Fota Getty Images.

Fota Getty Images.

Śledčyja kažuć, što staršy bortpravadnik United Airlines dva dziesiacihodździ vydavaŭ siabie za chłopca z Atłanty, jaki pamior u 1979 hodzie. Urešcie jon pryznaŭsia fiederalnym ahientam, što jaho sapraŭdnaje imia Rykarda Siezar Huedes i jon brazilec. U 49-hadovaha mužčyny dom na voziery Chjustan, BMW, praca, usio pad imiem Uiljama Eryksana Łeda. Jak heta stała mahčymym i dla čaho heta było?

Huedes paśpiachova adpracavaŭ u United Airlines dva dziesiacihodździ, dyk jak ža jaho złavili? U śniežni 2020 hoda Huedes čarhovy raz padaŭ pašpart na zamienu, i ŭpieršyniu čynoŭniki pašpartnaha stała zaŭvažyli «roznyja prykmiety machlarstva», pačałosia rasśledavańnie, spačatku tajemnaje.

U lipieni 2021 hoda źviazalisia z maci Łeda, jakaja ŭpieršyniu daviedałasia, što niechta vykarystoŭvaje asobu jaje pamierłaha syna. Maci pamierłaha dziciaci Debra Hryn paćvierdziła, što jaje chłopčyk byŭ pachavany niekalki dziesiacihodździaŭ tamu. I jana nie mahła pryhadać, ci paśpieli jamu nadać numar sacyjalnaha strachavańnia.

Čynoŭniki kažuć, što Huedes padoŭžyŭ svaju turystyčnuju vizu i pačaŭ karystacca kartkaj sacyjalnaha strachavańnia ad imia dziciaci z Džordžyi praz 17 hadoŭ paśla śmierci Łeda. Paśla taho jon atrymaŭ kupu dakumientaŭ na imia Łeda: jon šeść raz mianiaŭ pašpart i navat abhruntavaŭ zajaŭku na dazvoł na žycharstva dla svajoj partniorki, paviedamlaje Paddle Your Own Kanoo.

Tolki kali jon niadaŭna čarhovy raz mianiaŭ pašpart, čynoŭniki naściarožylisia. Pa-pieršaje, numar sacyjalnaha strachavańnia byŭ nadadzieny jamu ŭ 1996 hodzie, praz 22 hady paśla naradžeńnia Łeda. Pa-druhoje, isnavała paśviedčańnie ab śmierci, zhodna ź jakim Uiljam Eryksan Łed pamior u 1979 hodzie. Data naradžeńnia ŭ hetym paśviedčańni śmierci supadała z dataj naradžeńnia, ukazanaj u zajavie Łeda na zamienu pašparta.

Dyk chto ž toj čałaviek, jaki padavaŭ napoi i sačyŭ za biaśpiekaj pasažyraŭ na rejsach u Niderłandy, Arhiencinu, Braziliju, Čyli, Ekvador i Pieru?

Zhodna z materyjałami suda, adbitki palcaŭ, jakija ściuard zdavaŭ u United, adpaviadali čałavieku, jaki naradziŭsia ŭ siamji Huedes u San-Paŭłu ŭ 1972 hodzie.

Fatahrafii Łeda pakazali členam siamji ŭ Brazilii. Maryja Aksilijadora Duarte Huedes paviedamiła fiederalnym ahientam Słužby dypłamatyčnaj biaśpieki ZŠA ŭ Brazilii, što jana nie viedaje nikoha pa imieni Uiljam Eryksan Łed. Ale ŭ jaje byŭ syn u Brazilii. A adbitki palcaŭ, jakija jaje syn zdavaŭ u svoj čas dla brazilskich dakumientaŭ, supadali z adbitkami palcaŭ Łeda.

Na pieršym dopycie Huedes-Łed nazvaŭ siabie Uiljamam Eryksanam Łedam. Čynoŭnik papiaredziŭ jaho, što chłuśnia jamu źjaŭlajecca fiederalnym złačynstvam. Tady Huedes skazaŭ, što naradziŭsia ŭ Złučanych Štatach, ale byŭ vychavany baćkami-misijanierami ŭ Brazilii.

Zatym čynoŭnik paviedamiŭ jamu, što va ŭrada jość paśviedčańnie śmierci Uiljama Eryksana Łeda. Tady Huedes zmoŭk.

Čynoŭnik pakazaŭ Huedesu fota mahiły sapraŭdnaha Uiljama Eryksana Łeda ŭ Ałabamie. 

Huedesa aryštavali ŭ aeraporcie Chjustana (IAH). Fiederalnyja ahienty čakali, pakul jon projdzie praz kantrolna-prapuskny punkt dla členaŭ ekipažaŭ (jany pa svaich dakumientach traplajuć u biaśpiečnuju častku aeraporta bieź nieabchodnaści prachodžańnia praz achovu).

Ahienty kažuć, što, kali jaho aryštoŭvali, jon skazaŭ: «Ja žyŭ ŭ mroi, ale ciapier kaniec. Zaraz mianie čakaje realnaść».

Ciapier Huedes čakaje suda pa abvinavačvańni ŭ kradziažy asabistych źviestak i vydavańni siabie za hramadzianina ZŠA, iłžyvych pakazańniach u zajaŭcy na pašpart i padmannym uvachodzie ŭ biaśpiečnuju zonu aeraporta. Apošniaje abvinavačańnie było vystaŭlena tamu, što status Rykarda jak bortpravadnika ŭ ZŠA dazvalaŭ jamu abychodzić bolšaść pravierak biaśpieki TSA dziakujučy paznacy «Paćvierdžany člen ekipažu». Sprava razhladajecca ŭ akruhovym sudzie ZŠA Paŭdniovaj akruhi Techasa ŭ Chjustanie — piša Paddle Your Own Kanoo.

Falšyvuju identyčnaść niaredka vykarystoŭvajuć lehiendavanyja ahienty raźviedak. Pakul niama dokazaŭ, što Huedes byŭ adnym ź ich.

Клас
0
Панылы сорам
0
Ха-ха
0
Ого
0
Сумна
0
Абуральна
0