Džo Bajden padčas razmovy z Pucinym. Fota Biełaha doma.
Pavodle aficyjnaha paviedamleńnia Biełaha doma, «prezident Bajden zaklikaŭ Rasiju da deeskałacyi napružanaści ŭ adnosinach z Ukrainaj. Jon jasna daŭ zrazumieć, što Złučanyja Štaty i ich sajuźniki i partniory buduć rašuča reahavać, kali Rasieja praciahnie ŭvarvańnie va Ukrainu. Prezident Bajden taksama vykazaŭ padtrymku dypłamatyi, pačynajučy z pačatku nastupnaha hoda z dvuchbakovaha dyjałohu pa stratehičnaj stabilnaści, z udziełam NATO praz Saviet Rasija—NATO i Arhanizacyju pa biaśpiecy i supracoŭnictvu ŭ Jeŭropie. Prezident Bajden paćvierdziŭ, što istotny prahres u hetych dyjałohach moža adbycca tolki va ŭmovach deeskałacyi, a nie eskałacyi».
Rasijski bok robić akcent na toje, što «hałoŭnaj temaj hutarki stali pytańni realizacyi dasiahnutaj padčas videakanfierencyi 7 śniežnia damoŭlenaści ab zapusku pieramoŭ pa nadańni jurydyčnych harantyj zabieśpiačeńnia biaśpieki Rasii». Maŭlaŭ, «vynikam sumiesnaj pracy pavinny stać ćviordyja pravavyja harantyi, jakija vyklučajuć prasoŭvańnie NATO na ŭschod i raźmiaščeńnie pahražalnych sistem uzbrajeńnia ŭ niepasrednaj blizkaści ad rasijskich miežaŭ». Mahčymyja maštabnyja antyrasijskija sankcyi z boku ZŠA Pucin acaniŭ jak «surjoznuju pamyłku, jakaja faktyčna pahražaje poŭnym razryvam rasijska-amierykanskich adnosin».
Heta byli ŭžo druhija pieramovy amierykanskaha i rasijskaha lidaraŭ za miesiac. 7 śniežnia jany razmaŭlali pa videasuviazi kala dźviuch hadzin. Tady abmiarkoŭvałasia pieradusim situacyja vakoł Ukrainy.
Pucin i Bajden dźvie hadziny havaryli pa videasuviazi
