Fota: globallookpress.com
Prykładna z 2006 hoda Kvaljarełu pieraśledavaŭ nieviadomy. Futbalist atrymlivaŭ listy z pahrozami. Da jaho kalehaŭ pa kłubu «Napali», dzie tady hulaŭ Fabia Kvaljareła, prychodzili dziŭnyja esemeski pra jaho: nibyta Kvaljareła — piedafił, užyvaje kakain i źviazany z mafijaj, piša onet.pl.
Vyjaviłasia, što nieviadomy złačyniec — heta siabar futbalista, były palicejski Rafael Pikała.
Spačatku Pikała pavinien byŭ prosta razabracca ź miesendžaram hulca, jaki niechta ŭzłamaŭ. Ich ahulny znajomy Džulia De Ryza atrymlivaŭ ad nieviadomaha paviedamleńni z pahrozami. Paźniej złačyncy pačali pahražać i Fabia Kvaljarełu. Futbalist paprasiŭ Rafaela Pikała vyrašyć hetaje pytańnie.
Ź ciaham času palicejski zavajavaŭ davier zorki. Kvaljareła pačaŭ pravodzić usio bolš času razam z novym siabram. Jon abiacaŭ Fabia vyrašyć pytańnie sa złačyncam, padtrymlivaŭ jaho, ale zabaraniaŭ tamu raskazvać inšym pra pieraśled.
Rafael Pikała rabiŭ vyhlad, što rasśleduje historyju z Fabia, ale jaho rasśledavańnie było fikcyjaj.
Tym časam kolkaść paviedamleńniaŭ usio rasła, Fabia Kvaljareła navat atrymaŭ fota truny sa svajoj vyjavaj u joj.
U hulca pačałasia depresija, prablemy ŭ kłubie, jon vyrašyŭ pierajści ŭ kamandu-kankuretna — turynski «Juvientus». Heta vyklikała šalonuju reakcyju fanataŭ «Napali».
Ale praz ažno piać hadoŭ pieraśledu Pikała zrabiŭ pamyłku, jakaja vyklikała padazreńni ŭ futbalista. Jon pasprabavaŭ zapeŭnić «siabra», što situacyja paharšajecca i što ciapier jon sam atrymlivaje listy dy paviedamleńni z pahrozami. Kali ž hulec paprasiŭ jaho ich pakazać, kab paraŭnać źmiest, Pikała adkazaŭ, što ŭžo ŭsio vydaliŭ.
Tady Kvaljareła vyrašyŭ naniać detektyva, jaki i dapamoh znajści złačyncu. Rafaela Pikała zaŭvažyli, kali jon adpraŭlaŭ paviedamleńni z pahrozami, a ŭ palicyi Nieapala raspaviali, što nie viedajuć ni pra jakoje rasśledavańnie ź jaho boku.
Śledstva doŭžyłasia 5 hadoŭ. U lutym 2017-ha Rafaela Pikała narešcie asudzili na 4 hady i 8 miesiacaŭ źniavoleńnia. Jon tak i nie pryznaŭ svaju vinu.
Što da fanataŭ «Napali», to jany daravali Kvaljarełu sychod z kłuba i navat pryśviacili jamu pieśniu.
