Za abviaščeńnie haładoŭki — dva viadry chłorki na padłohu
Haładoŭku žančyny abvieścili viečieram 3 listapada, kali admovilisia ad viačery:
«Razdatčyca ježy była ŭ šoku, skazała, što haładać my možam tolki kali napišam zajavu. My paśmiajalisia: nam niama čym i nie było na čym było pisać. Ježu nie ŭziali. Tady jana paklikała dziažurnaha i skazała, što my admaŭlajemsia jeści. Dziažurny skazaŭ: «Da p**», — raspaviadaje adna z tych, chto abjaŭlała hadałoŭku.
Užo na nastupnuju ranicu administracyja CIPa rezka adreahavała na pratest žančyn: u kamieru zalili dva viadry chłorki, na padłohu kinuli ich rečy.
«Rastvor chłorki byŭ davoli mocny, nas było 10 ci ŭžo navat 11 čałaviek. «Karmušku» začynili, dychać było składana. Pieršuju pałovu dnia my admyvali chłorku i myli rečy. U 12 prynieśli chleb, ad jakoha my taksama admovilisia.
Raptoŭny špacyr
Paśla hetaha dziaŭčynki vyrašyli pamyć hałovy. Jak tolki adna ź ich raspranułasia, supracoŭniki zalacieli i stali kryčać pra šmon. Pryjšłosia terminova apranacca i vylatać na kalidor. Našy rečy znoŭ raskidali. My viarnulisia ŭ kamieru, prybrali, chacieli znoŭ praciahnuć mycca. I znoŭ (jany ž pa kamierach sočać śpiecyjalna za nami, bo my «kantrolnyja»), jak tolki pačali raspranacca, dźviery adčynilisia i pastupiła kamanda vychodzić biez rečaŭ. My adrazu ž naciahnuli na siabie ŭsiu vopratku.
Nas znoŭ abšmanavali i paviali ŭniz. My padumali, što ŭ karcar. Ale akazałasia, što ŭ «prahułačny dvoryk»: svojeasablivy stakan pamierami z kamieru, ale na vulicy i z kratami «na stoli». Na samaj spravie my byli vielmi rady padychać śviežym pavietram, tym bolš, što amal usie byli ciopła (adnosna) apranutyja, choć adna dziaŭčyna zabyłasia koftu, inšaja była z mokraj hałavoj, a Ała Iljinična (biazdomnaja žančyna) vyjšła biez adzieńnia.
Načalnik CIPa: «Mnie taksama nie padabajecca vas usim zabiaśpiečvać»
My pazajmalisia fizkulturaj, pahladzieli na soniejka, šmat žartavali i śmiajalisia. Potym da nas pryjšoŭ načalnik CIP. Manałoh jaho byŭ prykładna nastupnaha źmiestu:
«Ja hladžu, vy tut žarty adzin adnamu raskazvajecie. Viesieła žyviecca? Nie chočacie jeści, vam niešta nie padabajecca? Mnie taksama nie padabajecca vas usim zabiaśpiečvać. Rana ci pozna nam z vami pryjdziecca rasstacca, u CIPie siadzieć možna da hoda, mnie pochier, chočacie vy abo nie, padumajcie sami, ci vytrymajecie vy heta. Kali pa viartańni adsiul mnie nie spadabajucca vašyja pavodziny, to ŭ kamiery budzie +7°, a pisi-popy budziecie myć doma», — uzhadvaje byłaja aryštantka.
Pahražali pakinuć na vulicy da ranicy, kab zmahli «nahulać apietyt»
Na vulicy žančyn trymali amal hadzinu. Dziažurnyja CIPa pahražali pakinuć žančyn na vulicy da ranicy, kab jany zmahli «nahulać apietyt».
5 listapada ŭ kamiery №15 było piać dahladaŭ. Pa viartańni ŭ kamieru na stale ŭžo stajaŭ abied dla kožnaj z aryštantak:
«Dalej nas pryviali nazad i ŭ kamiery nakryli stoł, ježa była ŭžo rasstaŭlenaja na stale. Na toj momant u nas byli dźvie novyja dziaŭčynki, jakija pieršapačatkova nie składali damovu na haładoŭku, a dva dni i biez hetaha my nie jeli, tamu pryjšłosia admovicca ad dalejšaha płana haładać, ale my byli hatovyja pačać usio nanova. Tualetnuju papieru nam dali, myła taksama. «Dadatkovy» šmon admianili, ale ŭsio astatniaje zastałosia pa-raniejšamu. Kurtki, jakija adabrali padčas «dadatkovaha šmonu» addavali tolki paśla vyzvaleńnia», — kaža adna žančyna.
«Ału Iljiničnu padhavorvali kidać vošaj na našu vopratku»
Jašče adna byłaja haładujučaja dadaje:
«Na volu syšli tyja, chto byŭ ćviorda nastrojeny haładać. Praciahvać haładoŭku ŭdvaich-ŭtroch sensu nie mieła, heta mahło b vyklikać tolki praduziataje staŭleńnie. Tamu niahledziačy na toje, što ad abiedu my (chto za haładoŭku) admovilisia (bolšaja častka dziaŭčynak paabiedali), viačeru my ŭžo ŭziali.
Jak paćvierdžańnie taho, što treba iści da kanca: lepš nie stała, stała horš. Nam nie viarnuli ni asabistych rečaŭ, ni skradzienych srodkaŭ hihijeny i lekaŭ. Nam nie vydali ni papiery, ni myła. Nie viarnuli i viadro, u jakim my razvodzili chłorku i pałaskali pałavyja anučy. Nas usio hetak ža praciahvali budzić pa načach. U subotu 6 listapada nam znoŭ zalili chłorku ŭ kamieru. «Karmušku» pierastali adkryvać naohuł. Kali raniej možna było «dychać» padčas pryjomaŭ ježy, to ciapier, mabyć, vyrašyli, što my možam i nie dychać.
Ału Iljiničnu padhavorvali (tak, kab my pačuli) kidać vošaj na našu vopratku, kraści naš abutak i danosić na nas. Ale Ałačka pa čałaviečych jakaściach lepiej ich budzie, tak što prablem ź joj nie było.
Kali dziaŭčynki paprasili dać viadro dla myćcia padłoh, jany na ranišnim šmonie prosta vysypali śmiećcie ź śmiećcievaha viadra nam na padłohu (brudnaja tualetnaja papiera, brudnyja prakładki, reštki ježy i inšaje) i skazali, maŭlaŭ, voś vam viadro.
Akramia taho, zabrali ŭ nas vienik i savok. Pakinuli tolki śmiardziučy ahryzak vienika, jaki vykarystoŭvajecca jak joršyk, tamu padłohu im padmiatać niemahčyma.
Atrymlivajecca, dziaŭčynki nie mohuć narmalna padmieści padłohu, a kali myjuć, anučy davodzicca pałaskać u rakavinie, a nie ŭ viadry, z-za čaho rakavina pastajanna zabivajecca.
Darečy, pa vychadnych u našaj kamiery zaŭsiody byŭ jak minimum adzin dadatkovy šmon. Imknucca vybirać čas, kali chtości myjecca abo ŭ prybiralni.
Heta ŭ ich hulnia takaja. Žart. Śmiešna».
Pa słovach dziaŭčyny, u aŭtorak, 9 listapada, aryštantkam kamiery №15
upieršyniu za dva tydni dali rułon tualetnaj papiery i kavałak myła.
«Na žal, mnohija dziaŭčynki ličać heta prajavaj taho, što supracoŭniki «pajšli na miravuju», tamu što ich nie bjuć, nie katujuć, i na 12 čałaviek u kamiery jość až čatyry staryja brudnyja zubnyja ščotki», — kaža dziaŭčyna.
Chvoruju na COVID-19 kinuli ŭ karcar na dva dni na «karancin»
«Da nas zakinuli dziaŭčynku. Jana była na balničnym dvanaccaty dzień. Kali jana skazała pra heta supracoŭnikam pry «pryjomie», to miedyk nie chacieła jaje brać, ale dziažurny zahadaŭ afarmlać. Tak jaje adpravili ŭ karcar na dva dni. Kali jana pryjšła da nas, to była rada, što ŭ nas ciapło, i što jana siarod ludziej. Biednaja, źmierzła i stamiłasia adna tam siadzieć. Łožak tam adšpilvaŭsia ad ściany tolki z 22 da 6. U karcary choładna i niama haračaj vady. Nie davali ničoha tudy: ni papieru, ni myła, tolki ježa. Z mebli — kresła i maleńki stolik. Heta dobra, što joj užo na toj momant było lepš», — raspaviadaje byłaja aryštantka pra sukamiernicu.
Na 10 kvadratnych mietraŭ — 10 žančyn
Pry «pryjomie» ŭ CIP žančyna prajšła praz try pracedury: afarmleńnie; ahlad, padčas jakoha raspranajuć da majtkoŭ i abmacvajuć, i treba prysieści dva-try razy, spuściŭšy majtki da kalena. Paśla hetaha jaje źmiaścili na adnu hadzinu ŭ «stakan». Potym žančynu pryviali ŭ dvuchmiesnuju kamieru №15, dzie na 10 kvadratnych mietraŭ byŭ tualet, dva łožki i dzieviać žančyn. Jaje pryviali paśla abiedu, jaki jana prapuściła praz «afarmleńnie», tamu nastupny raz joj udałosia pajeści tolki padčas viačery.
Čym kormiać na Akreścina?
«Za 14.50 rubloŭ u sutki, ty atrymlivaješ šeruju kašu try razy na dzień, dva razy niejkija niezrazumiełyja katlety i zialony, salony pamidor, kavałak marynavanaha ahurka, abo kvašanuju kapustu. Adzin raz u tydzień na abied bulbianoje piure. Ranicaj dajuć harbatu i na abied kisiel ci kampot».
Pry hetym, administracyja CIPa praciahvaje zabirać hrošy ŭ aryštavanych z asabistych rečaŭ u lik apłaty za charčavańnie. Paśla vyzvaleńniam čałavieku na ruki vydajuć ček za apłatu za charčavańnie za ŭvieś termin aryštu, u jakim užo vyličyli kanfiskavanuju sumu. A ź niadaŭniaha času tych, kaho zatrymlivajuć doma paśla pieratrusu, prymušajuć brać z saboju ŭ RUUS usie najaŭnyja hrošy z doma i navat nie ŭpisvajuć ich u pratakoł.
Tym, chto haładaŭ u kamiery, vystavili rachunki za ježu za ŭsie dni biez vyklučeńniaŭ.
Jak śpiać žančyny ŭ dvuchmiesnaj kamiery?
«Adboj u 22:00. Ulehčysia na noč — toj jašče kvest. Dźvie žančyny na łožku biez matracaŭ, tamu im treba maksimum pad sabie rečaŭ padkłaści. Ale na padłohu nie va ŭsich jość, što padkłaści. Tak i spali na hołych doškach, a kali adkryta «karmuška», to tym chto bližej da dźviarej było vielmi choładna. Dziažurnamu lanota začynić heta praklataje akienca, jakoje adkryć dniom nie dapytaješsia. Da ŭsiaho hetaha haryć śviatło, darečy, haryć jano 24/7. A ŭ 2:00 i 4:00 nočču budziać na pierakličku. Usie pavinny ŭstać na nohi i nazvać svaje proźvišča, imia i imia pa baćku. A 6 ranicy padjom», — raspaviadaje adna z žančyn, jakuju ŭtrymlivali ŭ «palityčnaj» kamiery №15.
