Respublikanskaja trasa R3 u Łahojskim rajonie.
Ahulnaja praciahłaść aŭtamabilnych daroh Biełarusi — 86 tysiač kiłamietraŭ. Ź ich 87% — heta darohi ź ćviordym pakryćciom. Pa ščylnaści na tysiaču kvadratnych kiłamietraŭ płoščy ŭ krainie prypadaje 364 kiłamietry aŭtadaroh.
Pa słovach načalnika Hałoŭnaha ŭpraŭleńnia aŭtamabilnych daroh Ministerstva transpartu i kamunikacyj Respubliki Biełaruś Alaksandra Hałaŭniova, jakaść ajčynnych daroh źnižajecca, štohod značna pavialičvajucca abjomy jamkavaha ramontu.
«Pryčyna nie ŭ technałohijach — pryčyna ŭ mižramontnych terminach. Naprykład, samy drenny stan ciapier — u daroh na vyjezdach ź Minska, jakija ŭ 2000 hodzie byli kapitalna adramantavanyja. Prajšło 20 hadoŭ, i tam ničoha nie rabili ŭ spravie ramontu», — raskazaŭ Hałaŭnioŭ.
Ale, pavodle vystupoŭcy:
«Jamkavy ramont — heta naohuł samy nieefiektyŭny sposab układvańnia hrošaj. Kvadratny mietr jamkavaha ramontu kaštuje ŭ vosiem razoŭ daražej, čym mietr novaha pakryćcia».
Vyboiny i jamy na darohach, pa słovach śpiecyjalista, u pieršuju čarhu źjaŭlajucca z-za nievykanańnia mižramontnych terminaŭ. U pryvatnaści, u susiedniaj Rasii, dzie klimat u siaredniaj pałasie supastaŭny ź biełaruskim, pakryćcio daroh fiederalnaha značeńnia praktyčna nie maje defiektaŭ. Usia sprava ŭ technałohijach absłuhoŭvańnia i ramontu. «Płast znosu» ŭ čatyry santymietry treba zdymać raz na siem hadoŭ.
Ale taksama Hałaŭnioŭ adznačyŭ, što takaja technałohija patrabuje vialikich resursaŭ. Tym bolš, kali treba adramantavać usio i adrazu. Prytym jamkavy ramont, praviedzieny ŭ zimovych umovach, treba pierarablać pry nastupleńni stanoŭčych tempieratur.
«Asablivaść prahramy «Darohi Biełarusi» na 2021—2025 hady — u tym, što my sprabujem usimi siłami syści ad novaha budaŭnictva daroh i zasiarodzicca na ramoncie pakryćciaŭ», — padkreśliŭ Hałaŭnioŭ.
Pa słovach pradstaŭnika Mintransa, vyklučeńnie składzie budaŭnictva abjaznych daroh vakoł bujnych haradoŭ, kab źniać tranzitnuju nahruzku. Ciapier abjaznyja trasy ciahnuć u abychod Mahilova i Mira.
«Što tyčycca ličbaŭ, to płanujecca rekanstrukcyja 509 kiłamietraŭ respublikanskich daroh. Pa miascovych darohach takoj ličby ŭ nas niama. U prahramie idzie adnym radkom siem tysiač kiłamietraŭ pa ŭsich vidach ramontu i rekanstrukcyi», — rastłumačyŭ Hałaŭnioŭ.
Vierahodna, što admova ad budaŭnictva novych daroh źviazanaja z tym, što raniej była mahčymaść rabić heta za jeŭrapiejskija hrošy, naprykład, za srodki Banka rekanstrukcyi i raźvićcia. Ale ciapier hetyja srodki ŭ suviazi z palityčnym stanoviščam dla Biełarusi niedastupnyja.
