10 śniežnia deputaty prahałasavali za pačatak pracedury vychadu Respubliki Sierbskaj z baśnijskaj armii, słužbaŭ biaśpieki, padatkovaj i sudovaj sistemy.
Jany taksama prahałasavali za dekłaracyju, jakaja zaklikaje da raspracoŭki novaj Kanstytucyi Respubliki Sierbskaj, jakaja budzie adznačać, što «ŭsie zakony, uviedzienyja mižnarodnym vysokim pradstaŭnikom Bośnii, źjaŭlajucca «niekanstytucyjnymi».
Bośnija i Hiercahavina ŭ jaje ciapierašnim vyhladzie — tvareńnie Dejtanskich mirnych pahadnieńniaŭ 1995 hoda, padpisanych Bośnijaj, Charvatyjaj i Sierbijaj pry pasiarednictvie zachodnich krain i Rasii. U ramkach pahadnieńnia ŭ składzie šmatnacyjanalnaj Bośnii i Hiercahaviny, nasielenaj baśniakami, sierbami i charvatami, stvaryli dva aŭtanomnyja dziaržaŭnyja ŭtvareńni: Respubliku Sierbskuju i Baśnijska-charvackuju Fiederacyju. Z adnaho boku, pahadnieńni spynili krovapralitnuju vajnu ŭ rehijonie.
Ź inšaha boku, Bośnija i Hiercahavina maje składany i supiarečlivy dziaržaŭny ład, z-za jakoha kraina znachodzicca ŭ stanie piermanientnaha kryzisu i zastajecca adnoj z najbiadniejšych krain Jeŭropy. Adnym sa sposabaŭ vyrašeńnia prablem Bośnii i Hiercahaviny mahła b stać jeŭraintehracyja, adnak niežyćciazdolnaje kiravańnie i ŭnutranyja palityčnyja supiarečnaści robiać heta małavierahodnym ŭ bližejšaj pierśpiektyvie. Bośnija i Hiercahavina, u adroźnieńnie ad svaich bałkanskich susiedziaŭ, tak i nie prasunułasia ŭ reformach, jakija dazvolili b joj nablizicca da ES. Takim čynam, Dejtanskija pahadnieńni spynili vajnu, ale jany nie padychodziać ŭ ciapierašnim vyhladzie dla raźvićcia dziaržavy ŭ mirny čas.
Adnak mižnarodnaja supolnaść aścierahajecca, što kali mirnaje pahadnieńnie, jakoje zaviaršyła vajnu 1992-95 hadoŭ, budzie razburana, to heta pastavić pad pahrozu rehijanalnuju stabilnaść.
Lidar baśnijskich sierbaŭ Miłarad Dodzik, pradstaŭnik Respubliki Sierbskaj u kirujučym orhanie BiH, nieadnarazova pahražaŭ vyjści ź instytutaŭ dziaržaŭnaha ŭzroŭniu, apisvajučy Bośniju jak «ekśpierymient mižnarodnaj supolnaści» i «niemahčymuju naviazanuju krainu».
Na praciahu mnohich hadoŭ Dodzik vystupaŭ za adździaleńnie Respubliki Sierbskaj i za toje, kab jana stała častkaj susiedniaj Sierbii.
