavańnie i potym źbirajucca sychodzić z prafiesii albo aktyŭna šukajuć pracu ŭ pryvatnych klinikach Biełarusi ci za miažoj. Heta značyć, što ŭ bližejšyja hady situacyja ŭ miedycynie budzie tolki paharšacca».
Čytajcie taksama:
«My ciabie rychtavali — adpracuj 10 hadoŭ». Łukašenka patrabuje vyrašyć prablemu adtoku miedykaŭ za miažu
