Getty Images
U prysudzie havorka idzie ab pastaŭkach praduktaŭ charčavańnia rasijskim vajskoŭcam, jakija znachodziacca na ŭschodzie Ukrainy. Abvinavačanym pa spravie prachodziŭ Viačasłaŭ Zabałujeŭ — rehijanalny mieniedžar kampanii «Technałohija», jakaja źjaŭlajecca pastaŭščykom Uzbrojenych sił Rasii.
Jon źjaŭlaŭsia pasiarednikam pry pieradačy chabaru pamiž kiraŭnictvam rehijanalnaha pradstaŭnictva «Technałohii» i hałoŭnym sanitarnym uračom centra sanepidemnahladu Paŭdniovaj vajennaj akruhi. Zabałujeŭ pryznaŭ vinu i ŭ svaich pakazańniach raspavioŭ, jak ažyćciaŭlalisia pastaŭki praduktaŭ u častki rasijskich uzbrojenych sił, dysłakavanych u tak zvanych «DNR»i « ŁNR».
Padčas suda abvinavačany zajaviŭ, što pastaŭki ažyćciaŭlalisia adzin raz na dva tydni kałonami z «bolš čym 70 mašyn hruzapadymalnaściu kala 40 ton i ahulnym abjomam bolš za 1300 ton», u jakich znachodzilisia muka, kansiervy i śviežaja harodnina.
Košt adnoj pastaŭki pieravyšaŭ 130 młn rasijskich rubloŭ (4 młn biełaruskich), hetaha dastatkova, kab zabiaśpiečyć charčavańniem kala 25 tysiač čałaviek. Akramia taho, u pastanovie suda sa spasyłkaj na pakazańni fihuranta havorycca, što kiroŭcaŭ praviaraŭ pierad rejsam «rasijanin u zvańni majora».
U Kramli abvierhli hetuju infarmacyju. Rasijskija vajskoŭcy nie znachodzilisia i nie znachodziacca na ŭschodzie Ukrainy, zajaviŭ u čaćvier pres-sakratar prezidenta RF Dźmitryj Piaskoŭ.
«Napeŭna, havorka idzie pra pamyłku tych, chto pisaŭ hety tekst. Bo heta niemahčyma, nijakich Uzbrojenych sił RF na terytoryi samaabvieščanych respublik nie było i niama. Uzbrojenyja siły RF — na terytoryi RF», — skazaŭ Piaskoŭ.
Adnačasova pradstaŭnik Kramla dadaŭ, što Rasija pastaŭlaje humanitarnuju dapamohu ŭ samaabvieščanyja « DNR «i»ŁNR».
