«Ja pravioŭ telefonnuju razmovu paśla abmierkavańnia Biełarusi na pasiadžeńni Rady ES [na ŭzroŭni kiraŭnikoŭ MZS u Brusieli]. Ja zaklikaŭ da terminovych dziejańniaŭ, kab adnavić paradak u pamiežnym rajonie Biełarusi i JeC i raźviazać ciažkuju humanitarnuju situacyju asob, jakija zatrymalisia ŭ hetaj zonie», — napisaŭ Barel u Twitter.
Na sustrečy ŭ paniadziełak kiraŭniki MZS ES pryniali pastanovu ab uviadzieńni piataha błoka sankcyj suprać Biełarusi i ŭzhadnili stvareńnie novaha sankcyjnaha miechanizmu dla avijakampanij, turahienctvaŭ i fizičnych asob, adkaznych za pieravozku mihrantaŭ u Biełaruś.
Ab hetaj telefonnaj razmovie taksama paviedamiła MZS Biełarusi. Pavodle zajavy pres-słužby MZS, Makiej «davioŭ da surazmoŭcy infarmacyju pa ŭzmacnieńni žorstkaści mihracyjnaha režymu ŭ Biełarusi». «Asobna akcentavaŭ surjoznyja namahańni biełaruskaha boku pa zabieśpiačeńni mihrantaŭ humanitarnaj dapamohaj», — havaryłasia ŭ paviedamleńni. U im adznačałasia, što biełaruski ministr «paćvierdziŭ nacelenaść Biełarusi na sumiesny pošuk šlachoŭ vyrašeńnia najaŭnych prablem, uklučajučy bolš chutkaje ŭrehulavańnie mihracyjnaha kryzisu».
Pry hetym była padkreślena pryncypovaja pazicyja biełaruskaha boku ab «nieprymalnaści sankcyj jak instrumientu palityki ŭ dačynieńni da suvierennaj i niezaležnaj dziaržavy, ich niehatyŭnych nastupstvach jak dla dvuchbakovych adnosin, tak i dla rehijanalnaj stabilnaści i biaśpieki ŭ cełym».
U zajavie adznačałasia, što pa pytańniach humanitarnaj dapamohi biežancam biełaruski bok uzajemadziejničaje z hramadskimi i mižnarodnymi arhanizacyjami, uklučajučy ŭpraŭleńnie Viarchoŭnaha kamisara AAN pa spravach biežancaŭ, Mižnarodnuju arhanizacyju pa mihracyi, Mižnarodny dziciačy fond, Biełaruskaje tavarystva Čyrvonaha Kryža i paŭmiesiaca.
Baki damovilisia ab praciahu kantaktaŭ pa linii Biełaruś — ES.
