«Ja prybyła ŭ Minsk i chutka prystuplu da svaich funkcyj», - napisała ŭ Twitter Kryścin Choniehier-Załatuchin.
Fota: twitter.com/SwissAmbBelarus
Pasoł padkreśliła, što vyrašalnuju rolu ŭ jaje pryznačeńni adyhrali šmathadovaja rola Šviejcaryi ŭ naviadzieńni mastoŭ i pierakananaść u nieabchodnaści padtrymańnia dyjałohu «na samym vysokim uzroŭni».
Adnym sa svaich pryjarytetaŭ na novaj pasadzie dypłamatka nazvała pytańnie ludziej, pazbaŭlenych voli za realizacyju svaich palityčnych i hramadzianskich pravoŭ. Akramia hetaha, ambasadarka maje namier «naładžvać dyjałoh z šyrokim kołam asob u Biełarusi».
— Ja chacieła b paznajomicca ź Biełaruśsiu va ŭsioj jaje raznastajnaści. Moj asablivy kłopat — znajści šlachi dla dyjałohu ŭ siońniašniaj palityčna napalenaj abstanoŭcy. Ja zrablu ŭsio mahčymaje, kab pracavać nad dalejšym raźvićciom dvuchbakovaha supracoŭnictva ŭ halinach, vyhadnych dla našych krain, — adznačyła dypłamatka u svaim pryvitańni.
Raniej MZS Šviejcaryi zajaŭlała, što rašeńnie ab nakiravańni novaha pasła ŭ Minsk było pryniata paśla ŭvažlivaha razhladu mnohich akaličnaściaŭ:
«Dla Šviejcaryi było važna zastavacca pradstaŭlenaj na samym vysokim uzroŭni ŭ Miensku. Takim čynam, Šviejcaryja moža vykanać svaju tradycyjnuju i pryznanuju rolu ŭ jakaści budaŭnika mastoŭ dla mižnarodnaj supolnaści. Šviejcaryja biarecca za heta ź nieabchodnaj starannaściu i ŭ poŭnaj salidarnaści ź jeŭrapiejskimi kaštoŭnaściami i pryncypami».
Što da ŭručeńnia davierčych hramat Łukašenku, to:
«Uručeńnie davierčych hramat nie zjaŭlajecca aktam pryznańnia dla Šviejcaryi. Akredytacyja pasła ŭstanaŭlivaje adnosiny pamiž aficyjnym pradstaŭnikom krainy, jakaja nakiroŭvaje, i dziaržavy znachodžańnia, jakija rehulujucca Vienskaj kanviencyjaj ab dypłamatyčnych adnosinach».
Svajo rašeńnie prysłać pasła ŭ ciapierašniuju Biełaruś u Biernie tłumačyli ŭ tym liku i intaresami palitźniavolenaj hramadzianki Šviejcaryi Natalli Chierše, pytańnie ab vyzvaleńni jakoj zastajecca na paradku dnia. Žančyna maje jak biełaruski, tak i šviejcarski pašparty. Jana była asudžanaja biełaruskim sudom da 2,5 hoda pazbaŭleńnia voli za sarvanuju z supracoŭnika AMAP bałakłavu padčas adnaho z pratestnych maršaŭ u 2020 hodzie.
U biełaruskaj demakratyčnaj supolnaści staviacca da pryjezdu šviejcarskaj dypłamatki i ŭručeńnia joj davierčych hramat Łukašenku ŭ toj čas, kali inšyja zachodnija krainy na takoje nie iduć, u lepšym vypadku skieptyčna, a čaściej niehatyŭna.
Tak, na dumku kiraŭnika Nacyjanalnaha antykryzisnaha kiravańnia Paŭła Łatuški, pryjezd dypłamata
«budzie pryniaty ŭ biełaruskim hramadstvie jak niehatyŭny krok Šviejcaryi, nie nakiravany na ŭstalavańnie adnosin ź biełaruskim hramadstvam i z novaj demakratyčnaj Biełaruśsiu, a jak krok, jaki padarvie davier da partnioraŭ z punktu hledžańnia taho, što dla ich kaštoŭnasnyja pytańni ahulnačałaviečaha charaktaru mienš važnyja, čym vyrašeńnie biahučych prablem u adnosinach Šviejcaryi z dyktataram».