Sonny Pucin
Fota: censoru.net.
Adrazu paśla adkryćcia Alimpijady śviet ablacieli kadry, na jakich prezident Rasii Uładzimir Pucin u adzinocie naziraje za paradam alimpijcaŭ. Ci, dakładniej, nie naziraje: prachod ukrainskaj zbornaj akazaŭsia dla Pucina nastolki niecikavy, što, vidać, na hetym momancie jon prysnuŭ.
Emihracyja vydatnaha biełaruskaha łyžnika
Archiŭnaje fota
Hetaja historyja zdaryłasia nie ŭ Piekinie, ale ž jana maje samaje pramoje dačynieńnie da biełaruskaha alimpijskaha ruchu. I ŭsio praz toje, što ź Biełarusi źjechaŭ nie šarahovy spartoviec, a ŭdzielnik ažno siami alimpijad łyžnik Siarhiej Dalidovič.
Pra toje, što spartoviec pakinuŭ krainu, stała viadoma 9 lutaha. Jon adpraviŭsia za miažu razam z dačkoj, Darjaj Dalidovič, taksama łyžnicaj.
Pryčynaj adjezdu byŭ strach represij — Dalidovič nieadnarazova vykazvaŭsia suprać hvałtu ŭ krainie i za sumlennyja vybary. Praz heta jaho dačka trapiła pad presinh. Biełaruskija ŭłady adchilili Darju i inšuju łyžnicu, Śviatłanu Andryjuk, ad spabornictvaŭ z palityčnych pryčyn.
Pravał u žanočym bijatłonie
Hanna Soła. Fota: NAK Biełarusi.
Ni adnaho miedala ŭ biełaruskich bijatłanistak! Apošni raz žanočaja zbornaja viartałasia z takim vynikam dadomu ŭ 2006 hodzie, padčas zimovaj alimpijady ŭ italjanskim Turynie. Što da žanočaj bijatłonnaj estafiety, u jakoj biełaruski stali 13-mi, to heta ŭvohule najhoršy vynik našych spartsmienak za ŭsiu suvierennuju historyju krainy.
Miž tym bijatłon u apošni čas razam z frystajłam byŭ tym vidam sportu, ad jakoha biełarusy pryzvyčailisia čakać miedaloŭ. Bukmiekiery raźličvali, što vynik moža pakazać jak Dynara Alimbiekava (čempijonka minułych Hulniaŭ u žanočaj estafiecie), tak i Hanna Soła. Abiedźvie spartsmienki brali miedali ŭ apošnim siezonie na etapach bijatłonnaha Kubku śvietu.
U hety ž raz najlepšy vynik siarod biełaruskich bijatłanistak pakazała Hanna Soła — čaćviortaje miesca ŭ spryncie. Adnak vialikaha zadavalnieńnia hetaja ličba Hańnie nie pryniesła. Paśla apošniaj honki na Hulniach, dzie jana stała dziasiataj, bijatłanistka raskazvała žurnalistam pra rasčaravańnie: «Ruk nie apuskaju, chacia zrazumieła, što chaciełasia dasiahnuć zusim inšaha vyniku».
Mužčynski frystajł: biełarusy bieź miedaloŭ druhija Hulni zapar
Stanisłaŭ Hładčanka. Fota: pressball.by.
Jašče adzin pierśpiektyŭny dla biełarusaŭ vid i jašče adzin vynik, jaki nie nadta ŭražvaje. U alimpijski finał pa łyžnaj akrabatycy trapiŭ tolki adzin biełarus, Stanisłaŭ Hładčanka, i zaniaŭ jon tam pieradapošniaje 11-je miesca.
Na minułych zimovych Hulniach, u 2018-m, biełarusy taksama pralacieli ŭ frystajle mima miedaloŭ, adnak taja situacyja vyhladała bolš pierśpiektyŭnaj. Tady surjoznym pretendentam na miedali ad Biełarusi byŭ Anton Kušnir, adnak jon nie trapiŭ u finał spabornictvaŭ — sudździ nieadnaznačna acanili vystup spartoŭca ŭ kvalifikacyi.
Srebra ad padpisanta praŭładnaha lista
Anton Smolski i Dzinara Alimbiekava. Fota: dinara_alimbekova18 / Instagram.
Chopić pra rasčaravańni! Biełarusy viazuć dadomu z hetaj Alimpijady dva miedali.
Pieršy ź ich — srebra bijatłanista Antona Smolskaha, zavajavanaje ŭ indyvidualnaj honcy. Druhi — jašče adno srebra, na hety raz ad frystajlistki Hanny Huśkovaj.
Cikava, što abodva spartsmieny padpisvali paśla žniŭnia 2020 hoda adkrytyja listy spartoŭcaŭ. Voś tolki Huśkova padpisała list za sumlennyja vybary i suprać hvałtu, a Smolski — praŭładny list, stvorany ŭ procivahu listu za sumlennyja vybary.
Reinkarnacyja miema pra «čyk-čyryka»
Videa: by.tribuna.com.
Hukapierajmańnie «čyk-čyryk» stała miemam, kali komik Słava Kamisaranka ŭznaharodziŭ takoj mianuškaj Alaksandra Łukašenku. Ciapier ža miem atrymaŭ novaje ŭvasableńnie — u sporcie. Kali biełaruski spartoviec Pavieł Dzik niaŭdała vystupiŭ u kvalifikacyi frystajlistaŭ, kamientatar kanała Eurosport zhadaŭ u dačynieńni da jaho znakamity žart: «Voś taki voś čyk-čyryk atrymaŭsia. Nie zdoleŭ paradavać baćku».
Dopinhavy skandał u rasijskaj «fihurcy»
Kamiła Valijeva. Fota: championat.com.
Padčas kamandnaha turniru pa fihurnym katańni śviet začaravała 15-hadovaja Kamiła Valijeva. Dziaŭčyna stała pieršaj fihurystkaj, jakaja vykanała na Alimpijadzie čaćviarny pryžok, a jaje katańnie natchniła navat halivudskaha akciora Aleka Bołduina, jon napisaŭ ab «pryhažości, ad jakoj zamiraje serca».
Ale serca zamirała niadoŭha. Pierad indyvidualnymi vystupami ŭskrylisia danyja sa śniežańskich dopinh-probaŭ Valijevaj, u jakich byŭ znojdzieny zabaronieny preparat trymietazidzin. Paśla pakutlivaha rasśledavańnia Valijevu ŭsio-tki dapuścili da indyvidualnych spabornictvaŭ, ale ž fihurystka pakazała tolki čaćviorty vynik.
«Nie vajnie» ad frystajlistaŭ
Fota: AR.
Va ŭmovach abvastreńnia kryzisu na ŭkrainska-rasijskaj miažy spartoŭcy ŭ Piekinie narešcie ŭspomnili pra toje, što alimpijski ruch zaŭsiody vystupaŭ za mir. Mahutnym žestam adznačylisia ŭkrainski frystajlist Alaksandr Abramienka i jaho rasijski kaleha Illa Buraŭ. Abramienka zaniaŭ na Alimpijadzie druhoje miesca, a Buraŭ — treciaje.
Pierad uznaharodžvańniem spartoŭcy abnialisia i tak paziravali fatohrafam. Raniej im užo prychodziłasia apraŭdvacca za takija žesty siabroŭstva, ale frystajlisty ŭsio ž taki skazali svajo nie vajnie — tak, jak zdoleli.
Čytajcie jašče:
Top-5 najlepšaj spartovaj formy na sioletniaj Alimpijadzie i adna najhoršaja
Niaŭdały biznesmien i trenier zbornaj. Čym zajmajucca ciapier byłyja biełaruskija zorki zimovych Alimpijadaŭ
