Pra adstaŭku Lidzija Jarmošyna kazała daŭno: jašče vybary 2015 hoda nazyvała dla siabie apošnimi. Ale paśla praviała i vybary 2020 hoda.
U śniežni 2021-ha ŭ jaje zakančvajecca kantrakt, i raniej u ŚMI Jarmošyna kazała, što hatovaja papravacać jašče ŭ vypadku vostraj nieabchodnaści:
«Jość momanty, kali, mahčyma, mianie paprosiać na niejki pierachodny pieryjad, moža, na pieryjad praviadzieńnia refierendumu časova papracavać. I, naturalna, ja nie zmahu skazać «nie», — rastłumačyła Jarmošyna.
Ale, jak my bačym siońnia, jaje ŭsio ž nie paprasili i adpuścili.
«Vybary 2020 hoda Jarmošyna praviała jak maje być, niahledziačy na łakalnyja sumlennyja kamisii. Mienavita da jaje pretenzij i niedavieru być nie mahło, tak što jaje sychod — prosta zakanamiernaja reč», — ličyć Arciom Šrajbman.
Arciom Šrajbman
Prychod na pasadu staršyni CVK Karpienki analityk źviazvaje z paćvierdžańniem taho, što nijakich demakratyčnych reform, źviazanych z vybarami, biełarusam pakul nie dačakacca.
«Karpienka — absalutna łajalny, sistemny čałaviek. Heta było bačna pa jaho pracy ŭ Ministerstvie adukacyi. Jak kamunist, jon dakładna nie budzie padyhryvać «buržuaznaj apazicyi». Łukašenku składana było znajści ŭ dziaržaŭnym aparacie bolš łajalnych ludziej, čym Karpienka. Tamu nie baču ŭ jaho pryznačeńni siurpryzaŭ. Heta pakazvaje pierajemnaść, dakazvaje, što Łukašenka nijakich reformaŭ, źviazanych z sumlennymi vybarami, dakładna nie płanuje».
U vypadku pryniaćcia novaj Kanstytucyi płanujecca, što kandydaturu staršyni CVK budzie zaćviardžać Usiebiełaruski narodny schod, jana budzie vynosicca na hałasavańnie. Tamu pakul pasada Karpienki vyhladaje jak pierachodnaja. Ale na hety momant usio adno nieviadoma, ci budzie jana pryniataja i jak chutka nabudzie moc.
Čaho čakać ad Karpienki najbližejšym časam? Na dumku analityka — praciahu padychodaŭ da pracy ŭ styli Jarmošynaj.
«Na pasadzie ministra adukacyi Karpienku byli padnačalenyja členy vybarčych kamisij — nastaŭniki — i kiraŭniki centrvybarkamaŭ — dyrektary škoł. Ën, pa sutnaści, źjaŭlaŭsia čałaviekam ź blizkaj śfiery kampietencyj. Tak što ŭ Centrvybarkamie siurpryzaŭ nie čakajecca: usio budzie pracavać jak minimum na raniejšym uzroŭni».
