Fota: AFP
«Ja malu Boha, kab jon vyjšaŭ z hetaha kałodzieža cełym», — skazała miascovamu telekanału maci źnikłaha chłopčyka Vasima Charčyč.
Pa paviedamleńniach ratavalnikaŭ, u čaćvier im udałosia apuścić na dno kałodzieža kisłarod i vadu pry dapamozie viaroŭki, piša Bi-bi-si.
«Mnie ŭdałosia pahavaryć ź dziciem, ja spytaŭ, ci čuje jon mianie. Jon adkazaŭ. Ja pačakaŭ kala chviliny i ŭbačyŭ, što jon skarystaŭsia kisłarodam», — raspavioŭ miascovamu ŚMI vałancior Čyrvonaha Kryža i Paŭmiesiaca Imad Fachmi.
Vałanciory taksama apuścili na dno kamieru, kab sačyć za chłopčykam. Niahledziačy na padzieńnie ź vialikaj vyšyni, na kadrach videazapisu vidać, što chłopčyk znachodzicca ŭ prytomnaści, u jaho jość niaznačnyja traŭmy hałavy.
Pry dapamozie piaci buldozieraŭ ratavalniki vykapali jamu hłybinioj 19 mietraŭ paralelna kałodziežu. Zatym jany prakapajuć try mietry pa haryzantali pamiž jamaj i kałodziežam, kab dastać dzicia.
Ratavalnyja pracy ŭskładniaje vuzkaja adtulina kałodzieža, kala 25 santymietraŭ u dyjamietry. Na hłybini bolš 25 mietraŭ hetaja adtulina stanovicca jašče vuziejšaj, tamu papiarednija sproby dabracca da dziciaci byli biespaśpiachovyja.
Na miescy zdareńnia dziažurać daktary i viertalot, jaki dastavić chłopčyka ŭ najbližejšuju balnicu.
Tysiačy ludziej vykazali padtrymku chłopčyku ŭ sacsietkach: chešteh#SaveRayan na praciahu niekalkich hadzin znachodzicca ŭ topie trendaŭ Tvitara ŭ Maroka.