Krainy, dzie chakierskaja hrupa była aktyŭnaj. Heta najpierš krainy pa pierymietry Biełarusi, ale nie Rasija. U samoj Biełarusi abjektami atak byli tolki niezaležnyja ŚMI i dziejačy apazicyi. Siarod abjektaŭ dziejnaści hrupoŭki była i Kałumbija — kraina, što kanfliktuje ź Vieniesuełaj, kiraŭnictva jakoj maje ciesnyja adnosiny z łukašenkaŭcami.
Na praciahu apošnich čatyroch hadoŭ chakierskaja i dezynfarmacyjnaja hrupa, viadomaja jak Ghostwriter / UNC1151, atakavała krainy Uschodniaj Jeŭropy i Bałtyi. Apošniaje, u čym jaje abvinavacili — ataka na ŭradavyja sajty i elektronnyja ŭkrainskija servisy. Raniej usie dumali, što Ghostwriter — čarhovaja kampanija z Maskvy, uličvajučy mietady hrupy, a taksama antynataŭskija i antyamierykanskija naratyvy. Jak akazałasia, heta nie zusim tak. Pavodle amierykanskaj firmy Mandiant, jakaja zajmajecca kibierbiaśpiekaj, chakiery z Ghostwriter / UNC1151 pracujuć na biełaruskija ŭłady.
Mandiant upieršyniu praanalizavała dziejnaść Ghostwriter u lipieni 2020 hoda. U toj čas hrupa zajmałasia raspaŭsiudžvańniem fejkavych navin i navat uzłomam realnych navinavych sajtaŭ dla ich raźmiaščeńnia.
U krasaviku 2021 hoda Mandiant pryjšła da vysnovy, što Ghostwriter viadzie bolš šyrokuju dziejnaść, uklučajučy ŭzłom akaŭntaŭ čynoŭnikaŭ u sacyjalnych sietkach dla raspaŭsiudžvańnia dezynfarmacyi. Hrupa doŭhi čas była skancentravanaja na padryvie roli NATA va Uschodniaj Jeŭropie i imknułasia raspalić niestabilnaść u Polščy, Ukrainie, Litvie, Łatvii i Hiermanii.
Amierykanskija śpiecyjalisty pa kibierbiaśpiecy ŭbačyli, što chakiery z hetaj hrupy ŭsio čaściej pačali vyrašać zadačy, źviazanyja ź Biełaruśsiu. Ataki na biełaruskich dysidentaŭ, ŚMI i žurnalistaŭ z boku Ghostwriter vyhladajuć tak, jak byccam jany pravodziacca ŭ intaresach biełaruskich uładaŭ. Chacia chakierskaja hrupa śpiecyjalizavałasia na Uschodniaj Jeŭropie, jana nikoli nie atakavała biełaruskija dziaržaŭnyja struktury, a voś žurnalistaŭ, demakratyčnych dysidentaŭ i aktyvistaŭ ź Biełarusi atakavała.
Siarod tych, chto ŭ pieršaj pałovie 2021 hoda atrymaŭ papiaredžańnie ad Google: «My ličym, što chakiery, źviazanyja z uradam, sprabujuć zdabyć vaš parol» — byli i dva redaktary «Našaj Nivy».
Adnak ich paštovyja skrynki na Gmail złamyśniki ŭskryć nie zmahli.
«My fiksujem takija sproby vielmi redka», — havaryłasia ŭ apaviaščeńniach «Huhła» z rekamiendacyjami, jak uzmacnić abaronienaść akaŭnta.
U ramkach svaich apieracyj chakiery padrablali veb-sajty, takija jak Facebook, Google i Twitter, dla kradziažu ŭlikovych danych, a taksama sajty dziaržaŭnych ustanoŭ u piaci krainach.
U Mandiant taksama znajšli techničnyja dokazy taho, što chakiery znachodziacca ŭ Minsku, i što jany mohuć być źviazanyja ź biełaruskim vojskam.
Paśla prezidenckich vybaraŭ 2020 hoda 16 z 19 dezinfarmacyjnych apieracyj Ghostwriter byli suprać Litvy i Polščy, dźvie byli suprać NATA, a adna — suprać ES.
Niekalki razoŭ chakiery prasoŭvali fejki ab karupcyi i skandałach va ŭradzie Litvy, Polščy i NATA. Inšyja kampanii Ghostwriter prasoŭvali fejki pra toje, što biełaruskich pratestoŭcaŭ kaardynavali zachodnija krainy.
Zdavałasia b, antynataŭskija naratyvy charakternyja nie tolki dla Biełarusi, ale i dla Rasii. Adnak kampanii chakieraŭ byli nakiravanyja ŭ pieršuju čarhu suprać krain, jakija miažujuć ź Biełaruśsiu. Admietna, što Ghostwriter nie zasiarodziŭsia na Estonii — adzinaj krainie Bałtyi, jakaja nie miažuje ź Biełaruśsiu.
Siarod abjektaŭ dziejnaści hrupoŭki była i Kałumbija — kraina, što kanfliktuje ź Vieniesuełaj, kiraŭnictva jakoj maje ciesnyja adnosiny z łukašenkaŭcami.
Taksama amierykanskija śpiecyjalisty adznačajuć, što Ghostwriter čaściej fakusujecca na abaronnych viedamstvach, što moža kazać ab tym, što chakierskaja hrupa zajmajecca ŭ pieršuju čarhu vajennaj raźviedkaj. Kampanii byli nakiravanyja, u tym liku, suprać ukrainskich i francuzskich vajskoŭcaŭ.
Ataki Ghostwriter nie źjaŭlajucca technična vielmi składanymi, kažuć daśledčyki, ale hrupa maje całkam niezaležnuju strukturu, ułasnuju infrastrukturu i vykarystoŭvaje ŭłasnyja škodnasnyja prahramy, a nie ahulnadastupnyja instrumienty.
Chacia raniej ličyłasia, što Ghostwriter heta rasijskija chakiery, a daśledčyki ciapier abvinavačvajuć biełaruskija ŭłady, u Mandiant ličać, što hetyja dźvie viersii nie supiarečać adna adnoj.
Pamiž Biełaruśsiu i Rasijaj isnuje palityčny sajuz, i Rasija ŭ niekatorych momantach moža dapamahać biełaruskim chakieram, asabliva ŭ pytańniach, jakija majuć ahulny intares dla aficyjnych Maskvy i Minska.
Admietna, što niekalki dzion tamu va ŭkrainskaj Radzie nacyjanalnaj biaśpieki i abarony hetuju chakierskuju hrupu abvinavacili ŭ kibieratacy na ŭkrainskija ŭradavyja sajty i servisy.
Čytajcie taksama:
Kijeŭ: Za kibieratakaj na Ukrainu stajać chakiery, źviazanyja z raźviedkaj Biełarusi
«Bojciesia i čakajcie horšaha». Chakiery atakavali ŭkrainskija ŭradavyja sajty i partał dziaržpasłuh «Dija»
