U našaj krainie zamiery biespracoŭja pa kryteryjach Mižnarodnaj arhanizacyi pracy (MAP) pravodziać čatyry razy na hod — u lutym, mai, žniŭni i listapadzie. Pa mietodycy, zasnavanaj na padychodach MAP, biespracoŭnym pryznajecca čałaviek, jaki znachodzicca va ŭzroście ad 15 da 74 hadoŭ, aktyŭna šukaje pracu i hatovy prystupić da jaje ŭ bližejšy čas, paviedamlajuć banki24.by.
Ctan pošuku pracy i hatoŭnaść prystupić da jaje vyznačajecca sa słoŭ samoha respandenta. Hety padychod da biespracoŭja ŭžyvajecca ŭ bolšaści krain śvietu i daje vyniki, jakija možna paraŭnoŭvać pamiž saboj.
Radykalna inšyja vyniki daje administracyjny ŭlik biespracoŭja.
Naprykład, u Biełarusi na kaniec listapada 2021-ha znachodzilisia na ŭliku biespracoŭnych usiaho 6,2 tys. čałaviek.
Dziaržaŭnyja orhany pa pracy, zaniataści i sacyjalnaj abaronie aceńvali taki ŭzrovień biespracoŭja tolki ŭ 0,1%.
Paraŭnajcie: biespracoŭje pa kryterach MAP u Biełarusi za listapad-2021 skłała 188,9 tys. čałaviek — u 30 razoŭ vyšej, čym pry administracyjnym uliku.
Uzrovień biespracoŭja adnosna ŭsioj pracoŭnaj siły skłaŭ 3,8% (pavodle Biełstata).
Takaja vialikaja roźnica tłumačycca tym, što biespracoŭny pa kryteryjach sacyjalnaj abarony pavinien samastojna pryjści ŭ orhany pracy i sacyjalnaj abarony, zarehistravacca tam i rehularna prychodzić na hramadskija pracy.
Dapamoha pa biespracoŭi ŭ Biełarusi małaja — zvyčajna heta 1-2 bazavyja vieličyni.
Orhany sacyjalnaj abarony pryznajuć biespracoŭnymi nie 100% tych, chto źviarnuŭsia, isnuje adsieŭ. Dy i paśla čałaviek moža być pazbaŭleny statusu biespracoŭnaha pa tych ci inšych pryčynach. Patencyjnych suiskalnikaŭ statusu pałochaje i nizkaja dapamoha, jakaja daloka ad jeŭrasajuzaŭskich standartaŭ. Adsiul stabilna nizkaja statystyka administracyjnaha ŭliku.
Zhodna z zamierami pavodle kryteraŭ MAP, siaredni ŭzrost biespracoŭnych dasiahnuŭ 38,8 hoda.
U ahulnaj kolkaści biespracoŭnych moładź va ŭzroście 16-30 hadoŭ skłała 61,5 tys. čałaviek, abo 32,5% (kala traciny ad usich). Siaredni čas pošuku pracy ŭ biespracoŭnych skłaŭ 7,5 miesiaca.
Kožny piaty biespracoŭny (kala 20,2%) šukaŭ pracu bolš za hod — heta praciahłaje biespracoŭje.
